NÚMEROS 3 - Dios Rimashcata Quillcashcami

Levitacuna imata ruhuana cashcamanta

¹ Mandac Dios Sinaí urcupi Moises-huan parlanacui punzhapi tiyashca Aaronpac, Moisespac churicunaca caicunami.

² Punta churica Nadabmi carca. Quipa churicunaca Abiú, Eleazar, Itamarmi carca.

³ Paicunami Aaronpac churicunamantaca Diosta servingapac aceitehuan cahuishca curacuna carca.

⁴ Shina cashpapish, Nadabhuan, Abiuhuanca Sinaí urcupi Mandac Diospac ñaupapi mana alli rupachishcamantami chaillapitac huañurca. Paicunaca mana huahuayucchu carca. Eleazarpish, Itamarpish paicunapac taita Aaronpac ñaupapi curallatacmi catirca.

⁵ Mandac Dios Moisesta rimashpaca:

⁶ «Aarón curata ayudachun Levipac aillucunata pushamui.

⁷ Ñucahuan tupana huasipi Aarón mandashcata, israelcuna ruhuana cashcata ruhuachun churai.

⁸ Ñucahuan tupana huasipi imalla tiyaccunatapish, israelcunaman mingashcatapish paicunami cuidanga. Ñucahuan tupana huasipipish paicunami servinga.

⁹ Levitacunaca israelcunamanta chicanyachishcami. Chaimanta paicunataca Aaronman, paipac churicunaman cungui.

¹⁰ Curacuna ruhuana cashcataca Aaronman, paipac churicunaman mingangui. Chaiman pipish yaicushpaca huañungami» nirca.

¹¹ Mandac Dios Moisesta rimashpaca:

¹² «Israelcunapuramanta punta churicunata japinapac randica levitacunatami ñucapac cachun acllarcani. Levitacunaca ñucapacmi cana can.

¹³ Egiptopi causaccunapac punta churicunata huañuchicushpami israelcunapac punta churicunataca ñucapac cachun acllashpa, mana huañuchircani. Chaimantami israelcunapac punta churicunatapish, punta animalcunatapish ñucapaclla cachun acllarcani. Ñucaca Mandac Diosmi cani» nirca.

¹⁴ Mandac Dios Sinaí shitashca pambapi Moisesta rimashpaca:

¹⁵ «Levitacunata shuc quillata charicmanta callarishpa ailluta, huasi ucupurata catishpa, tucui cari huahuacunata yupangui» nirca.

¹⁶ Shina nicpica, Moisesca Mandac Dios mandashca shinallatacmi yuparca.

¹⁷ Levipac churicunapac shuticunaca: Gersón, Cohat, Merarimi carca.

¹⁸ Gersonmanta mirarishca aillucunaca: Libni, Simeimi carca.

¹⁹ Cohatmanta mirarishca aillucunaca: Amram, Izhar, Hebrón, Uzielmi carca.

²⁰ Merarimanta mirarishca familiacunaca: Mahli, Musimi carca. Caicunami Levipac familiacunapac aillumanta carca.

²¹ Gersonmanta mirarishca churicunaca: Libni, Simeimi carca.

²² Shuc quillata charicmanta huichaiman yupashca tucui caricunaca canchis huaranga pichca patsac caricunami carca.

²³ Paicunaca Dios-huan tupana huasimanta huasha inti yaicunapimi carpata shayachishpa tiyarirca.

²⁴ Gersonmanta mirarishcacunataca Laelpac churi Eliasafmi mandacurca.

²⁵ Paicunami Dios-huan tupana huasitapish, chai huasi catatapish, yaicuna pungu jarcachishca pañotapish,

²⁶ canzha pamba jarcachishca pañotapish, Dios-huan tupana huasi muyundi jarcachishca pañotapish, altar jarcachishca pañotapish, carpa huatana huascacunatapish ricunga.

²⁷ Cohatmanta mirarishca churicunaca: Amrammanta, Izharimanta, Hebronmanta, Uzielmanta mirarishca churicunami carca.

²⁸ Shuc quillata charicmanta huichaiman yupashca caricunaca pusac huaranga sucta patsacmi carca. Paicunaca Dios-huan tupana huasimanta ura ladopi cac carpata huasita ricuccunami carca.

