NÚMEROS 18 - Dios Rimashcata Quillcashcami

Curacunapish, levitacunapish servinamanta

¹ Mandac Diosca Aarontaca: «Ñucapaclla chicanyachishca ucuman cuchuyashpa juchallishcamantaca canpish, cambac churicunapish, cambac huasi ucupuracunapish juchayucmi tucunguichic. Cutin curacuna mana allita ruhuashcamantaca canpish, cambac churicunapish juchanchishcami canguichic.

² Ñucahuan tupana huasipi ari nishca quillcata huacaichina cajón ñaupapi servicushpaca Levipac aillupuramanta cambac huauquicunatapish ayudachun cayangui.

³ Paicunami ñucahuan tupana huasipi servishpa, can mandashcata ruhuanga. Shina cashpapish, paicuna mana huañungapacca tucui ñucapaclla chicanyachishcamanca mana cuchuyanachu can. Shinallatac ñucapaclla chicanyachishca ucumanpish mana yaicunachu can.

⁴ Paicunallami ñucahuan tupana huasipi canta ayudashpa, tucui imata ruhuana cashcata ruhuashpa, cuidashpapish cangacuna.

⁵ Cancunami ñucapaclla carpa huasitapish, altartapish cuidana canguichic. Shina cuidacpimi, cutinca israelcunahuan mana piñarisha.

⁶ Riquichic, Mandac Dios ñucami cancunapac huauqui levitacunataca israelpuramanta ñucahuan tupana huasipi ñucata servishpa cancunata ayudachun acllarcani. Ñucami paicunataca cancunata ayudachun curcani. Paicunaca ñucaman cushcami.

⁷ Altar ucupi curacuna ruhuanataca cambac churicunallahuanmi ruhuana canguichic. Shinallatac pañohuan jarcachishca ucupipish cancunallatacmi ruhuana canguichic. Maijanpish chaiman yaicushpaca huañungami. Curacuna ruhuanataca cancunamanmi cuni» ningui nirca.

Levitacuna cura tucunamanta

⁸ Mandac Diosca Aarontaca: «Riqui, ñucaman alzashpa cushca ofrendacunataca can cuidachunmi churani. Israelcuna chicanyachishpa ñucaman tucui cushcacunataca cura cashcamantaca canmi japina cangui. Caitaca huiñaipacmi cambac huahua huahuacunamanpish cuni.

⁹ Mana rupachishca ofrendacunaca ñucapaclla chicanyachishcami. Chaimantami chaicunataca can japingui. Grano ofrendapish, juchamanta cushcacunapish, mana cashpaca pandarishcamanta cushcacunapish ñucapacllami can. Chaimanta chaicunaca canmanpish, cambac churicunamanpishmi canga.

¹⁰ Chai ofrendataca caripurallami ñucapaclla chicanyachishca ucupimi micuna canguichic.

¹¹ Shinallatac israelcuna ñucaman alzashpa cushcacunapish, cuyuchishpa cushcacunapish canman, shinallatac cambac churicunaman, canhuan causac ushicunamanmi canga. Chaicunataca huiñaitami micui pudinguichic. Cambac huasipi causac ima mapa illaccunami micunga.

¹² Israelcuna ñucaman cushca punta pucushca granopish, ashtahuan mushuc alli aceitepish, mushuc alli vinopish, alli granopish canmanmi canga.

¹³ Allpapi punta pucushca grano ofrendata ñucaman cushcaca canmanmi canga. Chaicunataca cambac huasipi causac mapa illaccunami micunga.

¹⁴ Israelcuna ñucaman cungapac tucui chicanyachishcacunaca canmanmi canga.

¹⁵ Tucui punta churicunapish, animalcunapish ñucaman cushcaca canmanmi canga. Ashtahuanpish punta churipish, punta animalpish mana alli cacpica, cullquitami cuna can.

¹⁶ Chai animalcunataca huacharishca ña quilla tucucpimi, cullquita cushpa saquichina cangui. Chai animaltaca ñucahuan tupana huasipi tiyac cullqui mashna valishca shinallatacmi pichca siclos cullquita cushpa, saquichingui. Chaica ishcai chunga gerasmi can.

¹⁷ Shina cacpipish, punta vaca cacpi, oveja cacpi, chivo cacpica, cullquita cushpa mana saquichi pudinguichu. Chaicunaca ñucapaclla chicanyachishcami. Chai animalcunataca huañuchishpa yahuarta altarpi chirapangui. Cutin huirataca ñucaman mishquilla ashnachun rupachingui.

¹⁸ Shinallatac chai aichapish, Diosman cuyuchishpa cushca pecho aichapish, alli lado changa aichapish canmanmi canga.

¹⁹ Israelcuna ñucaman alzashpa tucui cushcacunaca canmanpish, cambac churicunamanpish, canhuan causac ushicunamanpishmi canga. Chaicunataca huiñaita micuchun cushcami. Chaica canmanpish, cambac huahua huahuamanpish huiñaita cungapac Mandac Diospac ñaupapi ari nishcata ricuchic cachi shinami can» nirca.

²⁰ Mandac Diosca Aarontaca: «Canca israelcunapac llactapica allpatapish mana japinguichu. Shinallatac israelcunahuanca imata mana japinguichu. Israelpurapica can japina allpa shinaca ñucami cani.

²¹ Levipac huahuacunaca ñucahuan tupana huasipimi servincuna. Chaimantami paicunamanca israelcuna chungamanta shucta ñucaman cushcacunata cuni.

²² Israelcunaca ñucahuan tupana huasimanca mana cuchuyanachu can. Paicuna chaiman cuchuyashpaca juchallishpa huañungami.

²³ Levitacunallami ñucahuan tupana huasipica servinga. Israelcuna chai ucuman yaicushpa juchallicpica, paicunami juchanchishca canga. Caica cambac huahua huahuacunamanmi huiñaita quillcashpa mandashca canga. Levitacunaca israelcunapurapica ima allpata mana japingachu.

²⁴ Paicunamanca israelcuna chungamanta shucta ñucaman alzashpa cushcatami curcani. Chaimantami israelpurapica paicunaca allpata mana japinga» nirca.

²⁵ Mandac Diosca Moisestaca:

²⁶ «Levitacunataca: “Israelcuna chungamanta shucta cushcata cancuna japishpaca, cancunapish chungamanta shucta alzashpa cunguichic.

²⁷ Cancuna cushcaca trillana pambamanta cushca shina, chagramanta vinota cushca shinami canga.

²⁸ Cancunapish israelcuna chungamanta shucta cushcataca ñucaman alzashpa cunguichic. Chai ñucaman alzashpa cushcataca Aarón curaman cunguichic.

²⁹ Tucui cancunaman cushcacunamanta ashtahuan allita acllashpa ñucaman alzashpa cungui.

³⁰ Cancuna japishcamanta ashtahuan alli ofrendata alzashpa ñucaman cushca quipaca, trillana pambapi trillashca grano shina, chagramanta vino shinami cancunapac canga.

³¹ Caicunaca cancuna ñucahuan tupana huasipi servishcamanta cushcami. Chaimanta cancunapish, cancunapac familiacunapish maipipish micunguichiclla.

³² Cancuna japishcamanta ashtahuan alli ofrendata alzashpa ñucaman cushpaca, mana paicunapac juchata aparinguichicchu. Chashna ruhuashpami israelcuna chicanyachishpa, ñucaman cushcacunata mana mapayachishpa, mana huañunguichic” ningui» nirca.