NÚMEROS 30 - Dios Rimashcata Quillcashcami

Diospacta ruhuangapac ari ninamanta

¹ Moisesca Israel aillucunata mandaccunataca: «Mandac Diosca:

² “Maijanpish Mandac Dios ñucapacta ruhuasha nishpa, mana cashpaca quiquin shimihuan ari nishpaca pactachinatacmi can. Pai imata ruhuangapac nishca shinallatacmi ruhuana can.

³ Taitapac huasipi causac shuc soltera Mandac Dios ñucaman imata ruhuangapac ari nishca cacpi,

⁴ chaita paipac taita yachac chayashpa, imata mana nicpica, pai imata ruhuasha nishcataca pactachinatacmi can.

⁵ Paipac taita ima punzha yachac chayashpa, chai soltera ñucaman imata ruhuangapac ari nishcata jarcacpica, taita jarcashcamanta Mandac Dios ñucaca perdonashami.

⁶ Ashtahuanpish cazada huarmi Diospacta ruhuangapac paipac shimihuan imata ruhuangapac ari nishca cacpi,

⁷ ima punzha paipac cusa yachac chayashpa, mana imata nicpica, pai ñucapacta ruhuangapac ari nishcataca pactachinatacmi can.

⁸ Ashtahuanpish paipac cusa ima punzha yachac chayashpa jarcacpica, chai huarmi ñucapacta ruhuangapac ari nishcataca mana pactachishpa saquinallami. Chaitaca ñucaca perdonashami.

⁹ Maijan viuda huarmi, mana cashpaca cusa shitashca huarmi ñucapacta ruhuangapac ari nishcataca pactachinatacmi can.

¹⁰ Cusayuc huarmi paipac cusapac huasipi ñucapacta ruhuangapac ari nishcata,

¹¹ paipac cusa yachac chayashpa, mana jarcacpica, ari nishcataca mana saquishpa pactachinatacmi can.

¹² Ashtahuanpish paipac cusa ima punzha yachac chayashpa jarcacpica, pai ari nishcataca mana pactachishpa saquinallami can. Chai ari nishcata pactachinata cusa jarcashcamantaca ñucaca perdonashami.

¹³ Ñucapacta imata ruhuashatacmi nishcatapish, pai ari nishcatapish cusami ruhuachun ninga, mana cashpaca saquichun ninga.

¹⁴ Ashtahuanpish ñucapacta ruhuasha nishcata paipac cusa yachac chayashpa, punzhanta mana imata nicpica, pactachinatacmi can. Ñucapacta ruhuangapac ari nishcata ima punzha yachashpapish mana imata nicpica, pactachina cashcatami nicun.

¹⁵ Ashtahuanpish ari nishcata maijan punzhacuna quipa yangapi churashpaca, paimi huarmipac juchamantaca llaqui tucunga” nishpami mandarca» nirca.

¹⁶ Tucui cai mandashcacunaca shuc cazada huarmi cusa nishcata uyanamanta, shuc soltera paipac taitahuan causacushparac taita uyana cashcamanta Mandac Dios Moisesman mandashcacunami can.