²⁹ Paicunaca Dios-huan tupana huasi ura ladopimi carpacunata shayachishpa tiyaringa.

³⁰ Cohatpac aillucunataca Elizafanmi mandacurca.

³¹ Paicunami Arcatapish, candelerocunatapish, altarcunatapish, Dios-huan tupana huasi ucupi tucui imalla tiyashcacunatapish, Diospaclla chicanyachishca ucupi imalla ruhuanacunatapish, jarcachishca pañocunatapish, tucui imalla tiyashcacunatapish ricucurca.

³² Levitacunata punta mandacca Aarón curapac churi Eleazarmi carca. Paimi Dios-huan tupana huasita cuidaccunacata mandacurca.

³³ Merarimanta mirarishca churicunaca: mahlitacuna, musitacunami carca.

³⁴ Shuc quillata charicmanta huichaiman yupashca caricunaca sucta huaranga ishcai patsacmi carca.

³⁵ Merarimanta mirarishca huasi ucupurataca Abihailpac churi Surielmi mandacurca. Paicunaca Dios-huan tupana huasi ladopimi carpacunata shayachishpa tiyacurca.

³⁶ Paicunami Dios-huan tupana huasi tablacunatapish, barracunatapish, pilarcunatapish, pilar shayachina basacunatapish, chaipi tucui ima tiyaccunatapish,

³⁷ carpa huasi canzha pambapi tiyac muyundi pilarcunatapish, basacunatapish, ishtacacunatapish, huatana huascacunatapish ricucurca.

³⁸ Inti llucshina ladopi cac Dios-huan tupana yaicunapimi Moisespish, Aaronpish paipac churicunandi carpacunata shayachishpa tiyaringa. Paicunami Dios-huan tupana huasitaca israelcunapac randi cuidanga. Maijan shuccuna chaiman chayarishpaca huañungami.

³⁹ Moisespish, Aaronpish Mandac Dios mandashca shinallatacmi levitacunapac aillucunata catishpa, shuc quillata charicmanta huichaiman tucui caricunata yuparca. Paicunaca ishcai chunga ishcai huarangami carca.

Punta churicunata cacharichinamanta

⁴⁰ Mandac Diosca Moisestaca: «Tucui israelcunapac punta churicunata shuc quillata charicmanta huichaiman yupashpa shuticunata quillcai.

⁴¹ Israelcunapac punta churicunapac randica levitacunata ñucaman chicanyachingui. Israelcunapac punta animalcunapac randica levitacunapac animalcunata ñucaman chicanyachingui. Ñucaca Mandac Diosmi cani» nirca.

⁴² Moisesca Mandac Dios nishca shinallatacmi tucui israelcunapac punta churicunataca yupashpa quillcarca.

⁴³ Tucui israelcunapac punta churicunata shuc quillamanta huichaiman charicta quillcashcaca ishcai chunga ishcai huaranga ishcai patsac canchis chunga quimsami carca.

⁴⁴ Mandac Diosca Moisestaca:

⁴⁵ «Israelcunapac punta churicunapac randica levitacunata ñucapacman apamungui. Punta animalcunapac randica levitacunapac animalcunata apamungui. Levitacunaca ñucapacmi cana can. Ñucaca Mandac Diosmi cani.

⁴⁶ Israelcunapac punta churicunaca levitacunamantaca ishcai patsac canchis chunga quimsahuanmi yalli.

⁴⁷ Chaimanta paicunataca pichca cullquita cada shucmanta chasquingui. Chai cullquica Dios-huan tupana huasipi tiyac cullqui mashna valishca shinallatacmi cana can.

⁴⁸ Chaitami yallishca punta churicunamantaca Aaronman, paipac churicunaman cuna can» nirca.

⁴⁹ Shina nicpimi, Moisesca levitacunamanta yallishca israelcunapac punta churicunamantaca cullquita curca.

⁵⁰ Paicunamantaca huaranga quimsa patsac sucta chunga pichca cullquitami Dios-huan tupana huasipi tiyac cullqui mashna valishca shinallatac tandachirca.

⁵¹ Chaitaca Mandac Dios nishca shinallatacmi Aaronman, paipac churicunaman curca.