NÚMEROS 32 - Dios Rimashcata Quillcashcami

Rubenpac, Gadpac aillucuna Jordán ladopi causashcamanta

¹ Rubenpac, Gadpac aillucunaca achca animaltami charirca. Paicunaca Jazerpac, Galaadpac allpaca animalcunata mirachingapac alli cashcatami ricurca.

² Chaimantami Rubenpac, Gadpac aillucunaca Moisespacman, Eleazar curapacman, israelcunata pushaccunapacman parlangapac rirca.

³ Paicuna rishpaca: —Atarot, Dibón, Jazer, Nimra, Hesbón, Eleale, Sebam, Nebo, Beón llactacunataca

⁴ tucui israelcunapac ñaupapimi Mandac Dios tucuchirca. Cai llactacunaca animalcunata mirachingapac allimi. Canta servic ñucanchicca achca animalyucmi canchic.

⁵ Chaimanta ñucanchic canta serviccuna cambac ñahuipi alli ricurishca cacpica, cai allpata ñucanchicman cui. Ama Jordán yacuta pasachichu— nirca.

⁶ Shina nicpimi, paicunataca: —¿Cancunapac huauqui israelcuna macanacuiman ricpipish, cancunaca caillapichu saquirishun ninguichic?

⁷ ¿Imamantatac Mandac Dios cusha nishca llactaman israelcuna ama yaicuchun, mana vali yuyaita cushpa, jarcasha ninguichic?

⁸ Cancunapac taitacunapish Cades-barnea llactamanta chai llactata ricuchun cachacpipish, chashnallatacmi ruhuarca.

⁹ Paicunaca Escol yacuman chayashpami chai llacta imalaya cashcata ricurca. Paicuna cutimushpaca, Mandac Dios cushca llactaman israelcuna ama yaicuchunmi mana alli yuyaita cushpa jarcarca.

¹⁰ Chaimantami chai punzhapi Mandac Dios nina japiric shina piñarishpaca:

¹¹ “Egiptomanta llucshimuc ishcai chunga yalli huatayuc runacuna Abrahamman, Isaacman, Jacoboman cushami nishca llactamanca mana yaicungachu. Paicunallatac jahua shungulla ñucata caticushcamantami mana yaicunga.

¹² Llactata ricungapac riccunapuramantaca cenezeopuramanta Jefonepac churi Caleb, Nunpac churi Josuellami Mandac Diostaca tucui shunguhuan catirca. Paicunami chai llactamanca yaicunga” nirca.

¹³ Mandac Diosca israelcunahuan nina japiric shina piñarishpami chuscu chunga huatata shitashca pambapi saquirca. Chashnami tucui mana allita ruhuac paicunapac huahua huahuacuna huañungacaman carca.

¹⁴ Cunan cancunapish millaita ruhuac juchayuc taitacunapac churicuna cashpami, ashtahuan Dios-huan israelcunahuan piñanacuchishcanguichic.

¹⁵ Cancuna Mandac Diosta catinata saquishpa cutiricpica, paipish cai shitashca pambapimi cancunata saquinga. Cai shina tucucpica, cancunamantami cai gentecunaca chingaringa— nirca.

¹⁶ Shina nicpimi, Moisespacman cuchuyashpaca: —Ñucanchicca caipimi ñucanchic animalcunaman corralcunatapish, ñucanchic huahuacunaman llactacunatapish ruhuashun ninchic.

¹⁷ Ñucanchicca macanacungapac allichirishpami caishuc israelcunata ñaupashpa rishun. Paicuna chai llactaman yaicungacamanmi macanacushun. Ñucanchic macanacuiman ricpi, cai llactapi causaccuna ñucanchic huahuacunata ama llaquichichunca, llacta muyunditami pircashun.

¹⁸ Ñucanchicca caishuc israelcuna allpata japingacamanmi huasimanca mana cutishun.

¹⁹ Jordán yacumanta inti llucshic ladoman cac allpata ñucanchic japishpaca, Jordán yacu chimbapi tiyac japishca allpamanta ashtahuan chimbaman tiyac allpataca mana japishunchu— nirca.

²⁰ Shina nicpimi Moisesca: —Cancuna nishca shina, Mandac Diospac ñaupata macanacungapac richiclla.

