NÚMEROS 31 - Dios Rimashcata Quillcashcami

Madianitacunata huañuchishcamanta

¹ Mandac Dios Moisesta rimashpaca:

² «Madianitacuna israelcunata ima shinami llaquichirca, chashnallatac paicunatapish llaquichi. Chai quipami huañushpa, cambac taitacunahuan tandanacugringuimi» nirca.

³ Shina nicpimi, Moisesca israelcunataca: «Jatun macanacuiman ringapac allichirichic. Mandac Dios ñucata madianitacuna llaquichishcamanta paicunatapish Madianpi llaquichichic.

⁴ Israel aillucunamantaca cada aillumantami shuc huaranga macanacuiman cachana canguichic» nirca.

⁵ Chashnami cada Israel aillumanta huaranga huaranga runacunata acllarca. Chunga ishcai huaranga israelcunami rirca.

⁶ Shinami Moisesca cada aillumanta shuc huaranga macanacuc israelcunata macanacuiman cacharca. Eleazar curapac churi Fineasca macanacuipi tocangapacmi Diospaclla huasimanta vasocunatapish, trompetatapish apashpa rirca.

⁷ Mandac Dios Moisesta mandashca shinami madianitacunahuan macanacushpaca tucui caricunata huañuchirca.

⁸ Madianitacunahuan macanacushpaca, chai llactata pichca jatun mandaccuna Evita, Requemta, Zurta, Hurta, Rebatami huañuchirca. Shinallatac Beorpac churi Balaamtapish espadacunahuanmi huañuchirca.

⁹ Chashna huañuchishpami israelcunaca madianita huarmicunatapish, huahuacunatapish prezu aparca. Paicunapac tucui animalcunatapish, huagracunatapish, imalla charishcacunatapish quichushpami aparca.

¹⁰ Chai quipaca tucui Madián llactacunatapish, tucui carpa huasicunatapish ninata churashpami rupachirca.

¹¹ Quipaca macanacushpa quichushcacunatami gentecunatapish, animalcunatapish japirca.

¹² Shina japishpami Moisespacman, Eleazar curapacman, tandanacushca israelcunapacman apamurca. Israelcunaca prezu japishcacunata, macanacushpa quichushcacunataca Moab pambacunapi cac carpa huasicunamanmi apamurca. Chaica Jordán yacu lado Jericó chimba ladopimi carca.

¹³ Chaipimi Moisespish, Eleazar curapish, tandanacushca israelcunata mandaccunapish tupangapac carpa huasicunamanta llucshirca.

¹⁴ Moisés soldadocunata jatun mandaccunahuan, huaranga soldadocunata, patsac soldadocunata mandaccunahuan

¹⁵ piñarishpaca: —¿Ima nishpatac tucui huarmicunata mana huañuchircanguichic?

¹⁶ ¡Chai huarmicunaca Balaam yachachishcata uyashpami israelcunata pandachirca! ¡Chaimantami Mandac Diospaclla israelcunaca Baal-peor diosta adorashpa, Mandac Diosta piñachirca! ¡Chaimantami Mandac Diospac tandanacushca israelcunaca achca huañurca!

¹⁷ Cunanca, tucui cari huahuacunata, carihuan chayarinacushca huarmicunata huañuchichic.

¹⁸ Ashtahuanpish carihuan manarac chayarinacushca huarmicunataca ama huañuchinguichu— nirca.

¹⁹ Shinallatac Moisesca: —Cancunapuramanta maijanpish huañuchishca cashpa, maijanpish huañushcapi tuparishca cashpaca, canchis punzhatami carpa huasimanta canzhapi cana canguichic. Ña quimsa punzha tucucpi, shinallatac canchis punzha tucucpica cancunapish, cancuna prezu apamushcacunapish armarishpa, mapa illacmi saquiringa.

²⁰ Ima churanatapish, caramanta ruhuashca imallacunatapish, chivo millmamanta ruhuashca churanatapish, caspimanta ruhuashca ima charinacunatapish mapa illacta ruhuanguichic— nirca.

Macanacuipi quichushcacunata chaupinacushcamanta

²¹ Eleazar curaca jatun macanacuimanta shamuc macanacuc soldadocunataca: «Mandac Diosca Moisestaca:

²² “Ninapi mana rupac curitapish, cullquitapish, broncetapish, fierrotapish, estañotapish, plomo fierrotapish

²³ mapa illacta ruhuanguichic. Chai fierrocuna mana mapa illac tucucpica, yacuhuan mapa illacta ruhuanguichic. Ninapi churacpi, rupaipacllacunataca yacuhuan jahuashpa, mapa illacta ruhuanguichic.

²⁴ Canchis punzha tucucpica, cancunapac churanata tacshashpa, mapa illaclla tucunguichic. Chai quipami carpa huasimanca yaicui pudinguichic” ninmi ningui» nirca.

