OSEAS 4 - Dios Rimashcata Quillcashcami

Mandac Dios israelcunahuan piñarishcamanta

¹ Israelcunalla, Mandac Dios rimashcata uyaichic. Paica cai llactapi causaccunahuan piñarishcami. Cai llactapica cashcata nicpish, Diosta manchacpish, paimanta yachanata munacpish mana tiyanchu.

² Ashtahuanpish llaquichina, llullana, huañuchina, shuhuana, huainayana yuyaillami tiyan. Punzhantami huañuchin.

³ Chaimantami cai llactaca duelo churanata churarishca shina llaquilla canga. Cai llactapica tucuimi huañunga. Sacha animalcunapish volac animalcunapish, mama cuchapi causac challuacunapish huañungami.

Mandac Dios curacunahuan piñarishcamanta

⁴ Mandac Diosca: «¡Curacunalla, cancunatami juchanchini! Chaimanta ama caishuc chaishuc juchanchinacuichicchu.

⁵ Punzha pachami llaquipi urmanguichic. Ñucamanta huillacpish cancunahuanmi llaquipi urmanga. Cancunapac mamapish chingaringami

⁶ Ñuca acllashcacunaca mana yachashcamantami chingaringa. Cancunataca ñuca yachachishcata mana chasquishcamantami curacunapuramanta anchuchisha. Ñuca mandashcacunata cungarishcamantami ñucapish cancunapac huahua huahuacunata cungarisha.

⁷ Curacuna ashtahuan achca tucushpaca, ashtahuan juchallishpami ñucata piñachirca. Chaimantami paicuna alli nishca canata anchuchishpa, pingaichishpa asinata ruhuasha.

⁸ Curacunaca ñuca acllashcacuna juchamanta ofrendata cushcacunahuanmi causancuna. Chaimantami ashtahuan juchallichun munancuna.

⁹ Gentecunapish, curacunapish chashnallatacmi can. Paicuna ima shina ruhuashpa causashca shinallatacmi llaquichisha.

¹⁰ Mandac Dios ñucata saquishcamantami micushpapish mana sacsanga. Huahuata charinata munashpapish mana chari pudingachu.

¹¹ Huainayashpa, llullu vinota, pucushca vinota ubiashpami alli yuyaita chingachin.

¹² Ñuca acllashcacunaca imatapish yachangapacmi paicunapac yanga diosman tapun. Chai caspihuanmi ima tucunata huillasha. Paicunataca huainayana yuyaimi pandachin. Chai shina huainayashpa causangapacmi Mandac Diosmanta anchurin.

¹³ Urcu jahuacunapimi animalta cushpa huañuchin. Loma jahuapi, encina, álamo, olmo yura ucucunapimi inciensotapish rupachin. Chaimantami cancunapac ushicunapish, nueracunapish huainayan.

¹⁴ Can caricunallatacmi huainayac huarmicunahuan huainayanguichic. Chai huarmicunahuami animalta cushpa huañuchinguichic. Chaimantami cancunapac ushicunatapish, nueracunatapish chashna huainayashcamantaca mana llaquichisha. Chaimantami gentecunaca mana yachashcamanta pandaringa.

¹⁵ Israelcunalla, cancuna huainayacpipish, Judá llactapi causaccuna mana juchallishpami alli canman. ¡Gilgalmanpish ama yaicuichicchu! Bet-avenmanpish ama huichai richicchu. Shinallatac ama: “¡Mandac Diospac shutipimi ari nini!” ninguichicchu.

¹⁶ Israelcunaca quita vaquilla shinami mana cazun. ¿Cunanca Mandac Diosca malta ovejacunata shinachu, jatun pambapi michinga?

¹⁷ Efraín ailluca yanga dioscunatami mañai callarishca. ¡Paitaca saquilla!

¹⁸ Paicunaca machana yacu tucuricpipish, huainayashpami catin. Paicunata mandaccunapish pingaichishca canatami ashtahuan munan.

¹⁹ Chaimantami paicunataca huaira aparinga. Animalcunata Diosman cushpa huañuchishcamantami pingai tucunga.