NÚMEROS 5 - Dios Rimashcata Quillcashcami

Tucui mapacunata anchuchinamanta

¹ Mandac Diosca Moisestaca:

² «Israelpuramanta maijan lepra ungüihuan cacpi, yurac yacu cacharirishca cacpi, huañushcapi tuparishpa mapayashca cacpica, carpa huasimanta caruman llucchishpa cachachun mandangui.

³ Huarmicunatapish, caricunatapish chashna mapayashcataca llucchishpa cachacpimi, ñuca cancunapac chaupipi causana carpa huasica mapa illac canga» nirca.

⁴ Israelcunaca Mandac Dios Moisesta mandashca shinallatacmi chashna mapayashcacunataca carpa huasimanta llucchishpa cacharca.

Pitapish mana llaquichinamanta

⁵ Mandac Dios Moisesta rimashpaca:

⁶ «Israelcunamanta maijan huarmipish, caripish ñucata mana cazushpa, shuccunata llaquichicca juchayucmi tucun.

⁷ Chai juchata huillashpa, llaquichishca runaman pagana cashcata cushpapish chungamanta ishcaihuan yallitami cuna can.

⁸ Chai llaquichishca runa mana tiyacpi, cuchulla familiapish mana tiyacpica, Mandac Dios ñucamanmi cuna can. Juchamanta ovejata curaman cushca jahuami chashna cuna can.

⁹ Israelcuna ñucaman cungapac chicanyachishcaca curapacllami canga.

¹⁰ Imatapish ñucapaclla cachun chicanyachishcaca curapacmi canga. Maijancuna curaman cushcaca, curapacllatacmi canga» nirca.

Cusandi huarmindi celanacucpi, imata ruhuanamanta

¹¹ Mandac Dios Moisesta rimashpaca:

¹² «Maijanpac huarmi cusata mana cazushpa, huainayashpa puricucpi,

¹³ maijan cari paihuan chayaricpi, mana yacharishca cacpipish mapayashcami saquirin. Chaita pipish mana japishca cacpi,

¹⁴ cusaca huarmita celangami. Shuc-huan chayarishpa mapayashca cacpi, mana cashpaca manapish shuc-huan cacpi, yanga juchanchicushpaca,

¹⁵ huarmita curapacman apashpami, ishcai kilo cebada ofrendata cuna can. Celanacushcamanta cushca cashcamantami chai ofrendapica aceitetapish, inciensotapish mana churana can. Chai cushcaca juchallishcata mana juchallishcata ricuchingapacmi ñucaman cushca can.

¹⁶ Chai huarmitaca curami Mandac Dios ñucapac ñaupaman chayarichun mandanga.

¹⁷ Chai quipami curaca allpa vasopi ñucapaclla chicanyachishca yacuta japishpa, ñucahuan tupana huasi ucu pambamanta ñuto allpata japishpa, chai yacupi churanga.

¹⁸ Chaimantaca curami huarmitaca Mandac Dios ñucapac ñaupapi uma acchata cacharinga. Juchallishcamanta cuna ofrendatami chai huarmipac maquipi churanga. Chai ofrendami juchallishcatapish, mana juchallishcatapish ricuchinga. Cutin curaca llaquichic jayac yacutami maquipi charicunga.

¹⁹ Chai quipaca huarmitaca: “Can shuctac carihuan mana chayarishca, shinallatac cusapac randi shuc carihuan mana mapayashca cacpica, cai llaquichic jayac yacuta ubiacpipish, imata mana ruhuangachu” ninga.

²⁰ Ashtahuanpish cusapac randi shuctac carihuan chayarishpa mapayashca cacpica,

²¹ (curallatacmi chai huarmitaca: “Ima llaquipish japichun, Mandac Dios mana alli nishpa, huicsata punguillichishpa, huahuatapish mana chari pudicta ruhuachun ninga.)

²² Cai llaquichic yacu huicsaman yaicushpami huahuatapish mana charicta ruhuashpa, huicsatapish punguillichinga” nishpa gentecunapac ñaupapi ari nichinga. Shina nicpimi, chai huarmica: “Chashna cachun, chashna cachun” ninga.

²³ Curaca shuc libropimi chai llaquichishca cachun nishcataca quillcanga. Chai quillcashcataca jayac yacuhuanmi pichanga.

²⁴ Chai quipaca chai huarmimanmi chai llaquichic jayac yacuta ubiachinga. Shina ubiachicpimi, chai jayac yacuca huarmipac huicsaman llaquichingapac yaicunga.

²⁵ Celashcamanta cushca ofrendata huarmipac maquimanta cura japishpa, altar ñaupapi cuyuchishpami Mandac Dios ñucaman cunga.

²⁶ Chai quipami chai yuyarichic ofrendata japishpa, altar jahuapi rupachinga. Chai quipaca chai yacutaca huarmimanmi ubiachinga.

²⁷ Chashna ubiachicpimi, chai huarmi cusapac randi shuctac carihuan chayarishpa mapayashca cacpica, llaquichingapac huicsaman yaicunga. Chashna llaquichicpimi, mana huatata chari pudishpa, huicsapish punguillinga. Chaimantaca paica gentecunapac ñaupapi mana alli nishcami canga.

²⁸ Ashtahuanpish chai huarmi shuctac carihuan chayarishpa, mana mapayashca cacpica, ima mana tucushcachu nishcami canga. Shinallatac huahuatapish charingami.

²⁹ Caica shuc huarmi cusapac randi shuctac carihuan chayarishpa mapayacpi,

³⁰ mana cashpaca cusa celacpi, imata ruhuana cashcata mandashcami. Chai huarmita Mandac Dios ñucapac ñaupapi shayachishpami curaca tucui cai mandashcata ruhuanga.

³¹ Cusaca mana juchanchishcachu canga. Huarmimi juchanchishca cashcamanta llaquita apanga» nirca.