NÚMEROS 25 - Dios Rimashcata Quillcashcami

Israelcuna Baal-peor diosta adorashcamanta

¹ Israelcunaca Sitimpimi causacurca. Chaipimi Moabpi causac huarmicunahuan huainayai callarirca

² Chai huarmicunami paicunapac yanga diosman animalcunata cushpa, rupachingapac israelcunata cayac carca. Chaipimi israelcunaca micushpa, yanga dioscunapac ñaupapi cumurirca.

³ Chashnami israelcunaca Baal-peor diosta adorarca. Chaimantami Mandac Diosca israelcunahuanca nina japiric shina piñarirca.

⁴ Mandac Diosca Moisestaca: «Tucui israelcunata pushaccunata tandachishpa, inti achicyachicuc horas ñuca ñaupapi tucuita sipishpa huañuchi. Chashna huañuchicpimi, israelcunamanta nina ruparic shina piñachishcataca pasachisha» nirca.

⁵ Shina nicpimi, Moisesca israelcunapac juezcunataca: «Tucui cancunami Baal-peor diosta adorac runacunataca huañuchina canguichic» nirca.

⁶ Israelpuramanta shuc runaca shuc madianita huarmita pushashpami Moisespish, israelcunapish ricucucpi, paipac huauquicunapacman chayarca. Chai horasca israelcunaca Dios-huan tupana huasi yaicunapimi huacacurca.

⁷ Chaita ricushpami, Aarón curapac churi Eleazarpac churi Fineasca israelcunapac chaupimanta jatarishpa, shuc lanzata maquipi apashca,

⁸ Israel runata carpa huasiman catirirca. Chaipimi Israel runatapish, chai huarmitapish ishcaitatac lanzahuan huicsapi pasachinacushpa huañuchirca. Chashna ruhuacpimi, israelpurapica huañuchic ungüica pararirca.

⁹ Chai huañuipica ishcai chunga chuscu huaranga israelcunami huañurca.

¹⁰ Chaipimi Mandac Diosca Moisestaca:

¹¹ «Aaronpac churi Eleazarpac churi Fineasca ñuca piñaric shinallatac piñarishpa, huañuchishpami israelcunapac chaupimantaca ñuca rabiata anchuchishca. Chaimantami ñucaca israelcunata mana tucuchini.

¹² Chaimanta paitaca: “Cushi causai tiyachunmi ñucaca paihuan ari ninacuita ruhuani.

¹³ Huahua huahuacunapish huiñaita cura cachunmi ari ninacuita pactachisha. Mandac Dios piñaric shinallatac piñarishpami israelcunapac juchata anchuchingapac chai runata huañuchishca” ningui» nirca.

¹⁴ Madianita huarmihuan huañuc Israel runaca Simeonpac huasi ucupurata pushac Salupac churi Zimrimi carca.

¹⁵ Chai huañuc madianita huarmica madianitapac huasi ucupurata pushacpac ushi Cozbimi carca.

¹⁶ Mandac Diosca Moisestaca:

¹⁷ «Madianitacunata rabiachishpa macashpa huañuchi.

¹⁸ Paicunaca allita umanata yachashpami cancunataca Baal-peor diosta adorachishpa umarca. Shinallatac madianitapac huasi ucupurata pushacpac ushi Cozbimi huarmipish pandachircami. Paica Baal-peor diosta adoracushcamanta huañuchicuc punzhapimi huañurca» nirca.