OSEAS 3 - Dios Rimashcata Quillcashcami

Oseasmantapish, huainayac huarmimantapish

¹ Mandac Diosca cutin rimashpaca: «Shuc cuyashcata charic huainayac huarmita cuyagri. Paitaca ñuca israelcunata ima shinami cuyani, chashnatac cuyai. Israelcuna shuctac dioscunata mañacucpipish, chaquishca uvas tortata chai dioscunaman cucpipish cuyanimi» nirca.

² Shina nicpimi, chai huarmitaca chunga pichca ciclos cullquihuan, shuc homer chaupi cebadahuan randircani.

³ Chashna randishpami: «Canca tauca huatacunatami ñucahuan cangui. Ama huainayanguichu, shuctac carihuanpish ama chayaringuichu. Chaicunata mana ruhuacpica, ñucaca canhuami casha» nircani.

⁴ Unaitami israelcunaca jatun mandactapish, quipa mandactapish mana charinga. Shinallatac rumi dioscunapish, efod nishcapish, Terafín dioscunapish, Diosman animalta cushpa huañuchinapish mana tiyangachu.

⁵ Chai quipami, israelcunaca cutishpa, paicunata Mandac Diostapish, jatun mandac Davidtapish yuyaringa. Tucuri punzhacunami allita japingapac Mandac Diospacman chucchushpa cuchuyanga.