NÚMEROS 23 - Dios Rimashcata Quillcashcami

¹ Balaamca Balactaca: —Caipi canchis altarta shayachishpa, canchis huagrata, canchis cari ovejata huañuchishpa, caipi churai— nirca.

² Balacca Balaam nishca shinallatacmi ruhuarca. Chashnami Balacca Balaamhuan shuc huagrata, shuc cari ovejata cada altarpi churashpa rupachirca.

³ Chai quipaca Balaamca Balactaca: —Ñucaca rigrinimi. Ñuca cutingacaman cambac cushca tucui rupacuc ladopi shuyacui. Mandac Dios ñucahuan tupangapac shamungapishchari. Pai imata nicpica, huillashallami— nirca. Shina nishpaca shuc shitashca urcumanmi rirca.

⁴ Chai urcupimi Mandac Diosca Balaamhuan tupangapac shamurca. Chaipimi Balaamca: —Canchis altartami ruhuashcani. Cada altarpimi shuc huagrata, shuc cari ovejata tucui rupachini— nirca.

⁵ Chaipimi Mandac Diosca Balaampac shimipi rimaita churac shina rimashpaca: —Balacpacman cutishpa cashna nigri— nirca.

⁶ Balaam cutishpaca, Balac Moab llactata mandaccunahuan Diosman cushpa tucui rupacuc ladopi shayacuctami ricurca.

⁷ Chaipimi Balaamca yuyarina rimaicunahuan huillashpaca: «Inti llucshina ladopi tiyac Aram llactapi causacucpimi, Moab llactata mandac Balacca pushamurca. Jacobopac churi israelcunata maldiciangapac shamui nirca.

⁸ Shina cacpipish, Dios mana maldiciacpica, ¿ima shinatac maldiciashayari? Mandac Dios mana llaquichicpica, ¿ima shinatac llaquichishayari?

⁹ Ñucaca jatun urcu patamantapish, lomacunamantapish israelcunataca paicunalla causac cashcatami ricuni. Paicunaca shuctac llactacunahuanpish mana chapuriclla gentecunami nini.

¹⁰ Jacobomanta mirarishca tiyu shina achca israelcunataca, ¿pitac yachangayari? Chuscupi chaupishcatapish, ¿pitac yupai pudingayari? ¡Ñucaca cashcata ruhuac shina, huañushpachari alli caiman! ¡Paicuna shina tucurishpachari alli caiman!» nirca.

¹¹ Shina nicpimi, Balacca Balaamtaca: —¿Imatatac ruhuacungui? Ñucata piñaccunata maldiciachunmi pushamurcani. Chaipac randica paicunata bendiciashcanguimi— nirca.

¹² Shina nicpimi Balaamca: —¿Manachu Mandac Dios rimachun nishcallata rimana cani?— nirca.

¹³ Shina nicpimi Balacca: —Cunanca, maimantami israelcunata ricunallaman jacu. Chaimantaca mana tucui israelcunata ricunguichu. Ashallatami ricungui. Chaicunata maldiciangui— nirca.

¹⁴ Shina nishpami Balaamtaca Zofim pambapi tiyac Pisga urcuman pusharca. Chaipimi canchis altarta ruhuashpa, cada altarpi shuc huagrata, shuc cari ovejata tucui rupachirca.

¹⁵ Chaipimi Balaamca Balactaca: —Caipi tucui rupachicuc ladopi shuyai. Ñucaca chaipi Mandac Dios-huan tupangapacmi rini— nirca.

¹⁶ Mandac Dios Balaamhuan tupangapac shamushpa, Balaampac shimipi shuc rimaita churac shina rimashpaca: —Balacpacman cutishpa, cashna nigri— nirca.

¹⁷ Balaam cutimushpaca, Balac Moab llactata mandaccunandi tucui rupacuc ladopi shayacuctami ricurca. Chaipimi Balacca: —Mandac Diosca, ¿imatatac nin?— nirca.

¹⁸ Chashna tapucpimi, Balaamca yuyarina rimaicunahuan huillashpaca: «Ziporpac churi Balac jatarishpa, ñuca nishcata allita uyaiyari.

¹⁹ Diosca mana aichayuc runa shina llullacchu. Paica mana runapac churi shina, quipata pandarishcanimi nicchu. Paica imata ruhuasha nishpaca, ¿manachu ruhuangatac? Imata nishcataca, ¿manachu pactachinga?

²⁰ Paimi israelcunataca bendiciachun nirca. Pai bendiciashcataca ñucaca mana tigrachi pudinichu.

²¹ Jacobopac churi israelcunapica ima juchata mana ricushcanichu. Ima millaitapish mana ricushcanichu. Mandac Diosca paicunahuanmi. Paitaca: “Jatun mandacmi cangui” nishpami caparincuna nirca.

²² Egiptomanta llucchimuc Diosca huagra shina fuerzasapami.

²³ Jacobopac churi israelcunataca ima brujeriatapish, ima shuctac millaicunatapish mana ruhuai pudinchu. Jacobopac churi israelcunataca: “¡Diosca yalli allitami ruhuashca!” ningacunami.

²⁴ Cai gentecunaca León huacac shinami jatarin. Leonca ima animalta japishpa, yahuarta ubiangacamanmi mana samarin. Chai shinami cai gentecunaca jatarin» nirca.

²⁵ Chaimantami Balacca Balaamtaca: —Paicunata mana maldiciai pudishpaca, ¡ama bendiciaichuyari!— nirca.

²⁶ Balac shina nicpimi Balaamca: —¿Manachu ñucaca Mandac Dios imata nishcallata ruhuasha nircani?— nirca.

²⁷ Shina nicpimi, Balacca Balaamtaca: —Cunanca shuctac ladoman jacu, chai ladomanta israelcunata maldiciashcaca, Diospac ñaupapi alli cangapishchari— nirca.

²⁸ Shina nishpami Balacca Balaamtaca tucui shitashca pambata ricunalla Peor urcu jahuaman pusharca.

²⁹ Chaipimi Balaamca Balactaca: —Caipi canchis altarcunata ruhuashpa, canchis huagrata, canchis cari ovejatapish allichi— nirca.

³⁰ Balacca Balaam nishca shinallatacmi cada altarpi shuc huagrata, shuc cari ovejata rupachirca.