NÚMEROS 15 - Dios Rimashcata Quillcashcami

Diosman ofrendata cunamanta

¹ Mandac Diosca Moisestaca:

² «Israelcunataca: “Ñuca cusha nishca llactapi causangapac yaicushpa,

³ ñucaman mishquilla ashnachun vacatapish, ovejatapish cushpa, tucuita rupachishpa, mana cashpaca cushami nishcamanta cushpa, mana cashpaca quiquin munaimanta cushpa, mana cashpaca fiesta punzhapi cushpaca,

⁴ ishcai kilo alli harinahuan litro aceitehuan chapushpami apamuna can.

⁵ Ñucaman cushpa huañuchishca jahua, tucui rupachishca jahuami cada shuc ovejahuan cungapac shuc litro vinota cuna can.

⁶ Cari ovejata ñucaman cushpa rupachingapacca chuscu kilo alli harinahuan shuc litro yalli aceitehuan chapushpa cunguichic.

⁷ Ñucaman cushca mishquilla ashnachunca shuc litro yalli vinota cunguichic.

⁸ Maijanpish ñucaman cushpa rupachingapac, mana cashpaca ñucahuan alli tucungapac rupachingapac, cushami nishcamanta rupachingapacca shuc becita,

⁹ sucta kilo alli harinahuan, ishcai litro aceitehuan chapushpa cunguichic.

¹⁰ Ñucaman mishquilla ashnachun rupachingapacca ishcai litro vinota cunguichic.

¹¹ Chashnami cada becihuan, mana cashpaca cari ovejahuan mana cashpaca shuc huatayuc ovejahuan, cari chivohuanca cuna canguichic.

¹² Mashna animalta cushca cashpapish cada animalhuanmi chashna cuna canguichic.

¹³ Tucui israelcunami ñucaman mishquilla ashnachun rupachishpaca, chashna ruhuana canguichic.

¹⁴ Maijanpish shuctac llactamanta shamushpa, cancunahuan causac runa ñucaman mishquilla ashnachun rupachishpaca, cancuna shinallatacmi ruhuana can.

¹⁵ Cancunapish, shuctac llactamanta shamushpa, cancunahuan causaccunapish cai mandashcallatatacmi ruhuana canguichic. Cai mandashcaca huiñaitami cancunapacpish, cancunapac huahuacunapacpish canga. Shuctac llactamanta shamushca runapish cancuna shinallatacmi Mandac Dios ñucapac ñaupapi ruhuana can.

¹⁶ Cai mandashcallatatacmi cancunapish, caru llactamanta shamushpa, cancunahuan causaccunapish pactachina canguichic” ninmi ningui» nirca.

¹⁷ Mandac Diosca Moisestaca:

¹⁸ «Israelcunataca: “Ñuca cusha nishca llactaman yaicushpa,

¹⁹ chai llactapi pucushca granota micui callaringapacpish puntaca ñucamanrac alzashpa cunguichic.

²⁰ Trillana pambamanta ashata ñucaman cuc shinallatac tandata masashpapish ñucaman shuc tortata cunguichic.

²¹ Tandata ruhuangapac chapushpaca, puntaca ñucamanrac cunguichic. Chaitaca huahua huahuami ruhuana canguichic.

²² Ñuca Moisesman huillashca mandashcacunata mana yachashcamanta

²³ punta punzhamanta pacha cancunapish, cancunapac huahua huahuacunapish mana pactachishpa,

²⁴ juchallishcata tandanacushca israelcunapish mana yachacpica, tucui israelcunami ñucaman mishquilla ashnachun shuc becita tucui rupachina can. Mandashca shinallatacmi alli harinatapish, tallina vinotapish cuna can. Cutin juchata pichachunca shuc cari chivotami cuna can.

²⁵ Mana yachashpa juchallishcamantaca curami tucui israelcunapac juchacunata perdonachu ñucaman cunga. Chashna cucpica, perdonashcami canga. Paicunaca mana yachashcamanta juchallishcata perdonachunmi Mandac Dios ñucapac ñaupapi rupachinatapish, ofrendatapish apamunga.

²⁶ Chaipica tucui israelcunatapish, shuctac llactamanta shamushpa, cancunahuan causaccunatapish mana yachashcamanta juchallishcataca perdonashca canga.

²⁷ Maijanpish mana yachashcamanta juchallishpaca shuc huatayuc huarmi chivotami cuna can.

²⁸ Chai juchallishcamantaca curami ñucaman cunga. Shina cucpimi, ñucaca perdonasha.

²⁹ Mana yachashcamanta juchalliccunaca israelcunapish, shuctac llactamanta shamushpa paicunahuan causaccunapish shuc mandashcallatacmi charincuna.

³⁰ Ashtahuanpish israelcuna cashpa, shuctac llactamanta shamushca cashpapish yachashca jahua juchallishpaca, ñucatami llaquichin. Chashna ruhuac runaca israelcunapuramanta anchuchishcami canga.

³¹ Ñuca rimashcata mana chasquishcamanta, mandashcacunata mana cazushcamantami chai runaca anchuchishca canga. Paipac juchamantaca paillatacmi llaquita apanga” ninmi ningui» nirca.

Samana punzhapi mana samaricpi llaquichinamanta

³² Israelcuna shitashca pambapi causacushpami samana punzhapi shuc runata yantacucta japirca.

³³ Chaimantami Moisespac, Aaronpac, israelcunapac ñaupamanmi aparca.

³⁴ Shina apashpaca, paita imata ruhuana cashcata manarac yuyarishca cashcamantami carcelpi churarca.

³⁵ Chashna cacpimi, Mandac Dios Moisesta rimashpaca: «Carpa huasimanta canzhaman llucchishpa, rumihuan shitashpa huañuchichic» nirca.

³⁶ Chashna nicpimi, tandanacushca israelcunaca carpa huasimanta canzhaman apashpa, Mandac Dios Moisesta nishca shinallatac huañungacaman rumihuan shitarca.

Puchca fleco murucunayucta ruhuashcamanta

³⁷ Cutinllatac Mandac Diosca Moisestaca:

³⁸ «Israelcunataca: “Cancunapac huahua huahuacunacaman churana chaquipi flecosyucta ruhuashpa, chaicunapica morado puchcamanta murucunata ruhuashpa huarcuchinguichic.

³⁹ Chai flecoscunapi murucunata huarcuchishcata ricushpaca, ñuca mandashcacunata pactachinata yuyarishpami paicuna ricushpa, shungupi munanamanta jarcaringa.

⁴⁰ Chashna ruhuashpami, ñuca mandashcacunata yuyarishpa, pactachishpa, Mandac Dios ñucapaclla chicanyarishca causanguichic.

⁴¹ Ñucami cancunata Mandac Dios cani. Ñucami cancunataca cancunapac Dios cangapac Egipto llactamanta llucchimurcani. Ñucaca cancunata Mandac Diosmi cani” ninmi ningui» nirca.