PROVERBIOS 13 - Dios Rimashcata Quillcashcami

¹ Yachaisapa churica taita cunashcataca chasquinmi. Ashtahuanpish burlac churica cunashcata manatac uyanchu.

² Runaca allita rimashpaca allitami japinga. Ashtahuanpish mana cazuccunaca llaquimi tucunga.

³ Maipish cachun mana rimaric runaca quiquin causaitami cuidan. Ashtahuanpish maipish cachun rimaric runataca jatun llaquimi japin.

⁴ Quilla runaca imata munacushpapish mana japingachu. Ashtahuanpish cusi runaca paipac munashcatami japinga.

⁵ Cashcata ruhuac runaca llulla shimitaca piñanmi. Ashtahuanpish Diosta mana manchacca shuccunapac piñashca, pingai tucun.

⁶ Cashcata ruhuac runataca chai cashcata ruhuashcallatacmi cuidan. Ashtahuanpish juchayuc runataca chai juchallatacmi urmachin.

⁷ Maijanpish chayucyasha nishpapish imata mana charinchu. Shinallatac maijanpish huaccha casha nishpaca achca charicmi tucuncuna.

⁸ Charic runaca pai charishcacunahuan maijan huañuchinamantapish quishpiri pudinmi. Ashtahuanpish huaccha runataca pi mana huañuchisha nishpa manchachinchu.

⁹ Cashcata ruhuaccunapac causaica luz japirishpa achicyachic shinami cushicun. Ashtahuanpish Diosta mana manchaccunaca, lámpara huañushca shinami tucun.

¹⁰ Cariyashpa jatun tucuccunaca piñanacuipimi churan. Ashtahuanpish cunashcata uyaccunami allita yachaccuna can.

¹¹ Cungailla charishcacunaca utcami tucurin. Ashancaman, ashancaman charishcacunaca achcayashpami catin.

¹² Ima shuyacushca mana utca pactashpaca shungutami llaquichin. Ashtahuanpish shuyacushca utca pactashpaca causaita cuc yura shinami can.

¹³ Shinallatac mandashcata millanayachicca jatun llaquitami apanga. Ashtahuanpish mandashcata manchashpa cazuc runaca allitami japinga.

¹⁴ Yachaisapa yachachishcaca causaita cuc yacu shinami. Chai yachachishcacunaca huañuna tucllamanta quishpichinmi.

¹⁵ Alli yuyaica cushichinmi. Ashtahuanpish mana cazuccunapac causaica llaqui causaimi.

¹⁶ Alli yuyaiyuc runacunaca alli yachaihuanmi imatapish ruhuancuna. Ashtahuanpish yuyai illac runaca yuyai illac cashcatami ricuchin.

¹⁷ Mana alli huillac runaca llaquitami apamun. Ashtahuanpish cashcata huillac runaca jambic shina cushicuitami apamun.

¹⁸ Alli causachun cunashcata mana uyasha nic runaca pingaichishcapish, huacchapishmi canga. Ashtahuanpish alli causachun cunashcata chasquicca alli nishcami canga.

¹⁹ Ima munashca pactacpica, shungupish cushicunmi. Ashtahuanpish yuyai illac runaca mana allita ruhuanata saquinataca millanayachinmi.

²⁰ Yachaisapa runacunahuan tandanacucca yachaisapami tucunga. Ashtahuanpish yuyai illac runacunahuan tandanacucca paipish yuyai illacmi tucun.

²¹ Juchayuccunataca llaquimi catiranga. Ashtahuanpish cashcata ruhuaccunaca imapish allicunatami japinga.

²² Allita ruhuac runaca herenciatami paipac huahuacunapac huahuacunaman saquinga. Ashtahuanpish juchayuc runapac charishcaca cashcata ruhuac runaman cungapacmi huacaichishca.

²³ Huacchacuna yapushca pambapica achcami pucun. Ashtahuanpish cashcata ruhuaccuna mana tiyacpimi, tucui chaicunaca chingarin.

²⁴ Alli yachacuchun nishpa huahuata mana dalicca paipac quiquin huahuallatatacmi mana ricunayachin. Ashtahuanpish cuyashpaca, uchillamanta pachami dalishpa yachachin.

²⁵ Cashcata ruhuac runaca huicsa pactatami micun. Ashtahuanpish Diosta mana manchaccunaca chushac huicsami puringacuna.