NÚMEROS 4 - Dios Rimashcata Quillcashcami

Levitacuna servinamanta

¹ Mandac Dios Moisestapish, Aarontapish rimashpaca:

² «Leví aillumanta Cohatpac huahua huahuacunataca ailluta, huasi ucupurata catishpa yupangui.

³ Ñucahuan tupana huasipi servic levitacunataca quimsa chunga huatayucmanta pichca chunga huatayuccaman yupangui.

⁴ Cohatpac churicunaca ñucahuan tupana huasipimi ñucapaclla chicanyachishca ucupi servinga.

⁵ Israelcuna shuc llactaman rigricpica, Aaronmi paipac churicunahuan pañota uricuchishpa, mandashcacunata huacaichina Arcata pilluchinga.

⁶ Chai jahuapica delfín carahuan catashpa, morado pañohuan jahuata catachishpami, huanduna varata churanga.

⁷ Tandata churana miza jahuapica azul pañota tendishpa, chai jahuapi platocunata, cucharacunata, tallina vinota, vasocunata, jarrocunata, punzhanta ñucapac ñaupapi churana tandatapish churanga.

⁸ Chai jahuapica sani puca pañohuan catashpa, chai jahuataca delfín carahuan catashpami huanduna varata churanga.

⁹ Chai quipaca azul pañohuan achicyachic candelabrota, mechacunata pitinacunandi, platillocunata, aceiteta churanacunami catanga.

¹⁰ Tucui chaicunataca delfín carahuan catashpa, huanduna vara jahuapi churanga.

¹¹ Curi altartapish azul pañohuan catashpa, chai jahuata delfín carahuan catashpami huanduna varata churanga.

¹² Ñucahuan tupana huasipi imalla ruhuanacunata azul pañopi churashpa, jahuataca delfín carahuan catashpami huanduna vara jahuapi churanga.

¹³ Rupachina altarmanta uchupata pichashpa, chai jahuataca morado pañohuan tapanga.

¹⁴ Chashna tapashpa, chai jahuapi altarpi imalla ruhuanacunatami churanga. Nina churanacunatapish, ganchocunatapish, palacunatapish, ima shuccunatapish churashpami, delfín carahuan catashpa, huanduna varata churanga.

¹⁵ Aarón paipac churicunahuan tucui ñucapaclla chicanyachishcacunata catashpa, shuc llactaman rigricpimi, Cohatpac churicunaca apangapac cuchuyanga. Shina apashpapish, ñucapaclla caccunataca mana tuparinachu can. Tuparishpaca huañungami. Caicunami Cohatpac churicuna ñucahuan tupana huasipi ruhuanaca can.

¹⁶ Aaronpac churi Eleazarmi achicyachina aceitetapish, mishquilla ashnacuc inciensotapish, punzhanta cushca tandatapish, ñucahuan tupana huasitapish, chaipi tiyac ñucapaclla chicanyachishcatapish cuidanga» nirca.

¹⁷ Mandac Dios Moisestapish, Aarontapish rimashpaca:

¹⁸ «Levitapuramanta Cohatpac aillucuna ñucapaclla pushtuman cuchuyashpa huañuchunca, ama saquinguichu.

¹⁹ Ñucapaclla pushtuman paicuna cuchuyashpa, ama huañuchunca, Aaronta, paipac churicunata chaipi imata ruhuachun mandangui.

²⁰ Paicunaca ñucapaclla chicanyachishcataca mana ricunachu can. Chaita ricushpaca huañungami» nirca.

Gersonpac churicuna imata ruhuana cashcamanta

²¹ Mandac Dios Moisesta rimashpaca:

²² «Gersonpac churicunataca ailluta, huasi ucupurata catishpa yupangui.

²³ Ñucahuan tupana huasipi servichunca quimsa chunga huatayucmanta pichca chunga huatayuc runacunacaman yupangui.

²⁴ Gersonpac aillucunaca caicunatami ruhuana can:

²⁵ Ñucapaclla ucuta jarcachishca pañotapish, ñucahuan tupana huasitapish, jahuata catashcatapish, chai jahuata catashca delfín caratapish, chai carpa huasi jarcachishca pañotapishmi apanga.

