NÚMEROS 8 - Dios Rimashcata Quillcashcami

Lamparapi ninata japichinamanta

¹ Mandac Diosca Moisestaca:

² «Aarontaca: “Candeleropi cac canchis lamparacunata japichishpaca, ñaupa ladota achicyachichun churangui” nishpa, mandangui» nirca.

³ Chaimantami Aaronca Mandac Dios Moisesta mandashca shinallatac lamparacunata japichishpa, ñaupa ladota achicyachichun churarca.

⁴ Chai candelabroca curita martillohuan huactashpa ruhuashcami carca. Chaica Mandac Dios Moisesta mandashca shina, chaquipish, lamparacunata churanapish curita martillohuan huactashpa ruhuashcami carca.

Levitacunata Diospacllata ruhuanamanta

⁵ Mandac Dios Moisesta rimashpaca:

⁶ «Levitacunataca israelcunamanta chicanyachishpa, mapa illacllata ruhuangui.

⁷ Paicunata mapa illacta ruhuangapacca cashna ruhuangui: Mapa illacta ruhuac yacuta paicunapac jahuapi chirapangui. Paicunapac cuerpotaca cuchillohuan aspishpa, churanatapish tacshachun mandangui. Chashna ruhuacpimi, paicunaca mapa illac tucunga.

⁸ Chaimantaca shuc huagratapish, alli harinatapish aceitehuan masashpami apamuna can. Juchata pichachunca shuc huagratami apamuna can.

⁹ Shinallatac levitacunatapish, israelcunatapish ñucahuan tupana huasi ñaupaman tandachingui.

¹⁰ Ñuca ñaupapi levitacuna shayaricpica, israelcunami paicunapac uma jahuapi maquita churanga.

¹¹ Aaronca levitacunataca israelcunapac ofrendata shina ñucaman cunga. Chashna cucpimi, paicunaca Mandac Dios ñucata servinga.

¹² Chai quipami levitacunaca becicunapac uma jahuapi maquita churanga. Chashna churacpica, shuc becitaca juchata pichachun, shuctaca levitacuna jucha illac saquirichun, ñucaman cushpa tucui rupachingui.

¹³ Chai quipaca Aaronpac, paipac churicunapac ñaupaman levitacunata pushamushpa, Mandac Dios ñucaman ofrendata shina cungui.

¹⁴ Levitacuna ñucapaclla cachunmi paicunataca israelpuramanta chicanyachina cangui.

¹⁵ Chashnami levitacunaca ñucahuan tupana huasipi servi callaringa. Paicunaca mapa illacta ruhuashpa, ñucaman cushca ofrenda shinami canga.

¹⁶ Levitacunaca israelpuramanta ñucapaclla chicanyachishcami cancuna. Paicunataca tucui israelcunapac punta churicunapac randimi ñucapaclla cachun chicanyachircani.

¹⁷ Tucui israelcunapac punta churicunapish, animalcunapish tucuimi ñucapaclla can. Paicunataca ñuca Egipto llactapi punta churicunatapish, punta animalcunatapish huañuchicushpami, paicunataca ñucapaclla cachun chicanyachircani.

¹⁸ Levitacunataca tucui israelcunapac punta churicunapac randimi acllarcani.

¹⁹ Ñucami levitacunataca israelpuramanta acllashpa, Aaronman, paipac churicunaman ñucahuan tupana huasipi israelcunapac randi servichun curcani. Paicunaca israelcuna ñucapaclla ucuman yaicushpa, llaquita apanatami jarcanga» nirca.

²⁰ Moisespish, Aaronpish, tandanacushca israelcunapish Mandac Dios levitacunata imata ruhuachichun Moisesta mandashca shinallatacmi ruhuarca.

²¹ Levitacunaca mapa illac tucungapacmi paicunapac churanatapish tacsharca. Chashna ruhuacpimi, Aaronca paicunataca Mandac Diosman ofrendata shina curca. Chaimantami paicunaca juchata pichachun Diosman ofrendata curca.

²² Mandac Dios Moisesta mandashca shinallatacmi levitacunaca Dios-huan tupana huasipi Aaronpac, paipac churicunapac ñaupapi servingapac yaicurca.

²³ Chashna cacpimi, Mandac Diosca Moisestaca:

²⁴ «Levitacunaca caicunatami ruhuana can. Ishcai chunga pichca huatayuc levitacunaca ñucahuan tupana huasipimi servinga.

²⁵ Cutin pichca chunga huatayuc levitacunaca ña mana servingapac yaicunachu can.

²⁶ Ashtahuanpish paicunapac huauquicunahuanmi ñucahuan tupana huasipi ricuccunata ayudanga. Mana servinachu can. Chashnami levitacunata servichun churana cangui» nirca.