NÚMEROS 2 - Dios Rimashcata Quillcashcami

Israelcuna maipi carpacunata shayachinamanta

¹ Mandac Dios Moisestapish, Aarontapish rimashpaca:

² «Israelcunaca ñucahuan tupana huasi muyundipimi carpacunata shayachishpa, quiquin banderacunahuan, quiquin aillupura tiyarina can.

³ Judapac aillumanta soldadocunaca inti llucshina ladopimi carpacunata shayachishpa, quiquin banderahuan tiyaringa. Paicunataca Aminadabpac churi Naasonmi mandanga.

⁴ Shinallatac paicunaca canchis chunga chuscu huaranga sucta patsacmi canga.

⁵ Paicunapac cuchullapica Isacarpac aillumanta soldadocunami carpacunata shayachishpa tiyaringa. Paicunataca Zuarpac churi Natanaelmi mandanga.

⁶ Cutin paicunaca pichca chunga chuscu huaranga chuscu patsacmi canga.

⁷ Paicunapac cuchullapica Zabulonpac aillumanta soldadocunami carpacunata shayachishpa tiyaringa. Paicunataca Helonpac churi Eliabmi mandanga.

⁸ Cutin paicunaca pichca chunga canchis huaranga chuscu patsacmi canga.

⁹ Judapac carpacunamanta soldadocunaca patsac pusac chunga sucta huaranga chuscu patsacmi canga. Paicunami israelcunata ñaupashpa ringa.

¹⁰ Rubenpac aillumanta soldadocunaca ura ladopimi quiquin banderahuan carpacunata shayachishpa tiyaringa. Paicunataca Sedeurpac churi Elisurmi mandanga.

¹¹ Cutin paicunaca chuscu chunga sucta huaranga pichca patsacmi canga.

¹² Paicunapac cuchullapica Simeonpac aillumanta soldadocunami carpacunata shayachishpa tiyaringa. Paicunataca Zurisadaipac churi Selumielmi mandanga.

¹³ Cutin paicunaca pichca chunga iscun huaranga quimsa patsacmi canga.

¹⁴ Paicunapac ladopica Gadpac aillumanta soldadocunami tiyaringa. Paicunataca Reuelpac churi Eliasafmi mandanga.

¹⁵ Cutin paicunaca chuscu chunga pichca huaranga sucta patsac pichca chungami canga.

¹⁶ Rubenpac carpacunapi tucui yupashca soldadocunaca patsac pichca chunga shuc huaranga chuscu patsac pichca chungami canga. Paicunami puntaniqui soldadocunapac huashata ringacuna.

¹⁷ Chai quipaca ñucahuan tupana huasitami levitacuna apashpa ringa. Ima shinami carpacunapi cashca shinallatacmi chai soldadocunaca quiquin banderahuan catinacushpa ringacuna.

¹⁸ Efrainpac aillumanta soldadocunaca inti yaicuna ladopimi quiquin banderahuan carpacunata shayachishpa tiyaringa. Paicunataca Amihudpac churi Elisamami mandanga.

¹⁹ Cutin paicunaca chuscu chunga huaranga pichca patsacmi canga.

²⁰ Paicunapac ladopica Manasespac aillumanta soldadocunami carpacunata shayachishpa tiyaringa. Paicunataca Pedasurpac churi Gamalielmi mandanga.

²¹ Cutin paicunaca quimsa chunga ishcai huaranga ishcai patsacmi canga.

²² Paicunapac cuchullapica Benjaminpac aillumanta soldadocunami carpacunata shayachishpa tiyaringa. Paicunataca Gedeonipac churi Abidanmi mandanga.

²³ Cutin paicunaca quimsa chunga pichca huaranga chuscu patsacmi canga.

²⁴ Efrainpac carpacunapi cac soldadocunaca patsac pusac huaranga shuc patsacmi canga. Paicunami ishcainiqui soldadocunapac huashata ringacuna.

²⁵ Danpac aillumanta soldadocunaca jahua ladopimi quiquin banderahuan carpacunata shayachishpa tiyaringa. Paicunataca Amisadaipac churi Ahiezermi mandanga.

²⁶ Cutin paicunaca sucta chunga ishcai huaranga canchis patsacmi canga.

²⁷ Paicunapac ladopica Aserpac aillumanta soldadocunami carpacunata shayachishpa tiyaringa. Paicunataca Ocranpac churi Paguiel mandanga.

²⁸ Cutin paicunaca chuscu chunga shuc huaranga pichca patsacmi canga.

²⁹ Paicunapac ladopica Neftalipac aillumanta soldadocunami carpacunata shayachishpa tiyaringa. Paicunataca Enanpac churi Ahirami mandanga.

³⁰ Cutin paicunaca pichca chunga quimsa huaranga chuscu patsacmi can.

³¹ Danpac carpacunapica patsac pichca chunga canchis huaranga sucta patsac soldadocunami canga. Paicunaca banderacunapac huashatami ringacuna» nirca.

³² Huasi ucupurata catishpa, tucui israelcunata yupashcaca sucta patsac quimsa chunga huaranga pichca patsac pichca chunga soldadomi carca.

³³ Moisesta Mandac Dios mandashca shinallatacmi levitacunataca israelcunahuan mana tandachishpa yuparca.

³⁴ Israelcunaca Moisesta Mandac Dios mandashca shinallatacmi tucuita ruhuarca. Paicunaca aillu, huasi ucupura ima shina cashca shinallatacmi bandera ladopi causarca. Chaimanta rina tucucpipish, chashnallatacmi ric carca.