NÚMEROS 6 - Dios Rimashcata Quillcashcami

Nazareo runa imata ruhuanamanta

¹ Mandac Dios Moisesta rimashpaca:

² «Israelcunamanta cari cashpa, huarmi cashpapish nazareo tucushpa, ñucapaclla chicanyachishca cashpaca,

³ vinotapish, machana yacutapish, jayac vinotapish, jayac machana yacutapish, uvas capishca yacutapish mana ubianachu can. Pucushca uvastapish, chaquishca uvastapish mana micunachu can.

⁴ Ima punzhacaman nazareo tucushca pactangacamanmi uvas chagramantaca uvas muyutapish, uvas caratapish mana micuna can.

⁵ Ima punzhacaman nazareo tucushca pactangacamanmi acchata mana pitina can. Nazareo tucushpa, Diospaclla chicanyarishca punzhacuna pactangacamanmi jucha illac canga, shinallatac acchatapish huiñachun saquina can.

⁶ Mandac Diospac chicanyarishca punzhacunapica huañushcapi mana tuparinachu can.

⁷ Diospaclla chicanyachishca cashcata acchapi apashca cashcamantaca paipac taita cacpipish, mana cacpipish, huauqui cacpipish, pani cacpipish, huañushcapi tuparishpa, mana mapayanachu can.

⁸ Nazareo tucushca tucui punzhacunami Diospaclla chicanyachishca cana can.

⁹ Maijan cashpapish cungailla paipac cuchupi huañucpi, tuparishpa Diospaclla cashcata ricuchic uma acchata mapayachishpaca, chuyayana punzhapimi acchata rutuchina can. Chaitaca canchisniqui punzhapimi ruhuana.

¹⁰ Ña pusac punzhapica, ishcai urpita, mana cashpaca ishcai llullu palomata Dios-huan tupana huasi yaicunapi curaman cuchun.

¹¹ Chaipimi curaca shuctaca huañushcapi tuparishpa juchallishcata pichachun, cutin shuctaca Diosman cushpa tucui rupachinga. Chashna ruhuashpami paipac acchataca cutinllatac Diospaclla cachun huiñachi callaringa.

¹² Chai quipaca cutinmi nazareo tucushpa, Diospaclla chicanyarishpa causai callaringa. Chaipacca shuc huatayuc ima mana tucushca cari ovejatami huañushcapi tuparishpa juchallishcata pichachun Diosman cunga. Pai mapayashcamantaca ñaupa punzhacunapi nazareo tucushcaca yangami saquiringa.

¹³ Nazareo tucushca punzhacuna pactacpica, chai nazareoca cai mandashcacunatami ruhuana can. Dios-huan tupana huasi yaicunaman shamushpami,

¹⁴ Mandac Diosmanca shuc huatayuc ima mana tucushca cari ovejata tucui rupachichun cunga. Cutin ima mana tucushca shuc huarmi ovejataca juchata pichachun Diosman cungapac, ima mana tucushca cari ovejataca Dios-huan alli tucungapacmi cuna can.

¹⁵ Chaipac jahuapica shuc uchilla tazapi ñuto harinahuan aceitehuan ruhuashca levadura illac tortata, levadura illac galletata aceitehuan chapushpami apamuna can. Chashnallatac granotapish, tallina vinotapish apamuna can.

¹⁶ Chaicunataca curami Mandac Diospac ñaupapi juchata pichachun cunga. Chashnallatac Diosman cushca tucui rupachina animaltapish rupachingami.

¹⁷ Dios-huan alli tucungapacca cari ovejatami levadura illac taza tortahuan cuna can. Curallatacmi granotapish, tallina vinotapish cuna can.

¹⁸ Chai quipaca nazareo tucushca runami Dios-huan tupana huasi yaicunapi acchata pitinga. Chaimantaca Dios-huan alli tucungapac Diosman carashcata rupacuc nina ucupimi churanga.

¹⁹ Diospaclla cashcata ricuchic acchata pitishca quipaca curami cari oveja rigra aicha yanushcata levadura illac tortata tazamanta japishpa, levadura illac galletatapish nazareo tucushca runapac maquipi churanga.

²⁰ Chaicunataca curallatacmi Mandac Diospac ñaupapi cuyuchishpa Diosman cunga. Chaicunaca Diospaclla chicanyarishca cashcamantami curapaclla canga. Diospac ñaupapi cuyuchishpa cushca pecho aichapish, alzashpa Diosman cushca rigra aichapish curapacllami canga. Chai quipami nazareo runaca vinota ubianga.

²¹ Caicunami nazareo tucushpa, Mandac Diosman ima shina cuna cashcataca ruhuanaca. Caicunapac jahuapi imata ashtahuan cusha nishpaca cunallami. Diospaclla tucushpa imatapish ruhuasha niccunaca nazareocunata imata ruhuachun mandashca shinallatacmi tucuita ruhuana can» nirca.

Curacuna bendiciashcamanta

²² Mandac Dios Moisesta rimashpaca:

²³ «Aaronpish, paipac churicunapish rimashpaca:

²⁴ “Mandac Dios bendiciashpa punzhanta cuidachun.

²⁵ Mandac Dios cuyashpa cushichichun.

²⁶ Mandac Dios cushi causaita cuchun nishpa israelcunata bendicianguichic” nishpa mandarca.

²⁷ Ñuca shutipi israelcunata bendiciacpimi, ñucapish paicunataca bendiciasha» nirca.