²⁶ Shinallatac ñucahuan tupana huasi canzha pamba muyundi jarcachishcatapish, chai pungu jarcachishca pañotapish, chaita huarcuna huascatapish, tucui chai ucupi ñucapacta ruhuangapac tiyaccunatapishmi apanga.

²⁷ Aarón, paipac churicuna mandacpimi, Gersonpac churicunaca servinga, imata ruhuana cashcatapish ruhuanga.

²⁸ Caicunatami Gersonpac churicunapac aillucunaca ñucahuan tupana huasipi ruhuanga. Paicunataca Aaronpac churi Itamarmi mandanga.

Meraripac churicuna servinamanta

²⁹ Meraripac churicunataca ailluta, huasi ucupurata catishpa yupangui.

³⁰ Ñucahuan tupana huasipi serviccunataca chunga huatayucmanta pichca chunga huatayuc runacaman yupangui.

³¹ Paicunaca caicunatami ñucahuan tupana huasipi ruhuana can: Paicunami ñucahuan tupana huasi tablacunatapish, quingraiman churana caspicunatapish, pilarcunatapish, basacunatapish apanga.

³² Shinallatac chai muyundi pamba jarcachishca pilarcunatapish, basacunatapish, ishtacacunatapish, huascacunatapishmi apanga. Tucui minishtishcacunatapish shuc pangapi quillcangui.

³³ Caicunami Meraripac aillumanta churicunaca ñucahuan tupana huasipi ruhuanaca can. Paicunataca Aaronpac churi Itamarmi mandanga» nirca.

Mashna huatayuc levitacuna servina cashcamanta

³⁴ Moisesca Aaronhuan, tandanacushca israelcunata pushaccunahuanmi Cohatpac aillucunataca huasi ucupurata catishpa yuparca.

³⁵ Dios-huan tupana huasipi serviccunataca quimsa chunga huatayucmanta pichca chunga huatayuccamanmi yuparca.

³⁶ Paicunapac ailluta catishpa yupacpica, ishcai huaranga canchis patsac pichca chungami carca.

³⁷ Caicunami Dios-huan tupana huasipi servic Cohatpac churicunamantaca carca. Moisespish, Aaronpish Mandac Dios nishca shinami yuparca.

³⁸ Gersonpac ailluta, huasi ucupurata catishpa,

³⁹ quimsa chunga huatayucmanta pichca chunga huatayuc runacaman yuparca. Paicunami Dios-huan tupana huasipi servingapac carca.

⁴⁰ Paicunapac ailluta, huasi ucupurata catishpa yupashcaca ishcai huaranga sucta patsac quimsa chungami carca.

⁴¹ Caicunami Mandac Dios Moisesta, Aaronta nishca shinallatac Dios-huan tupana huasipi servigricuc Gersonpac churicunaca carca.

⁴² Meraripac ailluta, huasi ucupurataca

⁴³ quimsa chunga huatayucmanta pichca chunga huatayuc runacamanmi yuparca. Tucui paicunami Dios-huan tupana huasipi servingapac carca.

⁴⁴ Tucui paicunapac ailluta catishpa yupashcaca, quimsa huaranga ishcai patsacmi carca.

⁴⁵ Caicunami Mandac Dios Moisesta, Aaronta yupachun nishca Merari runapac aillumantaca carca.

⁴⁶ Levipac ailluta catishpa, huasi ucupurata catishpa Moises-huan Aaronhuan shinallatac israelcunata pushaccunahuan yuparca.

⁴⁷ Quimsa chunga huatayucmanta pichca chunga huatayuc runacamanmi Dios-huan tupana huasi ucupi servichun, shinallatac apana cacpica apachun yupashca carca.

⁴⁸ Paicunaca pusac huaranga pichca patsac pusac chungami carca.

⁴⁹ Paicunaca Mandac Dios Moisesta mandashca shinami, cada quiquin imata ruhuana cashcata ruhuachun, apana cacpica, apachun yupashca carca.