OSEAS 10 - Dios Rimashcata Quillcashcami

Ruhuashcalla dioscunapac altarta tigrachishcamanta

¹ Israel llactaca pangasapa uvas yura shinami, quiquin llactaman achca granota pucuchin. Granopish achcami tiyarca. Chashna achca grano tiyashcamantami achca altarcunata ruhuarca. Cutin allpapi achca grano pucucpica, ashtahuanmi sumac yanga dioscunata ruhuarca.

² Israelcunaca ishcai shungumi. Chaimantami cunanca juchanchishca canga. Mandac Diosmi paicunapac altarcunatapish, yanga dioscunatapish ñutuchishpa tucuchigrin.

³ Chaimantami paicunaca: «Mandac Diosta mana manchashcamantami ñucanchicca jatun mandacta mana charinchic. Jatun mandac tiyashpapish, ¿imatatac ñucanchicmanta ruhuai pudingayari?» ningami.

⁴ Paicunaca yangallami rimancuna. Yangallami imata pactachingapac ari ninacun. Chaimantami llaquicunaca yapushca pambacunapi jayac ajenco huiñac shina, achca miranga.

⁵ Samariapi causaccunaca Bet-avenpi tiyac beci dioscunatami manchanga. Chaipi causaccunapish duelo churanatami churaringa. Chai beci diosta sumaimanami cangui nic curacunapish chai dioscunata apacpi, yallitami huacanga.

⁶ Chai beci diostaca jatun mandacman cungapacmi Asiria llactaman apanga. Efraín ailluca pingaichishcami canga. Israelcunaca mana alli yuyaita cushcamantami pingai tucunga.

⁷ Samaria llactata jatun mandacca yacupi huambucuc puscu shinami chingaringa.

⁸ Lomacunapi tiyac israelcuna juchallina altarcunapish tucuringami. Chai altarcuna jahuapica cardoscuna, cashacunami huiñanga. Chaimantami urcucunataca: «¡Ñucanchicta tapaiyari!» ninga. Cutin lomacunataca: «¡Ñucanchic jahuapi urmaiyari!» nishpa caparinga.

Israelcunata Mandac Dios juchanchishcamanta

⁹ Mandac Diosca: «Israelcunalla, Gabaapi causacui punzhacunamanta pachami juchata ruhuarcanguichic. Chaipimi causashpa caticunguichic. Gabaapi mana allita ruhuaccunataca, ¿manachu macanacuica japinga?

¹⁰ Paicunataca ñuca nishca punzhami llaquichisha. Paicuna yallita millaita ruhuashcamantaca shuctac llacta gentecunami tandanacushpa llaquichingapac shamunga.

¹¹ Efraín ailluca trillana pambapi shayacuc vaquilla shinami carca. Ashtahuanpish ñucami cungapi yugota churasha. Ñucami Efraín aillutaca yugosha. Judá aillucunami yapunga. Jacobomi allpata ñutuchinga.

¹² Chaimanta cunanca, alli muyuta tarpuc shina cashcata ruhuaichic. Mandac Diospac cuyaitaca cosechac shina japichic. Cunan punzhacunaca Mandac Dios ñucata mashcana punzhacunami. Chaimanta allpata tarpungapac allichichic. Ñuca shamushpa cashcata ruhuanata yachachingacamanmi chashna allichirina canguichic.

¹³ Cancuna tarpuc shina mana allita ruhuashpaca, mana allitami cosecharcanguichic. Shinallatac imapish pucushcata micuc shinami llullashcanguichic. Cancunaca, cancunapac ruhuashcapi, achca sinchi runacunapimi shunguta churashpa causashcanguichic.

¹⁴ Chaimantami cancunapac llactacunapica yallita caparinacui tiyanga. Tucui jatun torrecunami urmanga. Bet-arbel llactapi causaccunahuan macanacui punzhapi, jatun mandac Salmán mamacunatapish, paipac huahuacunatapish ñutuchishpa tucuchishca shinami tucuchinga.

¹⁵ Bet-elpi causaccunalla, cancuna yalli mana allita ruhuashcamantaca chashnallatacmi llaquichinga. Israelcunata jatun mandactaca manarac alli punzhayacpimi huañuchinga» ninmi.