NÚMEROS 21 - Dios Rimashcata Quillcashcami

Israelcuna jatun mandac Aradta atishcamanta

¹ Neguev llactapi causac Arad llactata jatun mandac Canaán llactamanta runaca Atarimman rina ñanta israelcuna shamucucta uyashpami macanacungapac llucshirca. Shina macanacushpami maijan israelcunataca prezurca.

² Chaimantami israelcunaca Mandac Diostaca: «Chai llactapi causaccunata ñucanchic maquipi churacpica, tucui llactacunatami tucuchishun» nirca.

³ Mandac Diosca israelcuna mañashcata uyashpa, cananeocunata paicunapac maquipi churacpimi, tucui chaipi causaccunatapish, llactacunatapish tucuchirca. Chaimantami chai llactaca Horma shuti saquirirca.

Broncemanta culebrata ruhuashcamanta

⁴ Chai quipaca israelcunaca Hor urcumanta llucshishpami, Edom llactata muyungapac Puca Cuchaman rina ñanta rirca. Chashna yallita purishpa, ña mana ashtahuan risha nishpami,

⁵ Mandac Diostapish, Moisestapish rimarishpaca: «¿Imapactac ñucanchicta Egiptomanta cai shitashca pambapi huañuchun llucchimurcanguichic? Caipica yacupish, micunapish mana tiyanchu. Cai micunataca ña mana micunayanchu» nirca.

⁶ Shina nicpimi, Mandac Diosca israelcunapac chaupiman huañuchic culebracunata cacharca. Chai culebracuna canicpimi, tauca israelcuna huañurca.

⁷ Chaimantami israelcuna Moisespacman rishpaca: «Ñucanchicca Mandac Diostapish, cantapish rimarishpami juchallishcanchic. Cunanca tucui cai culebracuna ñucanchic chaupimanta anchurichun, Mandac Diosta mañashpa cui» nirca. Chashna nicpimi, Moisesca tucui israelcunamanta Diosta mañarca.

⁸ Chaimantami Mandac Diosca Moisestaca: «Huañuchic culebralayata ruhuashpa, banderata huarcuna caspipi churai. Maijanpish culebra canishca cashpa, chai culebrata ricushpaca, mana huañungachu» nirca.

⁹ Shina nicpimi, Moisesca broncemanta culebralayata ruhuashpa bandera huarcuna caspipi churarca. Maijanpish culebra canicpica, chai culebratami ricuc carca. Shina ricushpaca, mana huañucchu carca.

Moab llactata israelcuna muyushcamanta

¹⁰ Israelcuna chaimanta rishpaca, Obot pushtupimi carpata shayachishpa tiyarirca.

¹¹ Obotmanta rishpaca, Moab llacta chimba ladopi cac shitashca pamba Iye-abarimpimi tiyarirca. Chai pambaca inti llucshina ladomanmi carca.

¹² Chaimanta rishpaca, Zered pambapimi tiyarirca.

¹³ Chaimanta rishpaca, Arnón jatun yacu lado shitashca pambapimi carpata shayachishpa tiyarirca. Chai yacuca amorreocunapac allpamantami llucshicurca. Chai jatun yacumi Moab llactahuan amorreocunapac llactahuan linderoca.

¹⁴ Chaimantami Mandac Diospac macanacuimanta quillcashca libropica: «Puca Cuchatapish, Arnón yacutapish pasarcanchicmi.

¹⁵ Jatun yacu tandarishpa ricuc ladopipish ayudarcami. Chai yacuca Ar llactata rishpami, Moab llacta linderopi samarin» nicun.

¹⁶ Chaimantaca Beermanmi rirca. Chaipimi Mandac Diosca Moisestaca: «Yacuta cungapac tucui israelcunata tandachi» nirca.

¹⁷ Chaipi israelcuna cantashpaca: «¡Yacu llucshic jundulla, yacuta cuiyari! ¡Diosta cantaichicyari!

