PROVERBIOS 11 - Dios Rimashcata Quillcashcami

¹ Mandac Diosca mana alli pezac balanzataca manatac ricunayachinchu. Ashtahuanpish allita pezac balanzahuanca cushicunmi.

² Jatun tucuna yuyaicunaca pingaipimi churanga. Ashtahuanpish alli yachaica yangalla runacunahuanmi.

³ Cashcata ruhuac runacunataca chai ruhuashcacunallatacmi alli ñanta pushanga. Ashtahuanpish juchata ruhuaccunataca chai juchallatacmi tucuchinga.

⁴ Dios piñarishpa llaquichi punzhapica ima charishcaca mana quishpichingachu. Ashtahuanpish cashcata ruhuashcami huañuimanta quishpichinga.

⁵ Allita ruhuac runataca cashcata ruhuashcami alli ñanta pushanga.

⁶ Allita ruhuaccunataca cashcata ruhuashcallatacmi quishpichinga. Ashtahuanpish juchata ruhuaccunaca chai juchallapitacmi japi tucushpa chingaringa.

⁷ Diosta mana manchac runa huañucpica, pai shuyacushcapish, yuyaricushcapish tucuringami.

⁸ Cashcata ruhuac runataca jatun llaquimantapish quishpichingami. Ashtahuanpish Diosta mana manchac runataca yalli llaquimi tucuchinga.

⁹ Mishqui shimi jayac shungu runaca pai rimashcahuanmi, shuctac runata llaquichin. Ashtahuanpish cashcata ruhuaccunaca allita yachac cashpami quishpirincuna.

¹⁰ Pueblopi causaccunaca cashcata ruhuaccuna alli causacpimi cushicuncuna. Ashtahuanpish Diosta mana manchaccuna huañucpica, cushicushpami caparicuncuna.

¹¹ Allita ruhuaccunata bendiciacpimi, puebloca alli nishca canga. Ashtahuanpish Diosta mana manchaccuna rimashcaca llaquichishpami tucuchin.

¹² Mana entendic runaca shuctac runataca mana ricusha ninchu. Ashtahuanpish alli entendic runaca ima cacpipish upallami can.

¹³ Rimarishpalla puric runaca mana parlana cashcatapish parlanllami. Ashtahuanpish alli runaca paipac shungullapimi tucuita pacalla charin.

¹⁴ Shuc mandac pueblota mana allita mandacpica, llaqui tucushpa urmangami. Ashtahuanpish cunaccuna achca tiyacpica, mana llaqui tucungachu.

¹⁵ Maijanpish mana ricsishca runapac garante tucushpaca, llaquillami causanga. Ashtahuanpish debi tucunata mana munacca cushillami causanga.

¹⁶ Alli shungu huarmica alli nishcami canga. Ashtahuanpish utca imatapish ruhuacca charicyangami.

¹⁷ Pitapish llaquic runaca paipac shungumanmi allita ruhuan. Ashtahuanpish yallita llaquichic runaca paillatacmi llaqui tucun.

¹⁸ Diosta mana manchac runa trabajashpa imata japishcaca yangallami. Ashtahuanpish tarpuc shina cashcata ruhuac runaca mana tucuriclla allicunatami japinga.

¹⁹ Cashcata ruhuac runaca causaitami charinga. Maijanpish mana allita ruhuacca huañungapacmi chashna ruhuacun.

²⁰ Mandac Diosca mana alli shungu runataca millanayachinmi. Ashtahuanpish allita ruhuashpa causac runahuanca cushicunmi.

²¹ Mana allita ruhuac runaca llaquichishcatacmi canga. Ashtahuanpish cashcata ruhuac runaca huahua huahuacamanmi quishpichishca canga.

²² Sumac ñahui cashpapish, yuyai illac huarmica cuchipac singapi curi zarcillota churashca shinami.

²³ Cashcata ruhuaccunaca allillata ruhuanatami munancuna. Ashtahuanpish Diosta mana manchaccunaca, piñanacuillatami shuyancuna.

²⁴ Maijanpish ima charishcata caraccunaca ashtahuanmi chayucyancuna. Maijanpish yallita misashpa, quiquinpaclla charinata munaccunaca imapish illacmi tucuncuna.

²⁵ Shuccunaman imatapish carac alli shungu runaca tucuitami charin. Shuccunaman mana nicta caracca paipish mana nictami micunga.

²⁶ Granota quiquinpaclla cachun tandachic runataca tucui gentecunami maldician. Ashtahuanpish mana huacaichishpa, tucuiman cushilla catuctaca bendiciangami.

²⁷ Shuccunaman allita ruhuanata munac runaca paipish ayudata charingami. Ashtahuanpish llaquichinata munac runataca chai llaquillatacmi japinga.

²⁸ Maijanpish pai charishcallapi shunguta churacca chaquic shinami urmanga. Ashtahuanpish cashcata ruhuacca verdinlla ramacunayuc yura shinami canga.

²⁹ Maijanpish paipac huasi ucupurata mana cuidac runaca imatapish mana charingachu. Rumi shungu runaca yachaisapa runata servishpami causanga.

³⁰ Cashcata ruhuac runaca causaita cuc yura shinami. Alma quishpirichun huillac runaca yachaisapami.

³¹ Cashcata ruhuac runaca cai pachapi pai japinata japingami. Shina cacpica, ¡Diosta mana manchac juchayuc runaca llaquitaca japingatacmi!