NÚMEROS 26 - Dios Rimashcata Quillcashcami

Moab llactapi israelcunata yupashcamanta

¹ Chai huañuicuna tiyashca quipami Mandac Diosca Moisestapish, Aaronpac churi Eleazartapish rimashpaca:

² «Tandanacushca macanacuiman ripac israelcunata huasi ucupurata catishpa, ishcai chunga huatayucmanta huichaiman yupaichic» nirca.

³ Shina nicpimi Moisespish, Eleazarpish Jericó chimba ladopi cac Jordán yacu ladopi cac Moab pambaman rishpaca:

⁴ «Mandac Dios Moisesta nishca shinallatac tucui israelcunata ishcai chunga huatayucmanta huichaiman yupaichic» nirca. Egipto llactamanta llucchimushca israelcunaca caicunami carca:

⁵ Taita Israelpac punta churica Rubén, cutin Rubenpac churicunaca: Enocmantaca enaquita aillucuna, Falumantaca faluita aillumi carca.

⁶ Hesronmantaca hesronita aillu, Carmimantaca carmita aillumi carca.

⁷ Tucui paicunaca rubinita aillumi cancuna. Paicunaca chuscu chunga quimsa huaranga canchis patsac quimsa chungami carca.

⁸ Falupac churica Eliabmi carca.

⁹ Eliabpac churicunaca Nemuel, Datán, Abirammi carca. Cai Datanpish, Abirampish tandanacushca israelcuna pushachun acllashca cashpapish Corepac gentecunahuan tandanacushpami, Mandac Diosta mana cazushpa Moisestapish, Aarontapish rimaringapac rirca.

¹⁰ Chaipimi allpa shimi pascarishpa paicunatapish, Coretapish tucui millpurca. Chaipi tandanacushca huañushcapish, nina japirishpa ishcai patsac pichca chunga gentecunata rupachishcapish shuctac gentecuna ama chashna millaita ruhuachun yuyachingapacmi carca.

¹¹ Shina cacpipish, Corepac churicunaca mana huañurcachu.

¹² Simeonpac ailluta catishpa yupashcaca caicunami: Nemuelmantaca nemuelita aillu, Jaminmantaca jaminita aillumi carca.

¹³ Zeramantaca zeraita aillu, Saulmantaca saulita aillumi carca.

¹⁴ Paicunaca simeonita aillumi. Paicunaca ishcai chunga ishcai huaranga ishcai patsacmi carca.

¹⁵ Gadpac ailluta catishpa yupashcaca caicunami: Zefonmantaca zefonita aillu, Haguimantaca haguita aillu, Sunimantaca sunita aillumi carca.

¹⁶ Oznimantaca oznita aillu, Erimantaca erita aillumi carca.

¹⁷ Arodmantaca arodita aillu, Arelimantaca arilita aillumi carca.

¹⁸ Paicunami Gadpac churicunamanta mirarishca ailluca. Paicunaca chuscu chunga huaranga pichca patsacmi carca.

¹⁹ Judapac churicunaca Er, Onanmi carca. Paicunaca Canaanpimi huañurca.

²⁰ Judapac ailluta catishpa yupashcaca caicunami: Selamantaca selanita aillu, Faresmantaca faresita aillu, Zeramantaca zeraita aillumi carca.

²¹ Farespac churicunaca: Hesronmantaca hesronita aillu, Hamulmantaca hamulita aillumi carca.

²² Paicunaca Judapac aillumi cancuna. Tucui paicunaca canchis chunga sucta huaranga pichca patsacmi carca.

²³ Isacarpac ailluta catishpa yupashcaca caicunami: Tolamantaca tolita aillu, Fuamantaca funita aillumi carca.

²⁴ Jasubmantaca jasubita aillu, Simronmantaca simronita aillumi carca.

²⁵ Paicunami Isacarpac churicunamanta mirarishca ailluca. Paicunaca sucta chunga chuscu huaranga quimsa patsacmi carca.

²⁶ Zabulonpac ailluta catishpa yupashcaca caicunami: Seredmantaca seredita aillu, Elonmantaca elonita aillu, Yahleelmantaca yahlita aillumi carca.

²⁷ Tucui paicunami zabulita ailluca. Paicunaca sucta chunga huaranga pichca patsacmi carca.

²⁸ Josepac ailluta catishpa yupashcaca Manasés, Efrainmi carca.

²⁹ Manasespac churicunamantaca: Maquirmanta maquirita aillumi carca. Maquirca Galaad churitami charirca. Cutin Galaadmantaca galadita aillumi carca.

³⁰ Galaadpac churicunamantaca: Jezermanta jezerita aillu, Helecmantaca helequita aillumi carca.

³¹ Azrielmantaca azrielita aillu, Siquemmantaca siquemita aillumi carca.

³² Semidamantaca semedaíta aillu, Hefermantaca heferita aillumi carca.

³³ Heferpac churi Zelofehadca mana churita charircachu, ashtahuanpish ushicunatami charirca. Zelofehadpac ushicunaca Magla, Noa, Hogla, Milca, Tirsami carca.

³⁴ Paicunaca Manasespac aillumantami carca. Tucui paicunaca pichca chunga ishcai huaranga canchis patsacmi carca.

