NÚMEROS 19 - Dios Rimashcata Quillcashcami

Mapayashca cashpa chuyayanamanta

¹ Mandac Diosca Moisestapish, Aarontapish rimashpaca:

² «Mandac Dios ñuca israelcunata mandashpaca: “Ima mana tucushca, manarac yugoshca puca vacata apamuichic.

³ Chai vacataca Eleazar curaman cunguichic. Paimi carpa huasimanta canzhaman llucchishpa, paipac ñaupapi huañuchichinga.

⁴ Eleazar curami paipac dedota chai yahuarpi satishpa, ñucahuan tupana huasi ñaupa ladopi canchis cutin chirapanga.

⁵ Chai quipaca vaca aichatapish, caratapish, huanutapish rupachinga.

⁶ Curaca cedro caspitapish, hisopotapish, puca telatapish japishpami, vaca rupacuc ninapi shitanga.

⁷ Chaimantaca paipac churanata tacshashpa, paipish armarishpami paipac causana carpa huasiman yaicunga. Chashna cashpapish tutayangacamanmi mapa canga.

⁸ Chai vacata rupachic runapish churanata tacshashpa, yacuhuan armarina can. Shinallatac tutayangacamanmi mapa canga.

⁹ Chai quipaca shuc mapa illac runami uchupataca carpa huasimanta llucchishpa, chuyanlla pushtupi churanga. Chaitaca tandanacushca israelcunami yacupi churangapac huacaichinga.

¹⁰ Uchupata pallac runapish paipac churanata tacshanami can. Shinallatac tutayangacamanmi mapa canga. Cai mandashcataca israelcunapish, shuctac llactamanta shamushpa, paicunahuan causaccunapish huiñaita pactachichun mandashcami.

¹¹ Maijanpish, huañushcapi tuparishpaca canchis punzhacamanmi mapa canga.

¹² Paica quimsa punzhapi, canchis punzhapi chuyayana yacuhuan armarishpami chuya saquiringa. Quimsaniqui punzhapish, canchisniqui punzhapish mana armarishpaca mapallatacmi canga.

¹³ Maijanpish huañushcapi tuparishpa, mana armarishca cashpa ñucahuan tupana huasitami mapayachin. Chai runapac cuerpopi chai chuyayana yacu mana chayashca cashcamantaca israelcunapuramanta anchuchishcami canga. Chashna mana chuyayashcamantaca mapallatacmi saquiringa.

¹⁴ Carpa huasipi maijan huañucpica, caitami ruhuana can: Tucui carpa ucupi caccunapish, chaiman yaicuccunapish canchic punzhacamanmi mapa canga.

¹⁵ Tucui imapish mana alli tapashca cashpaca, mapami canga.

¹⁶ Espadahuan huañuchishca mai pambapi siricucpi, mana cashpaca ungüihuan huañushcapi, mana cashpaca huañushcapac tullupi, mana cashpaca huañushcata enterrashcapi tuparishpaca, canchis punzhacamanmi mapa canga.

¹⁷ Chashna mapayashpaca juchata pichachun rupachishca vaca uchupata japishpami shuc tinapi churashpa, callpac yacuta churanga.

¹⁸ Chai yacupica mapa illac runami hisopota japishpa, chai yacupi jucuchishpa, carpa huasipipish, chaipi tucui tiyaccunapipish chirapanga. Chashnallatacmi huañushcapac tullupi, mana cashpaca huañushcapi, mana cashpaca huañuchishcapi, mana cashpaca enterrashcapi tuparishca runapi chirapanga.

¹⁹ Mapa illac runami quimsa punzhapi, canchis punzhapi mapayashca runa jahuapi yacuta chirapanga. Shina ruhuashpaca paipish churanata tacshashpa armarinami can.

²⁰ Maijan mana chuyayashca cashpa, Mandac Diospaclla carpa huasita mapayachishcamantami tandanacushca israelcunapuramanta anchuchishca canga.

²¹ Cai mandashcacunaca cancuna huiñaita pactachichun mandashcami. Yacuhuan mapa illacta ruhuac runapish paipac churanata tacshanami can. Maijanpish mapa illacta ruhuac yacupi tuparicca tutayangacamanmi mapa canga.

²² Mapayashca runa tuparishcaca imapipish mapami canga. Mapayashca runapi maijan tuparicpish mapami canga” ninmi nishpa mandai» nirca.