NÚMEROS 24 - Dios Rimashcata Quillcashcami

¹ Mandac Diospac ñaupapi israelcunata bendiciashcaca allimi nishpami Balaamca, mana utcapi shina, brujocunapac catishpa, ashtahuanpish shitashca pambata tigrarishpa ricurca.

² Balaam huichailla ricushpaca, israelcuna cada aillu chican chican tiyacuctami ricurca. Chaipimi Diospac Espíritu paipacman shamurca.

³ Chashna shamucpimi, Balaamca yuyarina rimaicunahuan huillashpaca: «Beorpac churi Balaammi rimacun. Allita ricuc runami rimacun.

⁴ Dios rimashcata uyac, Imatapish ruhuac Dios muscuipi ricuchishcata ricucuc, urmashpapish mana urmac runami:

⁵ ¡Jacobopac churicunapac sumac carpa huasicunalla! ¡Israelcunapac causana sumac pushtulla!

⁶ Jatun yacu tendirishpa ricuc shina, yacu lado huerta shinami ricurin. Mandac Dios tarpushca áloes yura shina, yacu lado cedro yura shinami cangui.

⁷ Jicharicuc yacu shinami cangui. Paicunapac miraicunapish achca yacutami charinga. Paicunapac mandacca Agagtapish yallimi canga. Paicuna mandana llactapish jatunyachishcami canga.

⁸ Egiptomanta llucchimuc Diosca huagra shina fuerzasapami. Paita piñaccunataca huashicuc shinami tucui tucuchinga. Tullucunacamanmi tucui tucuchinga. Flechacunahuanmi huañuchinga.

⁹ León samarishpa siricuc shinami. Mama león sueñushpa siricucpica, ¿pitac ricchachingayari? ¡Paicunata bendiciaccunaca bendiciashca cachun! ¡Cutin paicunata maldiciaccunaca maldiciashca cachun!» nirca.

Ima tucunata Balaam huillashcamanta

¹⁰ Chashna nicta uyashpa, Balac piñarishpa maquita huactarishpa Balaamtaca: —¡Cantaca, ñucata piñaccunata maldiciachunmi cayachun cacharcani! ¡Ashtahuanpish canca quimsa cutinmi paicunataca bendiciashcangui!

¹¹ ¡Cunanca cambac llactaman cutilla! Cantaca: “Allimi cangui” nigricurcanimi. Shina nigricucpipish Diosmi jarcachishca— nirca.

¹² Shina nicpimi Balaamca: —¿Ñucaca manachu can cachashca mandaccunataca:

¹³ “Balac paipac jatun huasi junda curita, cullquita cucpipish, Mandac Dios ama ruhuachun nishcataca mana ruhuashachu. Allitapish, mana allitapish, imatapish ñuca munaimantaca mana ruhuashachu, ashtahuanpish Mandac Dios nishcallatami ruhuasha” nircani?

¹⁴ Riqui, cunanca ñuca llactaman rigrinillami. Shina cacpipish, tucuri punzhacunapi israelcuna cambac llactacunapi causaccunata imata ruhuagricushcata huillangapac shamui— nirca.

¹⁵ Shina cayashpami, Balaamca yuyarina rimaicunahuan huillashpaca: «Beorpac churi Balaammi rimacun. Allita ricuc runami rimacun.

¹⁶ Dios ima nishcatapish huillac, jatun Dios imata yuyacushcatapish yachac, imatapish ruhuac Dios muscuipi shina, ricuchishcata ricuc runami rimacun. Urmashca cashpapish ñahui pascashca urmac runami rimacun.

¹⁷ Ñucaca paita cunan mana ricushpapish, quipaman ricushami. Ricushpapish mana cuchumanta ricushachu. Jacobopac churicunamantaca shuc luceromi llucshinga. Paicunamantaca jatun mandac varayucmi llucshinga. Paimi Moabpi causaccunata ringripi huactashpa, cutin Setpac churicunataca umapi llapishpa tucuchinga.

¹⁸ Edom llactatapish quichungami. Seir llactataca paicunata piñaccunami quichunga. Shina cacpipish, israelcunaca yalli sinchimi canga.

¹⁹ Jacobopac churicunamantaca shuc mandacmi llactacunapi puchushca gentecunataca tucuchinga» nirca.

²⁰ Balaam amalecitacunata ricushpa, yuyarina rimaicunahuan huillashpa: «Amalecitacunapac llactaca tucuita yallimi. Shina cashpapish tucuchishpa chingachishcami canga» nirca.

²¹ Balaam ricushpa, yuyarina rimaicunahuan huillashpaca: «Cancunapac huasica sinchi huasicunami. Rumi quingraipi cuzha shinami canguichic.

²² Shina cashpapish tucuchishcami canga. Asiriapi causaccuna shamushpami, paicunataca tucui prezu apanga» nirca.

²³ Balaam cutinllatac yuyurina shimicunata huillashpaca: «¡Aij! Dios caicunata ruhuacpica, ¿pitac causac saquiringayari?

²⁴ Chipre llactamanta barcocuna shamushpami, Asiriapi causaccunata llaquichinga. Heberpi causaccunatapish chashnallatacmi llaquichinga» nirca.

²⁵ Chaimanta Balaam jatarishpaca, paipac llactamanmi cutirca. Shinallatac Balacpish paipac ñanta japishpa rircallami.