OSEAS 5 - Dios Rimashcata Quillcashcami

Mandac Dios israelcunata llaquichinamanta

¹ Mandac Diosca: «Curacunalla, israelcunalla, jatun mandacpac huasipi mandashpa tiyaccunalla, caita uyaichicyari. Cancunaca Mizpa llactapica urmachic tuclla shina, cutin Tabor urcupica tuclla shinami carcanguichic. Cancunatami taripashpa llaquichisha.

² Yallita juchata ruhuashpami Sitim pambapi tiyac jutcuta yalli ucuyachic shina ruhuashcanguichic. Chaimantami cancunataca yallita llaquichisha.

³ Ñucaca Efraín aillutaca ricsinimi, Israel aillutaca ricucunimi. Efraín aillulla, cancunaca huainayashcanguichicmi. Israelcunaca mapayashcami.

⁴ Paicunapac shungupi huainayana yuyai tiyashcamantami paicuna ruhuashcacunahuanca mana ñucapacman cuti pudincuna. Chashnami ñucataca mana ricsincuna.

⁵ Israelcunaca jatun tucushpami, paicunapac llaquipacllatac rimaringa. Israelcunapish, Efraín aillupish paicunapac juchallapitacmi mitcaric shina urmanga. Shinallatacmi Judá llactapi causaccunapish urmanga.

⁶ Ovejacunata, vacacunata apashpami, Mandac Diosta mashcanga. Shina mashcashpapish mana taringachu. Paicunamantaca anchurircanimi.

⁷ Paicunaca Mandac Diosta mana cazushpami, shuccunapac huahuacunata charin. Cunanca paicunapish, paicunapac allpapish shuc quillapimi tucuringa.

⁸ ¡Gabaapica cornetapi tocaichicyari! ¡Ramapica trompetapi tocaichicyari! Bet-avenpi caparishpa: “¡Efraín aillulla chucchuichicyari!” nishpa caparichicyari.

⁹ Llaquichi punzhapica Efraín ailluca llaquinayaitami chingaringa. Israelpac aillumanmi ima tucuna cashcataca mana llullashpa huillani.

¹⁰ Judá llactata mandaccunaca linderota yaicuric shinami cancuna. Ñuca yallita piñarishcataca yacuta tallic shinami paicunapac jahuata cachasha.

¹¹ Efraín ailluca shungupi nanarishpa yallita llaquirishcami. Paicunaca yanga dioscunallatami catina yuyarca.

¹² Ñucaca Efraín aillupacca polilla curu shinami casha. Judá llactapi causaccunapacca ismuchishpa tucuchic curu shinami casha.

¹³ Efraín ailluca ungüihuanmi llaquichishca canga. Judá llactapi causaccunataca sisu ungüimi tucuchinga. Chaimantami Efraín ailluca Asiria llactata jatun mandac Jarebman huillachun cachanga. Shina ricpipish, sisu ungüitaca mana jambingachu.

¹⁴ Ñucaca Efraín aillutaca león shinami llaquichisha. Judá llactapi causaccunataca huahua león shinami apasha. Ñucallatacmi paicunataca apa risha. Ñuca maquimanta cacharichicca pi mana tiyangachu.

¹⁵ Paicunallatac juchata ruhuashcata yuyarishpa, ñucapacman cutingacamanmi ñuca causacushcaman risha. Paicunaca llaquirishpami, ñucataca mashcangacuna» ninmi.