NÚMEROS 28 - Dios Rimashcata Quillcashcami

Punzhanta Diosman tucuita rupachinamanta

¹ Mandac Diosca Moisestaca:

² «Israelcunataca: “Ñucaman cuna ofrendataca chai cuna punzhapi, ñucaman mishquilla ashnachun rupachinguichic” ningui.

³ Shinallatac: “Ñucaman cushpa punzhanta tucui rupachingapacca shuc huatayuc ima mana tucushca ishcai cari ovejata cunguichic.

⁴ Chai ovejacunataca shuctaca tutamanta, shuctaca chishi ñucaman cunguichic.

⁵ Grano ofrendataca ishcai kilo harinata olivosta tacashca shuc litro alli aceitehuan chapushpa cuichic” ninguichic.

⁶ Chaitami Mandac Dios ñucaman mishquilla ashnachun punzhanta tucui rupachichun shitashca pambapi tiyac Sinaí urcupi mandashca carca.

⁷ Shuc huatayuc cada cari ovejahuanca shuc litro vinota cunguichic. Chaitaca ñucapaclla cac ucupi Mandac Dios ñucapac ñaupapi tallinguichic.

⁸ Cutin caishuc cari ovejataca chishita, tutamanta cushca shinallatac harinatapish, tallina vinotapish cunguichic. Chai cushcacunaca Mandac Dios ñucaman mishquilla ashnachun tucui rupachishcami canga.

Samana punzhapi ofrendata cunamanta

⁹ Samana punzhapica shuc huatayuc ima mana tucushca ishcai cari ovejatapish, ishcai kilo alli harinahuan aceitehuan chapushcatapish, tallina vinotapish cunguichic.

¹⁰ Punzhanta Diosman cushpa tucuita rupachishca jahua, tallina vinota cushca jahuami cada samana punzhapi tucui rupachina canguichic.

¹¹ Cada quilla callaripi ima mana tucushca ishcai becita, shuc cari ovejata, shuc huatayuc canchis cari ovejata tucui rupachinguichic.

¹² Cada becihuan sucta kilo chaupi harinata aceitehuan chapushpa cunguichic. Cada cari ovejahuan ishcai kilo alli harinata aceitehuan chapushpa cunguichic.

¹³ Shuc huatayuc cada cari ovejahuan ishcai kilo alli harinata aceitehuan chapushpa cunguichic. Caicunami ñucaman mishquilla ashnachun tucui rupachishcaca.

¹⁴ Cada becihuan ishcai litro vinota cunguichic. Shuc huatayuc cada ovejahuan shuc litro vinota cunguichic. Caicunami cada quillapi huatanta ñucaman cushpa, tucui rupachinaca.

¹⁵ Shinallatac juchata pichachun Mandac Dios ñucaman shuc cari chivota cunguichic. Caitaca punzhanta ñucaman cushpa tucuita rupachishca jahua, tallina vinota cushca jahuami cuna canguichic.

Pascua punzhapi ofrendata cunamanta

¹⁶ Huata callari punta quilla chunga chuscu punzhaca Mandac Dios ñucapac Pascua punzhami canga.

¹⁷ Cutin chunga pichca punzhaca jatun fiestami. Chai punzhacunapica canchis punzhatami levadura illac tandata micuna canguichic.

¹⁸ Chai callari punzhaca ñucapaclla tandanacuita ruhuashpami, ima trabajotapish mana ruhuana canguichic.

¹⁹ Mandac Dios ñucaman ishcai becita, shuc cari ovejata shinallatac shuc huatayuc ima mana tucushca canchis cari ovejata cunguichic.

²⁰ Shinallatac cada becihuan sucta kilo alli harinata aceitehuan chapushpa cunguichic. Cada cari ovejahuan chuscu kilo yalli alli harinata aceitehuan chapushpa cunguichic.

²¹ Cada chai canchis cari ovejahuan ishcai kilo harinata aceitehuan chapushpa cunguichic.

²² Shinallatac cancunapac juchata pichachun shuc cari chivota ñucaman cunguichic.

²³ Caicunataca punzhanta tutamanta lado ñucaman cushpa tucui rupachishca jahuami cuna canguichic.

²⁴ Chashna tucui canchis punzhacuna micunata tucui rupachicpimi, ñucamanca mishquilla ashnanga. Caicunataca punzhanta ñucaman cushpa tucui rupachishca jahua, tallina vinota cushca jahuami cuna canguichic.

²⁵ Canchisniqui punzhapica ñucapaclla tandanacuita ruhuanguichic. Chai punzhapica ama imata ruhuanguichicchu.

Pentecostés fiestamanta

²⁶ Pentecostés punzhapi, punta pucushca granota ñucaman cuna punzhapica, Diospaclla tandanacuita ruhuanguichic. Chai punzhapica ama imata ruhuanguichicchu.

²⁷ Mandac Dios ñucaman mishquilla ashnachunca, ishcai becita, shuc cari ovejata, shuc huatayuc canchis cari ovejata cunguichic.

²⁸ Cada becihuan cungapacca sucta kilo alli harinata aceitehuan chapushpa cunguichic. Cutin cada cari ovejahuan chuscu kilo alli harinata aceitehuan chapushpa cunguichic.

²⁹ Shuc huatayuc canchis cari ovejahuan ishcai kilo alli harinata aceitehuan chapushpa cunguichic.

³⁰ Cancunapac juchata pichachunca shuc cari chivota cunguichic.

³¹ Caicunataca punzhanta ñucaman cushpa, tucui rupachishca jahua, harinahuan aceitehuan chapushpa cushca jahua, tallina vinota cushca jahuami cuna canguichic. Tucui chaicunaca ima mana tucushcami cuna canguichic.