¹⁸ Mandaccunami varahuan allarca. Mandashcacunata cuccunami paicunapac tauna caspihuan allarca» nirca. Shitashca pambamanta Mataná pushtumanmi chayarca.

¹⁹ Matanamantaca Nahaliel pushtumanmi chayarca. Nahalielmantaca Bamotmanmi chayarca.

²⁰ Bamotmantaca Moab llacta pambaman chayashpami, Pisga urcu jahuaman chayarca. Chai urcumantaca shitashca pambata ricunallami carca.

Israelcuna jatun mandac Sehonta atishcamanta

²¹ Israelcunaca amorreocunata jatun mandac Sehonpacmanmi huillaccunata cacharca. Paicunata cachashpaca:

²² «Cambac llactata pasachun saqui. Cambac allpa jahuatapish, uvas chagra jahuatapish mana rishunchu. Junducunamantapish mana yacuta ubiashunchu. Lluquimanpish, allimanpish mana ladoyashpami, jatun ñanllata pasashun ningui» nirca.

²³ Jatun mandac Sehonca israelcunataca paipac llactata mana pasachircachu. Ashtahuanpish tucui gentecunata tandachishpami, Jahazman chayashpa, israelcunahuan macanacurca.

²⁴ Shina cacpipish, israelcunaca espadacunahuan macashpami, Arnón yacumanta, Amón llacta Jaboc jatun yacucaman rishpa, allpata japirca. Amón llacta linderoca alli jarcashcami carca.

²⁵ Chashnami israelcunaca tucui llactacunata quichushpa, amorreocuna causana tucui pueblocunapi causarca. Hesbón llactatapish, chai muyundi uchilla llactacunatapish quichurcami.

²⁶ Hesbón llactaca amorreocunata jatun mandac Sehón causanami carca. Paica Moab llactata jatun mandac-huanmi macanacushpa, tucui allpataca Harnón yacucaman quichushca carca.

²⁷ Chaimantami rimaicunata allichiccunaca: «Jatun mandac Sehonpac causana Hesbón llactaman shamuichicyari. Chai llactata allichishpa, cutin shayachichicyari.

²⁸ Hesbón llactamantaca ninami llucshirca. Jatun mandac Sehonpac llactamanta cunyacuc nina llucshishpami, Moab llactapi tiyac Ar llactata tucuchirca. Arnón yacu jahua ladopi causac mandaccunatapish tucuchircami.

²⁹ ¡Aij, Moab llactalla! Quemos diosta adoraccunaca tucurishcami. Paipac churicunaca miticushpami callparca. Paipac ushicunataca amorreocunata jatun mandac Sehonmi prezurca.

³⁰ Cambac huahua huahuacunaca Hesbón llactamantaca Dibón llactacamanmi tucurirca. Nófa pueblomantaca Medeba llactacamanmi tucurirca» nishpa cantarca.

Israelcuna Basán llactata jatun mandacta atishcamanta

³¹ Israelcunaca amorreocunapac llactatami japirca.

³² Moisesca Jazer llactata ricuchunmi maijan gentecunata cacharca. Chai llactaca muyundi uchilla llactacunandi quichushpami, amorreocunata llucchishpa cacharca.

³³ Chaimanta cutishpaca, Basán llactaman rina ñantami huichaiman rirca. Paicuna chaita ricucpimi, Basán llactata jatun mandac Ogca tucui paipac gentecunahuan Edreipi macanacungapac llucshirca.

³⁴ Chaipimi Mandac Diosca Moisestaca: «Ama manchaichu. Ñucami chai jatun mandactaca paipac tucui gentecunandi, paipac tucui llactacunandi cambac maquipi churarcani. Canca paicunataca Hesbonpi causac amorreocunata jatun mandac Sehonta ruhuashca shinallatacmi ruhuangui» nirca.

³⁵ Shina nicpimi, israelcunaca jatun mandac Ogta, paipac churicunandi, paipac gentecunandi shucllatapish mana saquishpa, tucui huañuchirca. Shina huañuchishpami paicunapac llactataca tucui japirca.