OSEAS 8 - Dios Rimashcata Quillcashcami

Israelcunata llaquichishcamanta

¹ Mandac Diosca: «¡Ñuca huasitaca angacuna shinami, llaquichingapac shamun! ¡Chaimanta trompetapi tocashpa macanacuita huillaiyari! Ñucahuan ari nishcata paquishpami ñuca mandashcata mana cazurca.

² Israelcunaca: “¡Ñucanchic Dioslla, cantaca ricsinchicmi!” nishpami mañan.

³ Israelcunaca alli ruhuanataca saquircami. Chaimantami paicunata piñaccuna catishpa llaquichinga.

⁴ Paicunaca manapish ñuca acllashca jatun mandaccunatami churarca. Shuctac mandaccunata churashcatapish ñucaca mana yachashcanichu. Paicunallatac llaqui tucungapacmi cullquimanta, curimanta dioscunata ruhuarca.

⁵ ¡Samariapi tiyac ruhuashca beci diostaca mana ricusha ninichu! Chaimantami ñucaca chaipi causac cancunahuan yallita piñarini. ¿Ima horacamantac jucha illac tucunguichic?

⁶ Cai beci diosca maquillahuan ruhuashcallami. Chaica mana Dioschu. Chaimantami Samariapi tiyac beci diosca ñutuchishca canga.

⁷ Paicunaca huairata tarpushpaca acapana huairatami cosechanga. Ima cosechanapish mana tiyangachu. Trigopish cutachingapac mana tiyangachu. Trigo pucucpipish, caru llacta runacunami micunga.

⁸ ¡Israel llactaca tucuchishcami canga! Ñallami shuctac llactacunapac chaupipica paya manga shina tucunga.

⁹ Paicunallatacmi Asiria llactaman sacha burro shina huichai rirca. Efraín ailluca cuyashcacunatami alquilarca.

¹⁰ Chashna alquilashca cacpipish, ñucami tandachisha. Asha huatacunallatami jatun mandacca llashac cargata apachic shina llaquichinga.

¹¹ Efraín ailluca juchata ruhuangapacmi achca altarcunata ruhuarca. Chai altarcunataca juchata ruhuangapacllami charirca.

¹² Ñucaca achca yachaicunatami quillcachircani. Chaicunataca yangalla cashcatami yuyarca.

¹³ Ñucaman animalta cushpa huañuchishca aichatapish micurcami. Chaicunataca Mandac Dios ñucaca mana munanichu. Cunanca mana allita ruhuashcata yuyarishpami paicunapac juchamanta llaquichigrini. Paicunaca Egiptomanmi cutinga.

¹⁴ Israelcunaca paicunata Ruhuac ñucata cungarishpami, mandana huasicunatarac ruhuarca. Judá llactapi causaccunaca muyundita pircashca llactacunatami achcata ruhuarca. Shina cacpipish, chai llactacunapi ñuca ninata japichicpimi, mandana huasicunapish tucui tucuringa» nircami.