NÚMEROS 35 - Dios Rimashcata Quillcashcami

Levitacunapac llactacunamanta

¹ Jordán yacu ladopi, Jericó chimba ladopi cac Moab pambapi israelcuna causacucpi, Mandac Diosca Moisestaca:

² «Israelcunataca: “Cancuna allpata japishpaca, levitacunamanpish llactacunata, llacta muyundi michina pambacunatapish cunguichic.

³ Chashna cucpimi, paicuna causangapac llactacunatapish, pueblo muyundi pambacunatapish huagracunata, tucui shuctac animalcunata michingapac charinga.

⁴ Chai llacta muyundi michina pambacunataca pueblo muyundi pircashcamanta chuscu patsac pichca chunga metro anchota cunguichic.

⁵ Llacta muyundi allpataca inti llucshina ladomanca iscun patsac metro, ura ladomanca iscun patsac metro, inti yaicunamanca iscun patsac metrota, jahua ladomanca iscun patsac metrota cunguichic. Chashna cucpimi, llactacunaca michina allpa chaupipi saquiringa.

⁶ Levitacunaman cushca llactacunamanta sucta pueblocunaca maijanpish huañuchishpa miticuna llactami canga. Caicunapac jahuapi chuscu chunga ishcai llactacunata cunguichic.

⁷ Chaica chuscu chunga pusac llactacuna, michina pambacunandimi levitacunapac canga.

⁸ Israelcuna japishca shinallatacmi levitacunapish japina can. Jatun ailluca achcatami japinga, uchilla ailluca ashatami japinga” ningui» nirca.

Miticuna llactacunamanta

⁹ Mandac Diosca Moisestaca:

¹⁰ «Israelcunataca: “Cancuna Jordán yacuta pasashpa Canaán llactaman chayashpaca,

¹¹ manapish huañuchina munaihuan cashpa, maijanta huañuchishpa miticugrina llactata acllanguichic.

¹² Chai llactacunapimi huañuchicca huañucpac familiacunamanta miticugringa. Chaipimi tandanacushca israelcuna tapushpa taripangacaman miticugringa.

¹³ Levitacunaman cushca llactacunamantaca sucta pueblocunami miticuna canga.

¹⁴ Miticuna llactacunataca quimsataca Jordán yacumanta inti llucshina ladopi, cutin quimsataca Canaán llactallapitac cunguichic. Caicunami miticuna pueblocunaca canga.

¹⁵ Chai llactacunami israelcunapacpish, ima mana charic carumanta shamushpalla causaccunamanpish manapish huañuchina munaihuan huañuchishpa, huañucpac familiamanta miticuna canga.

¹⁶ Maijanpish fierrohuan chugrishpa huañuchicca huañuchic runa nishcami canga. Paipish huañuchishcami canga.

¹⁷ Maijanpish rumihuan huactashpa huañuchicca huañuchic runa nishcami canga. Paipish huañuchishcami canga.

¹⁸ Maijanpish huañuchinalla caspihuan huañuchicca huañuchic runa nishcami canga. Paipish huañuchishcami canga.

¹⁹ Huañucpac maijan familiami chai huañuchic runataca maipipish tupashpaca huañuchinga.

²⁰ Maijanpish piñashpa tangashpa, mana cashpaca imahuan shitashpa,

²¹ mana cashpaca piñanacushca cashcamanta maquihuan huactashpa huañuchicca huañuchic runa nishcami canga. Paipish huañuchishcami canga. Huañucpac maijan familiami chai huañuchic runataca maipipish tupashpa huañuchinga.

²² Ashtahuanpish mana piñanacushca cashpa tangashpa, mana cashpaca imahuanpish shitashpa,

²³ mana cashpaca paita mana ricushpa, jatun rumita singuchishpa huañuchishpapish mana piñanacushca cashcamantachu huañuchin. Chaimantami chai huañuchic runataca

²⁴ tucui israelcuna tandanacushpa, ima shina chai huañui tiyashcata ricunga. Chashna tapushpaca, huañuchishcamantaca mandashcapi nishca shinami, cashcata ruhuashpa taripanga.

²⁵ Tandanacushca israelcunami chai runataca ima shina huañuchishcata tucui taripashpa, huañucpac familiacunamanta miticuna llactaman cutichishpa cachanga. Chai huañuchic runaca aceitehuan cahuishca curacunata mandac cura huañungacamanmi chai llactapi canga.

²⁶ Huañuchic runa miticuna llactamanta llucshishpa carupi puricucpi,

²⁷ huañucpac familia llactamanta carupi puricucpi, tupashpa huañuchishpaca mana juchanchishcachu canga.

²⁸ Chaimanta chai huañuchic runaca curacunata mandac cura huañungacaman chai miticuna llactallapitac causana can. Cura ña huañucpimi, pai causana llactaman cutinga.

Testigocunamantapish, huañuchishpa imata mana cuipac cashcamanta

²⁹ Cai mandashcacunaca cancunapacpish, cancunapac huahua huahuacunapacpishmi can. Cancuna maipi cashpapish tucui chai mandashcacunatami ruhuana canguichic.

³⁰ Huañuchic runataca tauca testigocuna huillacpimi, paitapish huañuchinga. Ashtahuanpish shuclla huillac cacpica, pita cashpapish mana huañuchinachu.

³¹ Huañuchic runa mana huañuchishca cangapac cullquita cusha nicpica, ama japinguichicchu. Paica huañunatacmi can.

³² Curacunata mandac cura manarac huañucpi, chai huañuchic runa miticuna llactamanta cullquita cushpa, paipac llactaman cutisha nicpica, ama japinguichicchu.

³³ Cancuna causacushca llactataca ama mapayachinguichicchu. Maijanta huañuchishpa, yahuarta jichashcamantami chai llactaca mapayashca canga. Chashna mapayashcaca chai huañuchic runata huañuchicpimi, mapa illac saquiringa.

³⁴ Cancuna causacushca llactataca ama mapayachinguichicchu. Ñucapish chai llactapimi cancunahuan causacuni. Mandac Dios ñucaca israelcunapac chaupipimi causani” ninmi ningui» nirca.