³⁵ Efrainpac ailluta catishpa yupashcaca caicunami: Sutelamantaca sutelajita aillu, Bequermantaca bequerita aillu, Tajanmantaca tajanita aillumi carca.

³⁶ Sutelapac churi Heranmantaca heranita aillumi carca.

³⁷ Paicunami Efrainpac churimanta mirashca ailluca. Paicunaca quimsa chunga ishcai huaranga pichca patsacmi carca. Tucui paicunami Josemanta mirarishca aillu carca.

³⁸ Shinallatac Benjaminpac ailluta catishpa yupashcaca caicunami: Belamantaca belaita aillu, Asbelmantaca asbelita aillu, Ahirammantaca ahiramita aillumi carca.

³⁹ Sufammantaca sufanita aillu, Hufammantaca hufanita aillumi carca.

⁴⁰ Belapac churicunaca Ard, Naamanmi carca. Ardpacmantaca ardita aillu, Naamanmantaca namanita aillumi carca.

⁴¹ Tucui paicunami Benjaminpac aillumanta mirarishca carca. Paicunaca chuscu chunga pichca huaranga sucta patsacmi carca.

⁴² Danpac ailluta catishpa yupashcaca caicunami: Suhammantaca suhamita aillumi carca. Danpac ailluta catishpa yupashcaca caicunami:

⁴³ Suhamitapac ailluca sucta chunga chuscu huaranga chuscu patsacmi carca.

⁴⁴ Aserpac ailluta catishpa yupashcaca caicunami: Imamanta imnaíta aillu, Isuimanta isuita aillu, Beriamantaca beriaíta aillumi carca.

⁴⁵ Beriapac churimantaca: Hebermanta heberita aillu, Malquelmantaca malquielita aillumi carca.

⁴⁶ Aserpac ushica Serami carca.

⁴⁷ Tucui caicunami Aserpac churimanta mirarishca ailluca. Paicunaca pichca chunga quimsa huaranga chuscu patsacmi carca.

⁴⁸ Neftalipac churicunaca ailluta catishpa yupashcaca caicunami: Yahzeelmantaca yaizelita aillu, Gunimantaca gunita aillumi carca.

⁴⁹ Jesermantaca jeserita aillu, Silemmantaca selemita aillumi carca.

⁵⁰ Paicunami Neftalipac ailluta catishpa yupashcaca carca. Paicunaca chuscu chunga pichca huaranga chuscu patsacmi carca.

⁵¹ Tucui israelcunata yupacpica, sucta patsac shuc huaranga canchis patsac quimsa chungami carca.

Allpata chaupichun mandashcamanta

⁵² Mandac Diosca Moisesta:

⁵³ «Cai yupashcacunamanmi paicuna japina cashca shinallatac allpata chaupinacuna cangui.

⁵⁴ Maijan aillu achca cacpica, achca allpata, cutin ashalla cacpica, asha allpata cungui. Tucuimanmi mashna cashcata ricushpa allpataca cana can.

⁵⁵ Chai allpataca suerteta ruhuashpami paicunapac ñaupa taitacunapac shuticuna ima shina cashca shinallatac chaupinacunga.

⁵⁶ Suerteta ruhuashpami achca cashpaca, achcapura, cutin ashalla cashpaca ashapura japingacuna» nirca.

Levitacunata yupashcamanta

⁵⁷ Levita ailluta catishpa yupashcaca caicunami: Gersonmantaca gersonita aillu, Cohatmantaca cohanita aillu, Merarimantaca merarita aillumi carca.

⁵⁸ Levitapac ailluca libnita aillu, hebronita aillu, mahlita aillu, musita aillu, coreíta aillumi carca. Cohatca Amram churitami charirca.

⁵⁹ Amrampac huarmica Levipac ushi Jocabedmi carca. Paica Leví Egiptopi cacpimi huacharirca. Amrampac huarmi Jocabedca Aaronta, Moisestami charirca.

⁶⁰ Aaronca Nadab, Abiú, Eleazar, Itamar churicunatami charirca.

⁶¹ Shina cashpapish Nadab, Abiuca Mandac Diosman manapish cushpa rupachinata rupachishcamantami paicunapish rupashpa huañurca.

⁶² Tucui levitapuramanta caricunata shuc quillata charicmanta huichaiman yupashcaca ishcai chunga quimsa huarangami carca. Paicuna israelcuna shinallatac allpata mana japigricucpimi, mana israelcunahuan tandachishpa yupashca carca.

Calebpish, Josuepish mana huañushcamanta

⁶³ Moisespish, Eleazar curapish tucui israelcunatami Jericó chimba ladopi cac Jordán yacu ladopi tiyac Moab pambapi yuparca.

⁶⁴ Sinaí urcu ladopi tiyac shitashca pambapi Moisespish, Aarón curapish israelcunata yupashca israelcunaca shucllapish mana tiyarcachu.

⁶⁵ Paicunataca Mandac Diosllatacmi: «Shitashca pambapi huañungacuna» nishca carca. Chashnami tucui huañushca carca. Ashtahuanpish Jefonepac churi Caleb, Nunpac churi Josuellami saquirishca carca.