NÚMEROS 36 - Dios Rimashcata Quillcashcami

Huarmicunaman allpata cunamanta

¹ Joseca Manasespac taitami carca. Manasesca Maquirpac taitami carca. Maquirca Galaadpac taitami carca. Chai Galaadpac huahua huahuapuramanta cac ailluta pushaccunami Moisespacman, israelcunata pushaccunapacman rishpaca:

² —Mandac Diosca ñucanchic mandac Moisestami ñucanchic israelcunaman suerteta ruhuashpa, allpata chaupichun mandarca. Ñucanchic aillupuramanta Zelofehadpac allpata paipac ushicunaman cuchun mandarca.

³ Shina cacpipish, chai huarmicuna caishuc aillupuramanta israelcunahuan cazaracpica, chai allpaca maijanhuan cazarashca cashca aillupacmi tucunga. Shina ruhuashpaca, ñucanchic taitamanta japishca allpatami quichunga.

⁴ Israelcunapac allpata cutichina huata chayamucpica, chai huarmicuna japishca allpaca maijan ailluhuan chai huarmi cazarashca cacpipish, chai aillupacmi tucunga. Chashna cacpica, ñucanchic allpaca ashallayangami— nirca.

⁵ Paicuna shina nicpimi, Moisesca Mandac Dios mandashca shinallatac israelcunataca: —Josepac aillucunaca cashcatatacmi nincuna.

⁶ Mandac Diosca Zelofehadpac ushicunataca: “Paicunapac taitamanta aillupurahuanca paicuna munashcahuan cazarachunlla.

⁷ Israelcunaca, paicunapac allpataca quiquin aillupurapi charichunlla. Caishuc aillupac allpataca caishuc aillucunamanca ama cuchun. Chashna ruhuacpimi, chai allpaca mana maqui maqui pasanga.

⁸ Israel aillumanta maijan huarmipish allpata japishpaca, paipac taitapac aillupuramanta carihuan cazarachun. Chashnami israelcunaca paicunapac taitamanta allpata japinga.

⁹ Shina ruhuashpami israelcunaca paicuna japishca allpataca shuc ailluman, chaishuc ailluman maqui maqui mana pasachinga. Tucui israelcunami paicuna japishca allpataca cuidashpa charinga” nishpami mandarca— nirca.

¹⁰ Shina nicpimi, Zelofehadpac ushicunaca Mandac Dios Moisesta mandashca shinallatac ruhuarca.

¹¹ Chashnami Maala, Tirsa, Hogla, Milca, Noa huarmicunaca paicunapac taitapac huauquicunapac churicunahuan cazararca.

¹² Zelofehadpac ushicunaca paicunapac taitapac aillupuramanta runahuan cazaracpimi, paicuna japishca allpaca Manasespac aillupurapi saquirirca. Manasesca Josepac churimi carca. Zelofehadpish Manasespac huahua huahuami carca.

¹³ Tucui cai mandashcacunataca Mandac Diosmi israelcuna Jordán yacu patapi, Jericó chimbapurapi tiyac Moab pambacunapi cacpi, Moisesman huillachirca.