PROVERBIOS 10 - Dios Rimashcata Quillcashcami

Salomonpac yuyachic rimaicunamanta

¹ Cai yuyaita cuc rimaicunaca Salomón quillcashcami. Yuyaisapa churica taitata cushichinmi. Ashtahuanpish mana entendic churica mamata llaquichinmi.

² Shuhuashpa charishcacunaca imapacpish mana valinchu. Ashtahuanpish cashcata ruhuashcaca huañuimanta quishpichinmi.

³ Mandac Diosca cashcata ruhuactaca mana yarcaipi saquinchu. Ashtahuanpish Diosta mana manchaccunataca paicuna munashcahuan mana sacsachun saquinchu.

⁴ Quilla runapac maquica huacchayachinmi. Ashtahuanpish runapac maquica chayucyachinmi.

⁵ Usyai punzhacunapi cosechacca yuyaisapa churimi. Ashtahuanpish cosechana punzhacunapi sueñuc churica pingaichinmi.

⁶ Cashcata ruhuac runaca bendiciashcami canga. Ashtahuanpish Diosta mana manchaccunataca millaita ruhuashcallatacmi shimita tapanga.

⁷ Cashcata ruhuac runapac shutica yuyarishcami canga, ashtahuanpish Diosta mana manchaccunapac shutica ismuc shinami chingaringa.

⁸ Yuyaisapacunami mandashcacunata shungupi chasquin. Ashtahuanpish millaita rimac shimica chingaringami.

⁹ Allita ruhuashpa causac runaca imata mana manchanchu. Ashtahuanpish mana allita ruhuashpa causacca jatun llaquimi tucunga.

¹⁰ Ñahuita quimllac runaca llaquitami apamun. Millaita rimac runaca llaquichishcami tucuringa.

¹¹ Cashcata ruhuac runapac rimashcaca causaita cuc yacu shinami. Ashtahuanpish Diosta mana manchaccunapac rimashcaca macanacuipimi churan.

¹² Piñanacuica macanacuipimi churan. Ashtahuanpish cuyaica mana allita ruhuashcata pacanmi.

¹³ Alli yuyaita charicpac shimimantaca alli yachaimi llucshin. Ashtahuanpish varaca mana entendiccunata macangapacmi.

¹⁴ Yuyaisapacunaca alli yachaita shungupimi charincuna. Ashtahuanpish mana entendic runapac shimica llaquitami apamucun.

¹⁵ Chayuc runapac charishcacunaca jatun pircayuc pueblo shinami. Ashtahuanpish huaccha runataca huaccha causaimi llaquichin.

¹⁶ Cashcata ruhuac runapac ruhuashcacunaca causaita cungapacmi. Ashtahuanpish Diosta mana manchaccuna ruhuashcaca juchapacmi.

¹⁷ Cunashcata cazuc runaca causaita cuc ñanpimi. Ashtahuanpish cunashcata mana uyacca pandaricunmi.

¹⁸ Piñarishca cashpapish mana piñarishca shina shungullapi charicuc runaca llullami. Pitapish yanga juchanchishpa rimac runaca mana entendic runami.

¹⁹ Yallita rimaric runaca yallitami pandarin. Ashtahuanpish jarcarishpa rimacca alli yuyaiyucmi.

²⁰ Cashcata ruhuac runapac rimashcaca acllashca cullqui shinami. Ashtahuanpish Diosta mana manchac runapac shunguca imapac mana valinchu.

²¹ Cashcata ruhuac runapac shimica achcacunatami allita pushan. Ashtahuanpish mana yachaccunaca mana entendishpami huañuncuna.

²² Mandac Dios bendiciashcaca chayucyachinmi. Shinallatac ima llaquipipish mana churanchu.

²³ Yuyai illac runaca millaita ruhuashpami cushicun. Ashtahuanpish alli yuyaiyuc runaca alli yachacushpami cushicun.

²⁴ Diosta mana manchac runa imatami manchan, chai manchaillatacmi paita japinga. Ashtahuanpish cashcata ruhuaccunaca imata pai munashcatami japinga.

²⁵ Huaira tamya shamushpa chingaric shinami, Diosta mana manchacca chingaringa. Ashtahuanpish cashcata ruhuac runaca maita mana cuyuchipac huiñaita causacunllami.

²⁶ Quilla runata mandanaca vinagreta amullishca shina, ñahuipi cushni yaicuc shinami.

²⁷ Mandac Diosta manchacpica, causana punzhacunami miran. Ashtahuanpish Diosta mana manchaccunapac causana punzhacunaca utcami tucurin.

²⁸ Cashcata ruhuaccunapac shuyanaca cushicunami canga. Diosta mana manchaccunapac shuyanaca chingarinallami canga.

²⁹ Allita ruhuashpa causaccunapacca Mandac Diosca jarcarina torre shinami. Ashtahuanpish millaita ruhuaccunapacca chingarinaman apana ñan shinami.

³⁰ Cashcata ruhuac runataca pi mana cuyuchingachu. Diosta mana manchaccunaca cai llactapica mana causangacunachu.

³¹ Cashcata ruhuac runapac shimica alli yachaitami riman. Ashtahuanpish millaita rimactaca callutami pitinga.

³² Cashcata ruhuacca cushicuna rimaicunatami riman. Ashtahuanpish Diosta mana manchaccunaca millaillatami riman.