PROVERBIOS 1 - Dios Rimashcata Quillcashcami

Yuyachic rimaicunahuan alli causanata yachachishcamanta

¹ Cai yuyaita cuc rimaicunaca, Davidpac churi israelcunata jatun mandac Salomón quillcashcami.

² Cai rimaicunaca alli yachacungapac, cazushpa causangapacmi. Cai rimaicunaca jatun yuyaicunata ashalla rimaicunahuan yuyaita cungapac,

³ shinallatac cazungapac, yachacungapac, cashcata ruhuangapac, allita ruhuangapac, pacta pacta ruhuanata yachacungapac,

⁴ mana yachaccunata alli yachachingapac, mosocunaman alli yuyaita cungapac, allita yuyarishpa imatapish ruhuanata yachachingapacmi can.

⁵ Yachaisapa runa uyashpaca, ashtahuanmi yachacunga. Alli yuyaiyuc runapish, alli yuyaita cushcataca chasquingami.

⁶ Yuyaita cuc, yachachishca rimaicunaca, yachaisapacuna rimashcatapish, yuyaita japina rimaicunatapish pi mana yachai tucushcatapish, yachangapacmi.

⁷ Alli yachac cangapac callaricca Mandac Diosta manchanami can. Ashtahuanpish mana entendiccunaca alli yachaitapish, yachachishcatapish piñancunami.

Alli yachaisapa cunashcamanta

⁸ «Ñuca huahualla, alli causachun cambac taita rimashcataca alli uyangui. Alli causachun cambac mama yachachishcataca ama cungaringuichu.

⁹ Chai yuyaicunaca sumac coronata cambac umapi churarishca shina, sumac huallcata cungapi churarishca shinami canga.

¹⁰ Ñuca huahualla, millaita ruhuaccuna inquitacpipish ama uyanguichu.

¹¹ Canta: “Ñucanchic-huan jacu, tucllata churashpa mana faltayuc runata, pacalla chapashpa huañuchingapac

¹² Seol shinami causacta millpushun. Jatun jutcupi shitac shinami chingachishun.

¹³ Tucuilaya charishcacunatami japishun. Tucui chaicunata quichushpami, ñucanchic huasicunapi jundachishun.

¹⁴ Canca yachacmi cangui. Ñucanchic-huan jaculla. Ñucanchicca shuc tulullapimi tucuita tandachishun” ningacunami.

¹⁵ Ñuca huahualla, paicunahuanca ama puringuichu. Paicuna purina ñanmantaca anchuringui.

¹⁶ Mana allita ruhuangapacca callpashpami rincuna. Huañuchishpa yahuarta jichangapacca utcami rincuna.

¹⁷ Zhutacuna ricucucpi, linchita churacpica mana yaicuncunachu.

¹⁸ Ashtahuanpish chai runacunaca paicunallatac huañungapacmi tucllata ruhuancuna. Paicunapac llaquipacllatacmi tucllata churancuna.

¹⁹ Ima shinapish chayucyanata munaccunataca chai charishcallatacmi causaita quichun.

²⁰ Alli yachaica ñancunapimi caparishpa cayacun. Plazacunapimi paipac rimaicunaca uyarin.

²¹ Achca gentecuna purina ñancunapimi caparishpa huillacun. Pueblo yaicunapi paipac yuyaicunata huillashpaca:

²² “Mana yachaccuna, ¿ima horascamantac chashna mana yachacushpa, causasha ninguichic? Burlaccuna ¿Ima horascamantac chashna burlashpa causasha ninguichic? Mana entendiccuna ¿ima horascamantac alli yachanata piñanguichic?

²³ ¡Ñuca rimashcata uyashpa cutimuichicyari! ¡Riqui, ñuca rimashcacunata yachacuchunmi munani! ¡Cancunapac jahuapica ñuca Espiritutami tallic shina cachasha!

²⁴ Cancunata tauca cutin cayacpipish, mana uyarcaguichicchu. Maquihuan cayacpipish, mana shamurcanguichicchu.

²⁵ Ashtahuanpish ñuca cunashcatapish, ñuca rimashcatapish mana munarcacunachu.

²⁶ Cancunata jatun llaqui japicpica, ñucaca asishami. Cancuna jatun llaquicunahuan cacpica burlarishami.

²⁷ Cancuna manchana jatun llaquicunaca tucuchic shinami shamunga. Jatun acapana huaira shina shamushpami, cancunataca yallita llaquichinga.

²⁸ Chai llaquicuna japicpimi, ñucata mañangacuna. Shina mañacpipish ñucaca mana uyashachu. Ñucata yallita mashcashpapish, mana taringacunachu.

²⁹ Alli yachaita piñashpami, Mandac Diosta mana manchasha nircacuna.

³⁰ Ñuca cunashcata mana uyasha nishpami, jarcashpa rimacpipish yangalla cashcata yuyarcacuna.

³¹ Paicuna millaita ruhuashpa causashcataca tarpushpa cosechac shinami japingacuna. Chashnami huicsa pactata micungacuna.

³² Imata mana yachaccunataca chai mana yachashcallatacmi huañuchinga. Mana alli yuyaiyuc gentecunataca chai mana alli yuyaillatacmi tucuchinga.

³³ Ashtahuanpish ñucata uyashpaca, llaquicunata mana manchashpa, imatapish mana manchashpami, cushilla causanga” nishpami huillacun.