PROVERBIOS 12 - Dios Rimashcata Quillcashcami

¹ Yachachishcata uyac runaca alli yachaitami cuyan. Ashtahuanpish cunashcata mana uyacca imatapish mana yachacmi.

² Alli runamanca Mandac Diosllatacmi allicunata cun. Ashtahuanpish millai yuyaiyuc runataca jatun llaquimanmi cachanga.

³ Pipish Diosta mana manchashpaca mana sinchi cai pudinchu. Ashtahuanpish cashcata ruhuaccunaca alli sapiyashca shina, mana cuyuchipacmi.

⁴ Yuyaisapa huarmica paipac cusapac corona shinami. Ashtahuanpish yuyai illac huarmica cusapac tulluta ismuchic shinami.

⁵ Cashcata ruhuaccunaca allicunatacmi ruhuanata yuyancuna. Ashtahuanpish Diosta mana manchaccunaca llullashpami yuyaita cuncuna.

⁶ Diosta mana manchaccunaca pacalla huañuchinallatacmi parlanacuncuna. Ashtahuanpish allita ruhuaccunapac rimaica huañuimantami quishpichin.

⁷ Diosta mana manchaccunaca Dios chingachicpimi, tucurincunalla. Ashtahuanpish cashcata ruhuaccunapac huasipica ima llaqui mana tiyanchu.

⁸ Runaca alli yachac cashcamantami alli nishca canga. Ashtahuanpish millai shungu runataca tucuimi mana ricunayachinga.

⁹ Micunallatapish mana charic jatun tucushca canapac randica, serviccunayuc yangalla runa canami ashtahuan alli.

¹⁰ Cashcata ruhuacca paipac animalcunatapish mana yarcaipi charinchu. Ashtahuanpish Diosta mana manchacca mana llaquinchu.

¹¹ Allpapi trabajac runaca mana nictami micunga. Ashtahuanpish yuyai illaccunallami yanga puriccunata catincuna.

¹² Diosta mana manchac runaca millaicuna urmana tucllapi urmanatami munan. Ashtahuan imatapish cashcata ruhuacca alli pucuc yura shinami.

¹³ Millai runaca, paipac shimi rimashcallahuantacmi huataric shina saquirin. Ashtahuanpish cashcata ruhuacca llaquipi cashpapish llucshinmi.

¹⁴ Runaca pai rimashca shinallatacmi imata cashpapish mana nicta japinga. Paipac maquihuan imata ruhuashca shinallatacmi pai japinataca chasquinga.

¹⁵ Yuyai illac runaca paipac yuyaipica alli ñanta ricushcatami yuyan. Ashtahuanpish cunashcata uyashpa cazuc runaca alli yachaisapa runami.

¹⁶ Yuyai illac runaca piñarishcataca utcami ricuchin. Ashtahuanpish alli yuyaiyuc runaca piñarishpapish shungupi chingachinllami.

¹⁷ Mana llullac runaca cashcatami huillan. Ashtahuanpish llullashpa huillacca umashpami parlan.

¹⁸ Maijancunaca imata rimashpaca espadahuan chugrichic shinami rimancuna. Ashtahuanpish yachaisapa runapac rimaica jambi shinami.

¹⁹ Cashcata huillac runaca huiñaitami causanga. Ashtahuanpish llulla calluca ashacamanllami canga.

²⁰ Millaita yuyarishpa causaccunapac shungupica, llullana yuyaillami tiyan. Ashtahuanpish cushilla causachun cunaccunaca cushicunmi.

²¹ Cashcata ruhuactaca ima llaquipish mana japingachu. Ashtahuanpish Diosta mana manchaccunaca yallita llaquihuanmi cangacuna.

²² Llulla shimicunataca Mandac Diosca mana ricunayachinchu. Ashtahuanpish mana llullac runacunahuanmi cushicun.

²³ Alli yuyaiyuc runaca pai yachacushcataca shungupimi huacaichin. Ashtahuanpish yuyai illac runaca yuyai illac cashcatami ricuchin.

²⁴ Alli trabajac runaca mandashpami causanga. Ashtahuanpish quilla runaca mandashcallami causanga.

²⁵ Shungu yallita llaquihuan cashpaca ima yuyaitapish chingachinllami. Ashtahuanpish allita rimashcaca cushichinmi.

²⁶ Cashcata ruhuac runaca alli ñantami pushan. Ashtahuanpish Diosta mana manchaccunapac ñanca pandachinllami.

²⁷ Quilla runaca animalta japishpapish mana cusashpa micunchu. Ashtahuanpish cusi runaca imatapish valishcatami charin.

²⁸ Cashcata ruhuanaca causaiman pushac ñanmi. Chai ñanpica huañuipish mana tiyanchu.