²⁵ Mandac Dios Moisesta rimashpaca:

²⁶ «Macanacushpa quichumushca gentecunatapish, animalcunatapish canhuan, Eleazar curahuan, tandanacushca israelcunahuan yupaichic.

²⁷ Chaicunataca jatun macanacuiman rishpa, macanacuccunaman, tandanacushca israelcunaman pacta pacta chaupichic.

²⁸ Jatun macanacuiman llucshishpa, sinchi soldadocuna macanacushpa quichushcacunataca ñucaman cunguichic. Chashnami gentecunatapish, huagracunatapish, burrocunatapish, ovejacunatapish, cada pichca patsacmanta shucta chicanyachishpa, Mandac Dios ñucaman cuna canguichic.

²⁹ Chaicunataca Mandac Diosman cuna cashcata shina Eleazar curaman cunguichic. Chai cushcaca Mandac Diosman alzashpa cushcami.

³⁰ Tandanacushca israelcunaman chaupishpa cushca gentecunatapish, huagracunatapish, burrocunatapish, ovejacunatapish, cada pichca chungamanta shucta japishpa, ñucahuan tupana huasita cuidac levitacunaman cunguichic» nirca.

³¹ Shina nicpimi, Moises-huan Eleazar curahuanca ima shinami Mandac Dios Moisesta mandashca shinallatac ruhuarca.

³² Macanacuipi quichushcacunataca ñami asha ashata macanacuc runacunaca japishca carca. Tucui chaicunaca sucta patsac canchis chunga pichca huaranga ovejami carca.

³³ Huagracunaca canchis chunga ishcai huarangami carca.

³⁴ Burrocunaca sucta chunga shuc huarangami carca.

³⁵ Carihuan manarac chayarishca solteracunaca quimsa chunga ishcai huarangami carca.

³⁶ Jatun macanacuiman llucshishca soldadocunaman cushca ovejacunaca quimsa patsac quimsa chunga canchis huaranga pichca patsacmi carca.

³⁷ Chaicunamanta Mandac Diosman impuestota cushca ovejacunaca sucta patsac canchis chunga pichcami carca.

³⁸ Cutin huagracunaca quimsa chunga sucta huarangami carca. Mandac Diosman impuestota cushca huagracunaca canchis chunga ishcaimi carca.

³⁹ Burrocunaca quimsa chunga huaranga pichca patsacmi carca. Mandac Diosman impuestota cushca burrocunaca sucta chunga shucmi curca.

⁴⁰ Gentecunaca chunga sucta huarangami carca. Mandac Diosman impuestota cushcaca gentecunaca quimsa chunga ishcaimi carca.

⁴¹ Moisesca Mandac Dios mandashca shinallatacmi huichai alzashpa cushca ofrendataca Eleazar curaman curca.

⁴² Moisesca macanacushpa quichushcataca chaupitami israelcunaman curca.

⁴³ Ovejacunaca quimsa patsac quimsa chunga canchis huaranga pichca patsacmi carca.

⁴⁴ Huagracunaca quimsa chunga suctami carca.

⁴⁵ Burrocunaca quimsa chunga huaranga pichca patsacmi carca.

⁴⁶ Gentecunaca chunga sucta huarangami carca.

⁴⁷ Moisesca israelcunaman chaupishpa cushca gentecunatapish, animalcunatapish cada pichca chungamantami shucta Mandac Dios-huan tupana huasita cuidac levitacunaman Mandac Dios mandashca shina curca.

⁴⁸ Soldadocunata jatun mandaccunapish, huaranga soldadota mandaccunapish, patsac soldadota mandaccunapish, Moisespacman

⁴⁹ cuchuyashpaca: «Canta servic ñucanchicmi tucui macanacuiman ric soldadocunata yuparcanchic. Shina yupacpica, ñucanchic soldadocunaca shucllapish mana illanchu.

⁵⁰ Chaimantami Mandac Diosman cungapac ñucanchicca curimanta ruhuashca collarcunata, sortejascunata, manillacunata, zarcillocunata, cadenacunata apamunchic. Caicunataca ñucanchic juchata Mandac Dios pichachunmi apamunchic» nirca.

⁵¹ Curimanta ruhuashcacunata Moises-huan, Eleazarhuanmi chasquirca.

⁵² Soldadocunata jatun mandaccuna, huaranga soldadota mandaccuna, patsac soldadota mandaccuna alzashpa Mandac Diosman cuchun apamushca curica chunga sucta huaranga canchis patsac pichca chunga siclosmi carca.

⁵³ Macanacuiman ric soldadocunaca tucui quichushcacunatami japirca.

⁵⁴ Huaranga soldadota mandaccuna, patsac soldadota mandaccuna apamushca curimanta ruhuashcacunataca Moises-huan Eleazar curahuanmi japishpami israelcuna yuyarichun Dios-huan tupana huasiman, Mandac Diospac ñaupaman aparca.