OSEAS 7 - Dios Rimashcata Quillcashcami

Israelcuna mana allita ruhuashcamanta

¹ Israelcunata ñuca jambicpica, Efraín aillupac mana allita ruhuashcapish, Samaria llactapi causaccuna millaita ruhuashcapish ricurinmi. Paicunaca llullaccunami, huasiman yaicushpapish, ñanta pasaccunatapish macashpa shuhuashpami causan.

² Tucui paicuna mana allita ruhuashcata ñuca yuyaipi charicushcataca mana shungupi yuyarinchu. Tucui paicuna mana allita ruhuashcataca ricucunimi. Chai mana allita ruhuashcacunami paicunata chaupinchishpa charicun.

³ Paicunaca millaita ruhuashpami jatun mandacta cushichin. Cutin llullashpaca caishuc mandaccunatami cushichin.

⁴ Paicunaca yallita huainayaccunami. Paicunaca tandata ruhuai callarishpa, tanda punguillingacaman rupac horno shinami.

⁵ Jatun mandacpac fiesta punzhapica, caishuc mandaccunaca vinota ubiashpami unguchirca. Chashna ruhuacpimi, mana cazushpa asiccunahuan maquinacurca.

⁶ Paicunapac shunguca rupac horno shinami. Paicunaca tuta sueñushpa, cayandi tutamanta horno rupacuc shinami, imata ruhuangapac yuyarishpa pacarin.

⁷ Tucui paicunami rupacuc horno shina, paicunapac juezcunataca tucuchirca. Jatun mandaccunapish tucuimi huañurca. Paicunapurapica shucllapish ñucata mañacca mana tiyanchu.

⁸ Efraín ailluca shuctac llactacunahuanmi chapurishca. Shuc ladollata cusashca torta shinami tucushca.

⁹ Shuctac llacta gentecuna paita irquiyachicuctaca mana yachanchu. Yurac accha cashcatapish mana yachanchu.

¹⁰ Israelcunataca paicuna jatun tucushcallatacmi llaquichinga. Shina cacpipish, paicunaca Mandac Dios ñucapacman cutinata mana munanchu. Paitaca mana mashcanchu.

¹¹ Efraín ailluca paloma shinami imatapish mana yachac tucushca. Chaimantami Egiptopi causaccunatapish, Asiria llactapi causaccunatapish ayudachun mañan.

¹² Paicuna chaiman ricpimi, paicunapac jahuapi ñuca linchita shitashpa japisha. Volac animalcunata shinami urmachisha. Paicuna bullashpa shamucucta uyashpami llaquichisha.

¹³ ¡Ñucamanta anchuriccunalla, imachari tucunga! ¡Ñucata mana cazushcamantaca yalli llaquimi japinga! Ñucaca paicunata quishpichimanmi, ashtahuanpish paicunaca ñucata llaquichishpami llullan.

¹⁴ Paicunaca camapi caparicushpapish, mana ñucatachu tucui shunguhuan mañarca. Trigota, llullu vinota tandachingapac chugririshpapish, ñucatami piñachirca.

¹⁵ Ñucami paicunataca yachachircani. Shinallatac paicunapac rigracunatapish sinchiyachircani. Chashna ruhuacpipish, ñucataca mana allitami yuyarca.

¹⁶ Paicuna cutirishpapish mana jahua pachapi causac Diospacman cutirircachu. Ashtahuanpish espadata mana alli shitac shinami llullarca. Jatun tucushpa, mana allita rimashcamantami mandaccunapish espadapi huañurca. Chashna millai cashcamantami, Egipto llactapi causaccunaca burlashpa asingacuna» ninmi.