OSEAS 9 - Dios Rimashcata Quillcashcami

Israelcuna mana cazucpi, Dios llaquichina cashcamanta

¹ Israelcunalla, shuctac llactapi causaccuna shina, ama yallita cushicuichicchu. Cancunaca huainayac huarmi shinami, cancunapac Diosmanta caruyashcanguichic. Granota trillana erapi huainayashpa, cullquita japinatami munarcanguichic.

² Chaimantami trillana erapica grano illanga. Uvasta cutanapica llullu vino illanga.

³ Efraín ailluca Mandac Dios cushca llactapica mana saquiringachu. Ashtahuanpish Egiptoman, Asiria llactamanmi cutinga. Chaipimi millana micunata micunga.

⁴ Tallina vinotapish Mandac Diosman mana cungachu. Imata cushcatapish mana chasquingachu. Tandapish duelo huasipi micuna tanda shinami canga. Chaita tucui micuccunami mapayanga. Chai tandaca Mandac Diospac huasiman mana yaicungachu. Ashtahuanpish chai tandaca paicuna micungapacllami canga.

⁵ Mandac Diospac fiesta punzhapi, mana cashpaca shuctac fiesta punzhapica, ¿imatac paicunaca ruhuancuna?

⁶ Paicunaca llaquichigricucpimi rirca. Egiptopi causaccunami paicunataca chasquinga. Menfis llactapi causaccunami enterranga. Paicunapac cullqui huacaichinapica chinimi jundanga. Huasicunapica cashacunami huiñanga.

⁷ ¡Llaquichina punzhacunami chayamun! ¡Paicuna japina punzhacunami pactamun! ¡Chaitaca israelcunami yachanga! Chaica, cancunallatac yalli juchata ruhuashcamanta, yalli millai yuyaihuan cashcamantami Dios ima nishcata huillactaca: “Yuyai illacmi” ninguichic. Cutin Diospac Espirituta charic runataca: “Locomi” ninguichic.

⁸ Diosca Efraín ailluta chapachunmi, pai ima nishcata huillacta churashca. Shina cacpipish, cancunaca paita urmachingapacmi tucllata churanguichic. Diospac huasipica mana ricusha ninguichicchu.

⁹ Gabaa llactapi causaccuna shinallatacmi yallita millaita ruhuashpa causarca. Cunanca, paicuna mana allita ruhuashcata Mandac Dios yuyarishpami llaquichinga.

¹⁰ Mandac Diosca: «Israelcunataca shitashca pambapi uvasta taric shinami tarircani. Paicunapac ñaupa taitacunataca punta pucushca higota shinami ricurcani. Ashtahuanpish paicunaca ñucamanta anchurishpami, Baal-peor diosta mañashpa pingai tucurca. Chai diosta catishpami millana tucurca.

¹¹ Alli nishca Efraín ailluta volac animal shinami chingaringa. Chaimantami huarmicunapish mana sajuaringa. Mana huicsayuc tucungachu. Shinallatac mana huahuata charingachu.

¹² Huahuacuna huiñacpipish, paicunapuramanta anchuchishami. Paicuna ñucamanta anchurishpaca, ¡imachari tucunga!

¹³ Ñuca ricucpica, Efraín ailluca Tiro llactapi causaccuna shinami, sumac llactapi causacurca. Shina causacushpapish paicunapac churicunata huañuchingapacmi apanga» ninmi.

¹⁴ Mandac Dioslla, paicunaman imata cuna cashcata cuiyari. Paicunataca shulluc huarmicunata, leche illac huarmicunata ruhuaiyari.

Efraín ailluta Mandac Dios piñashcamanta

¹⁵ Mandac Diosca: «Paicuna mana allita ruhuashcataca Gilgalpi ricunallami. Chaipimi paicunataca mana ricunayachircani. Paicuna yalli mana allita ruhuashcamantami, ñuca huasimanta llucchishpa cachasha, mana ashtahuan cuyashachu. Paicunata tucui mandaccunapish mana cazuccunami.

¹⁶ Efraín ailluca ungushca yura shinami, sapi chaquishca. Chaimantami ima granopish mana pucunga. Huahuacunata charicpipish, chai cuyashca huahuacunataca ñucami huañuchisha» ninmi.

¹⁷ Ñuca Mandac Diosca paita mana cazushcamantami mana ricunayachirca. Chaimantami paicunaca shuctac llactacunapica chingarishpa puricunga.