OSEAS 2 - Dios Rimashcata Quillcashcami

Mandac Dios mana cazuccunata llaquichishcamanta

¹ Cancunaca cancunapac huauquicunataca: «Mana Dios acllashcachu» ninguichicmi. Cutin cancunapac panicunataca: «Mana llaquishcachu» ninguichicmi.

² ¡Cancunapac mamataca juchanchichic paita juchanchichic! Paica mana ñuca huarmichu, ñucapish mana paipac cusachu cani. ¡Huainayanata saquichun! ¡Paipac pechomanta cuyashcacunata anchuchichun!

³ Pacta sajuarishca punzhapi ima shina lluchulla cashca shinallatac saquiman. Pacta shitashca pambata shina ruhuashpa yacunayaihuan huañuchiman.

⁴ Paicunapac huahuacunaca huainayac huarmipac huahuacunami. Chaimanta paicunatapish mana llaquishachu.

⁵ Paicunapac mamaca huainayarcami. Paicunata sajuaricca pingaitami ruhuarca. Paica: “Ñuca cuyashcacunatami catisha. Paicunaca micunatapish, yacutapish, millmatapish, linotapish, aceitetapish, ima ubianacunatapish cunmi” nircami.

⁶ Chaimantami pai purina ñanpica cashacunata churasha. Shinallatac maita mana llucshipacta ruhuashpami, muyundita jarcasha.

⁷ Paica cuyashcacunata cati rishpapish mana japingachu. Mashcashpapish mana taringachu. Chaimantami paica: «Ñaupa cusapacman cutisha. Paihuanca allimi causarcani, mana cunan punzhapi shinachu carcani» ningami.

⁸ Paica ñucallatac trigota, llullu vinota, aceiteta cuc cashcataca cungarircami. Ashtahuanpish ñuca cushca cullquita, curitaca Baal diosmanmi curca.

⁹ Chaimantami trigotapish, uvastapish pucuna punzhacunapi quichusha. Paipac churanata ruhuana millmatapish, linotapish quichushami.

¹⁰ Cunanca, pai mana pingac cashcatami paipac cuyashcacunapac ñaupapimi ricuchisha. Ñuca maquimantaca pipish paitaca mana cacharichi pudingachu.

¹¹ Paimanta cushicuita anchuchishpami, paipac fiesta punzhacunatapish, llullu quilla punzhacunatapish, samana punzhacunatapish tucuchisha.

¹² Paipac uvas chagratapish, higo yuracunatapish tucuchishami. Chaicunatami paica: «Ñuca cuyashcacuna ñucaman pagashcami» nirca. Chai yuracunataca yanga yuracunata ruhuasha. Chaicunataca sacha animalcunami micunga.

¹³ Baal diosman fiestata ruhuashpa, inciensota rupachishpa, alli ricuringapac zarcillocunata, sumac huallcacunata churarishpa, paipac cuyaccunata catishpa, ñucata cungarishcamantami chashna llaquichisha. Chaitaca Mandac Dios ñucami nini.

Mandac Dios Israel llactata cuyashcamanta

¹⁴ Ñucami paitaca shungupi rimashpa, ari nichishpa shitashca pambaman pushasha.

¹⁵ Chaipimi paipac uvas chagrataca cutichisha. Chaipimi Acor pugru pambataca cushicushpa, shuyana pambata ruhuasha. Chashna ruhuacpimi, huambrarac cashca punzhacunapi shina, Egipto llactamanta llucshimui punzhapi shina cantanga.

¹⁶ Chai punzhapica “Ñuca cusa” ningami. Mana ashtahuan: “Ñuca Baal” ningachu.

¹⁷ Baal dios nishpa rimanataca cungaringacunami. Chai diostaca mana ashtahuan yuyaringachu.

¹⁸ Chai punzhapimi canta ama llaquichichun sacha animalcunahuanpish, volac animalcunahuanpish, allpata aisaric animalcunahuan ari nisha. Chai llactapica jatun macanacuita chingachishpami flechacunatapish, espadacunatapish chingachisha. Chashna ruhuacpimi, canca mana manchashpa, cushilla causangui.

¹⁹ Israel llactalla, cunanca canhuanmi huiñai huiñaipac cazarasha. Canman cashcata ruhuangapac, allita mandangapac, sumac cangapac, llaquic cangapacmi cazarasha.

²⁰ Tucuita pactachingapacmi canhuan cazarasha. Shina ruhuacpimi, Mandac Dios ñucata ricsingui.

²¹ Chai punzhapica Mandac Dios ñuca jahua pachata mañacpica, jahua pachaca cai pacha mañashcata uyangami.

²² Chaimantami allpapica trigopish, uvaspish, olivospish pucunga. Tucui chai granocunaca Jezreelpacmi canga.

²³ Israelcunataca ñucapac cachunmi tarpuc shina, cai llactapica churasha. Shina churashpami, Lo-ruhamataca llaquisha. Lo-ammitaca: «¡Canca ñuca acllashcami cangui!» nishami. Paica: «¡Ñuca Mandac Diosmi cangui!» ningami.