NÚMEROS 34 - Dios Rimashcata Quillcashcami

¹ Mandac Diosca Moisestaca:

² «Israelcunata: “Cancuna Canaán llactaman yaicushpaca, cancunapac allpa linderocunaca caicunami canga.

³ Ura lado Zin shitashca pambamantaca Edom llacta tupanacuitami canga. Chai ura inti llucshina lado linderoca Cachi Cucha tucuricamanmi canga.

⁴ Chai linderoca ura ladota muyushpa, Acrabim lomaman chayashpa, shitashca pamba Zintami catinga. Chai ura ladota rishpaca, Cades-barneacamanmi canga. Chaimantaca Hazar-adarta pueblota rishpami Hasmoncaman canga.

⁵ Chai linderoca Asmonmantaca Egipto huaicu jatun yacuta rishpami, mama cuchapi tucuringa.

⁶ Inti tigrana ladomanca cac linderoca mama cucha huaicutami catinga.

⁷ Jahua lado linderoca mama cuchamanta Hor urcucamanmi canga.

⁸ Chaimantaca Hamatman yaicunacamanmi linderohuan churashca canga. Chai linderoca Zedadcamanmi ringa.

⁹ Chaimantaca Zifronta pasashpami Hazar-enanpi tucuringa.

¹⁰ Cutin inti llucshina ladomanca Hazar-enanmantaca Sefamcamanmi canga.

¹¹ Sefammantaca Ayinmanta inti llucshina ladoman cac Riblacamanmi canga. Chaimanta uraiman rishpaca, inti llucshina ladoman cac Cineret cucha ladocamanmi canga.

¹² Chaimantaca Jordán yacu uraita rishpa, Cachi Cuchamanmi chayanga. Chai shinami cancunapac llactaca canga” ninmi ningui» nirca.

Llactacunata raquinacushcamanta

¹³ Moisés israelcunata mandashpaca: «Cai llactatami cancunaca suerteta ruhuashpa japinguichic. Cai llactataca Mandac Diosmi iscun aillucunaman, caishuc chaupi aillumanpish cuchun mandarca.

¹⁴ Rubenpac, Gadpar aillucunapish, Manasespac chaupi aillupish paicunapac huasi ucu familia mashna cashca shinallatacmi allpataca japirca.

¹⁵ Chai ishcai aillucuna, shinallatac caishuc ailluca Jericó chimba ladopi cac Jordán yacu ladopimi japirca. Chaica inti llucshina ladomanmi saquirin» nirca.

¹⁶ Mandac Diosca Moisestaca:

¹⁷ «Allpata chaupishpa cuc runacunapac shuticunaca: Eleazar cura, Nunpac churi Josuemi.

¹⁸ Paicunata ayudachunca tucui aillucunamanta shuc mandacta acllangui.

¹⁹ Chai mandaccunapac shuticunaca: Judapac aillumantaca Jefonepac churi Caleb,

²⁰ Simeonpac aillumantaca Amihudpac churi Semuel,

²¹ Benjaminpac aillumantaca Quislonpac churi Elidad,

²² Danpac churicunapac aillumantaca Joglipac churi mandac Buqui,

²³ Josepac ishcai churipac aillumantaca Manasespac aillumanta Efodpac churi mandac Haniel,

²⁴ Efrainpac aillumantaca Siftanpac churi mandac Quemuelmi canga.

²⁵ Shinallatac Zabulonpac churicunapac aillumantaca Parnacpac churi mandac Elizafán,

²⁶ Isacarpac churicunapac aillumantaca Azanpac churi mandac Paltiel,

²⁷ Aserpac churicunapac aillumantaca Selomipac churi mandac Ahiud,

²⁸ Neftalipac churicunapac aillumantaca Amihudpac churi mandac Pedaelmi canga.

²⁹ Mandac Diosca paicunatami Canaanta israelcunaman chaupishpa cuchun mandarca» nirca.