PROVERBIOS 14 - Dios Rimashcata Quillcashcami

¹ Yachaisapa huarmica paipac huasita alli nishpami sinchiyachin. Ashtahuanpish yuyai illac huarmica paipac quiquin maquicunahuanmi urmachin.

² Allita ruhuashpa causac runaca Mandac Diostami manchan. Ashtahuanpish mana allita ruhuac runaca mana ricunayachinchu.

³ Yuyai illac runapac shimimantaca jatun tucuna yuyaimi varahuan lomopi llaquichic shina llucshin. Ashtahuanpish yachaisapa runataca paipac rimashcami cuidan.

⁴ Yunta huagracuna mana tiyacpica, granota huacaichinacunaca chushacllami. Ashtahuanpish yunta huagracunapac fuerzamantaca granocunaca tiyanmi.

⁵ Cashcata huillac runaca mana llullanchu. Ashtahuanpish llullac runaca llullallatami huillanga.

⁶ Mana cazushpa asic runaca alli yachaita mashcashpapish mana tarinchu. Ashtahuanpish allita yachac runamanca yachacunaca jahuallami.

⁷ Yuyai illac runamanta caruyangui. Pai rimashcapica ima alli yachaita mana taringuichu.

⁸ Allita yachac runaca pai ima shina causashcatami yuyarin. Ashtahuanpish yuyai illac runaca yuyaita mana charishcamantami llullallapi causan.

⁹ Yuyai illac runacunaca ima mana allita ruhuashpami asincuna. Ashtahuanpish allita ruhuaccunapurapica alli ruhuanatami munancuna.

¹⁰ Causai llaquilla cashcataca shungullami yachan. Cushicui tiyacpipish, shuctaccunaca mana yachancunachu.

¹¹ Diosta mana manchaccunapac huasica shitashcami canga. Ashtahuanpish allita ruhuaccunapac huasica sisacuc shinami ricuringa.

¹² Runamanca alli ñan shinami ricurin. Shina cashpapish, huañuiman pushac ñanmi.

¹³ Yalli asishcapish shunguta nanachinmi. Cushilla asishca quipaca llaquillami saquirin.

¹⁴ Mana cazuc runaca pai mana allita ruhuashcahuanmi cushilla canga. Ashtahuanpish allita ruhuac runaca pai allita ruhuashcahuanmi cushicunga.

¹⁵ Ashalla yuyaita charic runaca imatapish crinllami. Ashtahuanpish alli yuyaiyuc runaca imata ruhuangapacpish allita yuyarinracmi.

¹⁶ Yachaisapa runaca mana allita ruhuanata manchashpami chaimanta caruyan. Ashtahuanpish yuyai illac runaca mana manchashpami jatun tucushpa purin.

¹⁷ Utca piñaric runaca yuyai illac shina imatapish ruhuanllami. Mana allita ruhuac runaca tucuipac piñanami canga.

¹⁸ Mana yachaccunaca yuyai illacmi tucungacuna. Ashtahuanpish alli yuyaiyuc runacunaca alli yachaitami coronata shina chasquingacuna.

¹⁹ Mana allita ruhuac runacunaca allita ruhuac runapac ñaupapimi cumuringacuna. Diosta mana manchaccunaca cashcata ruhuaccunapac pungupimi cumuringacuna.

²⁰ Huaccha runataca paihuan apanacucpish piñanmi. Ashtahuanpish charic runataca achcacunami cuyan.

²¹ Maijanpish shuccunata piñacca juchallinmi. Ashtahuanpish huacchacunata llaquicca yallitami cushicun.

²² Mana allita yuyariccunaca ¿manachu pandarincuna? Allita yuyariccunaca cuyaccunami, cashcata niccunami.

²³ Ima trabajota ruhuashpapish japinmi. Ashtahuanpish rimashpalla causaccunaca huacchami causancuna.

²⁴ Yachaisapa runacunapac corona shinaca alli yachaimi. Ashtahuanpish yuyai illaccunapac coronaca pandarinami can.

²⁵ Imapish cashcata huillac runaca causaita quishpichinmi. Ashtahuanpish llullac runaca yangatami huillan.

²⁶ Mandac Diosta manchaccunaca paipi shunguta churashpami causancuna. Chashna manchacpimi churicunapish pai cuidashca causangacuna.

²⁷ Mandac Diosta manchanaca causaita cuc yacu llucshicuc shinami. Shinallatac huañuchic tucllamanta anchuchinmi.

²⁸ Jatun mandacca achca gentecunata mandacushpami tucuipac alli nishca tucun. Shinallatac ashalla gentecunata mandashpaca yangallami tucun.

²⁹ Alli yuyaita chariccunami mana utca piñarin. Ashtahuanpish shungupi utca piñaric runaca yuyai illac cashcatami ricuchin.

³⁰ Cushilla shunguca cuerpomanpish causaita cunmi. Ashtahuanpish shucpac charishcata munacca tullucunamanmi ungüita apamun.

³¹ Imatapish mana chariccunata llaquichishpa causacca paita ruhuac Diostami llaquichin. Ashtahuanpish ima mana chariccunata llaquic runaca Diostami alli nin.

³² Diosta mana manchacca pai millaita ruhuashcamantami chingaringa. Ashtahuanpish cashcata ruhuacca huañugricushpapish cuidashcami canga.

³³ Allita entendic runapac shungupimi alli yachaica tiyan. Ashtahuanpish mana entendiccunapac chaupipica mana ricsishcachu can.

³⁴ Cashcata ruhuac runacunaca llactatapish jatunyachinmi. Ashtahuanpish juchata ruhuaccunaca llactatapish pingaichinmi.

³⁵ Jatun mandacca paita servic alli yuyaita charicpimi cuyan. Ashtahuanpish paita pingaichic runataca piñashpami llaquichin.