NÚMEROS 20 - Dios Rimashcata Quillcashcami

Jatun rumimanta yacu llucshishcamanta

¹ Tandanacushca israelcunaca callari quillapimi Zin shitashca pambaman chayashpa, Cadespi tiyarirca. Moisespac pani Mariaca chaipimi huañurca. Chashna huañucpica, chaillapitacmi enterrarca.

² Chai llactapi yacu mana tiyashcamantami tucui israelcunaca Moisestapish, Aarontapish rimarirca.

³ Israelcunaca Moisestaca: «¡Mandac Diospac ñaupapi ñucanchic huauquicuna huañui horasllatac huañushca cashpachari alli canchicman carca!

⁴ Cai shitashca pambapi ñucanchicpish, ñucanchic animalcunapish huañuchunca, ¿imapactac Mandac Dios acllashca israelcunataca apamurcangui?

⁵ ¿Ima nishpatac ñucanchictaca Egiptomanta cai shitashca manchana pambaman pushamurcangui? Cai allpapica higopish, uvaspish, granadapish mana pucunchu. ¡Yacullapish mana tiyanchu!» nirca.

⁶ Chaimantami Moisespish, Aaronpish paicunapac ñaupamanta anchurishpa, Mandac Dios-huan tupana huasiman rirca. Chaipimi carpa huasi yaicunapi pambacaman cumurirca. Chaipica Mandac Diospac sumaimana achicmi ricurirca.

⁷ Mandac Diosca Moisestaca:

⁸ «Cambac varata japishpa, cambac huauqui Aaronhuan ishcai tucushpa, tucui israelcunata tandachishpa, paicunapac ñaupapi jatun rumita rimai. Shina rimacpica, chai rumimantaca yacumi llucshinga. Chai yacutaca israelcunamanpish, paicunapac animalcunamanpish ubiachingui» nirca.

⁹ Shina nicpica, Moisesca Mandac Dios mandashca shinallatacmi paipac ñaupamanta varata japirca.

¹⁰ Chaimantaca Moisespish, Aaronpish tucui israelcunata ñaupapi tandachishpaca: «¡Mana cazuc israelcuna uyaichic! Cancuna ubiachunca cai rumi quingraimantami yacuta llucchigrinchic» nirca.

¹¹ Chashna nishpami, Moisesca maquita alzashpa, paipac varahuan ishcai cutin rumi quingraipi huactarca. Chashna huactacpica, achca yacumi llucshirca. Chai yacutami tandanacushca israelcunapish, paicunapac animalcunapish ubiarca.

¹² Mandac Dios Moisestapish, Aarontapish rimashpaca: «Cancunaca ñucata mana crircanguichicchu, ñuca jucha illac cashcatapish israelcunaman mana ricuchircanguichicchu. Chaimantami cancunaca ñuca cushca llactamanca tandanacushca israelcunahuanca mana yaicunguichic» nirca.

¹³ Chaipi israelcuna Mandac Dios-huan piñanacushcamantami chai yacutaca Meriba yacu nirca. Chaipimi Mandac Diosca paicunapurapica jucha illac cashcata ricuchirca.

Edomitacuna israelcunata mana pasachisha nishcamanta

¹⁴ Cadesmantami Moisesca huillaccunata Edom llactata jatun mandacpacman cacharca. Paicunataca: «Cambac huauqui Israelca: “Ñucanchicta tucui llaquicuna japishcataca yachanguimi.

¹⁵ Ñucanchic ñaupa taitacunaca Egiptoman rishpa, chaipi tauca huatata causashcata, chai gentecuna ñucanchictapish, ñucanchic taitacunatapish ima shina llaquichishcata yachanguimi.

¹⁶ Chaimantami ñucanchic Mandac Diostaca caparishpa mañarcanchic. Chashna mañacpica, Mandac Dios uyashpami paipac angelta Egiptomanta llucchichun cacharca. Cunanca cambac llacta lindero cuchulla Cadespimi canchic.

¹⁷ Chaimanta cambac llactata pasachun saqui. Cambac allpa jahuatapish, uvas chagra jahuatapish mana rishunchu. Junducunamantapish mana yacuta ubiashunchu. Lluquimanpish, allimanpish mana llucshishpami, purina jatun ñanllata pasashun” ninguichic» nirca.

¹⁸ Shina nicpimi, Edom llactata mandacca: —Ñuca llactataca mana pasachishachu. Cancuna pasai callaricpica, ñuca soldadocunahuanmi macangapac llucshisha— nirca.

¹⁹ Shina nicpimi israelcunaca: —Ñucanchicca jatun ñanllatami rishun. Ñucanchic yacuta ubiashpa, shinallatac ñucanchic animalcuna cambac junducunamanta yacuta ubiacpica pagashunllami. Ashtahuanpish chaquilla pasangapaclla cambac ñanta mañachi— nirca.

²⁰ Ashtahuanpish Edom llactata jatun mandacca: —Ñuca llactataca manatac pasanguichicchu— nirca. Shina nishpami, Edom llactata jatun mandacca paipac soldadocunahuan allichirishpa, israelcunahuan macanacungapac llucshirca.

²¹ Edom llactata jatun mandac manatac pasachisha nicpimi, israelcunaca shuc ñanta rirca.

Aarón huañushcamanta

²² Tandanacushca israelcunaca Cadesmanta llucshishpaca, Hor urcumanmi chayarca.

²³ Mandac Dios Edom llacta linderopi cac Hor urcupi Moisestapish, Aarontapish rimashpaca:

²⁴ «Aaronca huañushpa ñaupa aillucunahuan tandarigrinmi. Paica israelcunaman ñuca cushca llactamanca mana yaicungachu. Meriba yacupi ñuca mandashcata mana cazushcamantami chai llactamanca mana yaicunga.

²⁵ Cunanca can Moisesca Aaronta shinallatac paipac churi Eleazarta Hor urcuman pushai.

²⁶ Chaiman chayashpaca Aaronpac churanata llucchishpa, paipac churi Eleazarman churachi. Chaipimi Aaronca huañushpa, ñaupa aillucunahuan tandarigringa» nirca.

²⁷ Moisesca Mandac Dios mandashca shinallatacmi tucui israelcuna ricucucpimi, Hor urcuman huichai rirca.

²⁸ Chaiman chayashpaca, Moisesca Aaronpac churanata llucchishpami paipac churi Eleazarman churachirca. Aaronca chai urcu jahuapimi huañurca. Chai quipaca Moisespish, Eleazarpish chai urcumanta urai shamurcami.

²⁹ Tandanacushca israelcuna Aarón ña huañushcata yachashpaca, tucuimi quimsa chunga punzhata duelo carca.