NÚMEROS 17 - Dios Rimashcata Quillcashcami

Aaronpac taunamanta

¹ Mandac Dios Moisesta rimashpaca:

² «Israel huasi ucupurata tucui pushaccunapac taunata apamuchun mandai. Taunacunaca chunga ishcaimi canga. Chai taunacunapica paicunapac quiquin shutita quillcashpa,

³ Levipac huasi ucupurata pushacpac taunapica Aaronpac shutita quillcangui. Chaica, huasi ucupurata cada pushaccunapacmi shuc tauna tiyanga.

⁴ Cai taunacunataca ñucahuan tupana huasi ucupi, ari nishca quillcata huacaichina Arca ñaupapi churangui. Chaipimi ñucaca cancunahuan tupasha.

⁵ Ñuca acllashca runapac taunaca pangashpa sisangami. Shina tucucpica, israelcunaca mana ashtahuan cancunataca ñucapac ñaupapi juchanchishpa rimangachu» nirca.

⁶ Moisés chashna mandacpica, tucui Israel huasi ucupurata pushaccunami paicunapac quiquin taunata Moisespacman apamurca. Chaipica chunga ishcai taunami carca. Chaipica Aaronpac taunapishmi carca.

⁷ Moisesca chai taunacunataca Dios-huan tupana huasipimi Mandac Diospac ñaupapi churarca.

⁸ Cayandi Moisesca Dios-huan tupana huasiman yaicucpica, Levipac huasi ucupurata pushac Aaronpac taunaca pangashpa sisashcami cashca carca. Shinallatac almendro murucuna pucushcapishmi carca.

⁹ Chaimantami Moisesca chai taunataca Mandac Diospac ñaupamantaca israelcunapac ñaupaman apamurca. Chashna apamucpimi, cada quiquinpac cashcata ricsishpa japirca.

¹⁰ Mandac Diosca Moisestaca: «Aaronpac taunataca israelcuna ñucata mana cazushcata yuyarichun, ari nishca quillcata huacaichina Arca ñaupallapitac churai. Chaica ñucata mana cazushpa rimaccunapac shuc señalmi canga. Shinallatac paicunaca ña mana huañungachu» nirca.

¹¹ Moisesca Mandac Dios mandashca shinami ruhuarca.

¹² Chaimantami israelcunaca Moisestaca: «Riqui, ¡ñucanchicca huañugrinchicmi! ¡Chingarishcami canchic! ¡Tucui ñucanchicmi chingarishca canchic!

¹³ Maijanpish Dios-huan tupana huasiman cuchuyashpaca huañungami. ¿Shinaca tucuichu huañushun?» nirca.