²¹ Cancunata piñaccunata cancunapac ñaupamanta llucchishpa cachangacaman tucui cancuna macanacunahuan allichirishpa, Mandac Diospac ñaupata Jordán yacuta pasanguichic.

²² Ña tucui chai allpata caishuc israelcunaman japishca quipaca cutimunguichiclla. Cancuna ruhuashun nishcata Diospac ñaupapipish, israelcunapac ñaupapipish pactachishpaca, ima llaquitapish mana apanguichicchu. Cancuna chashna ruhuacpica, cai allpaca Mandac Diospac ñaupapi cancunapacmi canga.

²³ Cancuna mana chashna ruhuashpaca, Mandac Diospac ñaupapimi juchayuc tucunguichic. Chai juchata cancuna ruhuashcamanta ima horaspish jatun llaquitami apanguichic.

²⁴ Shinaca cancunapac huahuacunamanpish muyundi pircashca llactata ruhuaichic, animalcunamanpish corralcunata ruhuaichic. Cancuna nishcataca pactachinami canguichic— nirca.

²⁵ Shina nicpimi, Gadpac, Rubenpac aillucuna Moisesta rimashpaca: —Canta servic ñucanchicca can imata mandashcatami ruhuashun.

²⁶ Ñucanchic huahuacuna, huarmicuna, animalcunaca cai Galaad llacta pueblocunapimi saquiringa.

²⁷ Canta servic ñucanchicca, can ñucanchicta mandashca shinami, Mandac Diospac ñaupata macanacungapac pasashun— nirca.

²⁸ Paicuna shina nicpimi, Moisesca Eleazar curata, Nunpac churi Josueta, israelcunapurapi cac aillucunapac taitacunata mandaccunataca:

²⁹ —Gadpac, Rubenpac aillupuramanta cac israelcuna Mandac Dios mandashca shina, cancuna allpata japingacaman Mandac Diospac ñaupata macanacunahuan macanacungapac cancunahuan pacta Jordán yacuta pasacpica, cai Galaad llactata cunguichic.

³⁰ Ashtahuanpish cancunahuan pacta macanacungapac mana ricpica, cancunahuan pactallatac Canaanpi allpata cunguichic— nirca.

³¹ Shina nicpimi, Gadpac, Rubenpac aillucuna rimashpaca: —Canta servic ñucanchicca Mandac Dios mandashca shinami ruhuashun.

³² Mandac Diospac ñaupata macanacunahuan allichirishpami Canaanpi causaccunahuan macanacungapac pasashun. Jordán yacuta inti llucshic ladoman cac allpaca ñacaman nishca shinami ñucanchicpac canga— nirca.

³³ Paicuna shina nicpimi, Moisesca Gadpac, Rubenpac aillucunaman, Josepac churi, Manasespac chaupi aillumanpish amorreocunata jatun mandac Sehón mandacushca, jatun mandac Og mandacushca llactacunata, chai llactacuna ucupi tiyac llactacunandi, llacta muyundi llactacunandi curca.

³⁴ Chashna cucpimi, Gadpac ailluca Dibón, Atarot, Aroer,

³⁵ Atarot-sofán, Jazer, Jogbeha,

³⁶ Bet-nimra, Bet-haram llactacunata cutin shayachishpa, muyundita jatun pircacunata ruhuashpa oveja corralcunatapish ruhuarca.

³⁷ Rubenpac aillucunaca Hesbón, Eleale, Quiriataim,

³⁸ Nebo, Baal-maón llactacunatami cutin shayachishpami shuctac shutita churarca. Sibma pueblotapish shayachircami. Paicuna shayachishca llactacunataca shuctac shutitami churarca.

³⁹ Manasespac, Maquirpac aillucunaca Galaadman rishpami, chaipi causac amorreocunata llucchishpa cachashpa, chai llactata japirca.

⁴⁰ Chashna cacpimi, Moisesca Galaad llactataca Manasespac churi Maquirpac churicunaman curca. Shina cucpimi, paicunaca chaipi causai callarirca.

⁴¹ Manasespac aillupuramanta Jairca amorreocunapac llacta muyundi llactacunatami japirca. Chai llactacunataca Havot-jairtami shutichirca.

⁴² Nobaca Kenat llactatami tucui chai muyundi llactacunandi japirca. Chai llactataca paipac quiquin shuti Nobatami shutichirca.