NÚMEROS 14 - Dios Rimashcata Quillcashcami

Israelcuna Mandac Dios-huan piñarishcamanta

¹ Chai tutaca tucui israelcunami tandanacushpa caparishpa huacarca.

² Israelcuna Moisestapish, Aarontapish rimashpaca: «¡Egipto llactallapitac huañushca cashpachari alli canchicman carca! ¡Mana cashpaca cai shitashca pambapi huañushpachari alli canchicman!

³ Mandac Diosca, ¿imamantatac ñucanchic huarmicuna, huahuacuna espadahuan piñaccunapac maquipi huañuchishca cachun cai llactamanca apamurca? ¿Manachu Egipto llactallamantac cutina alli canman?» nirca.

⁴ Shina nishpami caishuc chaishuc: «¡Shuc pushacta mashcashpa, Egiptollamantac cutishunchic!» nirca.

⁵ Shina cacpica, Moisespish, Aaronpish tandanacushca israelcunapac ñaupapimi pambacaman cumurirca.

⁶ Chaipica chai llactata ricungapac ricpuramanta Nunpac churi Josuepish, Jefonepac churi Calebpish llaquirishpami churanata lliquirishpa,

⁷ tandanacushca israelcunataca: —Ñucanchic ricungapac rishca allpaca mai alli llactami.

⁸ Mandac Dios ñucanchicman chai allpata cusha nishpaca paillatac cungallami. Chai llactaca lechepish, mishquipish yacu shina callpacuc llactami.

⁹ Chaimanta Mandac Diosta ama piñachichicchu. Chai llactapi causaccunatapish mana manchanachu canchic. Ñucanchicca paicunataca tandata micuc shinami tucuchishun. Paicunata llaquishpa ayudacpish, mana tiyanchu. Cutin ñucanchicca Mandac Diostami charinchic. ¡Chaimanta ama manchaichicchu!— nirca.

¹⁰ Ashtahuanpish israelcunaca rumihuan shitanatami munarca. Chaimantami Dios-huan tupana huasipi pai sumaimana achiclla cashcaca tucui israelcunaman ricurirca.

¹¹ Chaipimi Mandac Diosca Moisestaca: —¿Maicamantac cai gentecunaca piñachishpa catigrin? Paicunapac ñaupallapitac ricuchinacunata ruhuashpa ricuchicucpipish, ¿manachu crincuna?

¹² Huañuchic ungüita cachashpami tucuchisha. Shina cashpapish canmantaca paicunata yalli ashtahuan sinchi, shinallatac achca gentecunatami ruhuasha— nirca.

¹³ Shina nicpipish, Moisesca Mandac Diostaca: —Mandac Dioslla, canca imatapish ruhuaclla cashcata ricuchishpami, Egiptopi causaccunapac chaupimanta israelcunataca llucchimurcangui. Cashna llaqui tucushcata Egipto llactapi causaccuna yachashpaca,

¹⁴ Canaán llactapi causaccunaman huillangami. Chai llactapi causaccunaca can Mandac Dios pushacushcata, paicuna canta ñahui ñahui ricucushcatapish, punzhaca puyupi, tutaca ninahuan achicyachishpa pushacushcatami yachancuna.

¹⁵ Shina cashpapish, shuc runata huañuchic shina, cai tucui gentecunata can huañuchicpica, can imatapish ruhuaclla cashcata yachac gentecunaca:

¹⁶ “Mandac Diosca, pai cungapac ari nishca llactaman mana yaicuchi pudishpami, shitashca pambapi huañuchishca” ningami.

¹⁷ Mandac Dioslla, can nishca shinallatac cunanca can imatapish ruhuaclla cashcata ricuchiyari. Canca:

¹⁸ “Mana utca piñaric, yallita cuyacmi cani. Millaita ruhuaccunatapish, mana cazuccunapish perdonac, shina cashpapish mana allita ruhuashcataca mana saquishpa llaquichicmi cani. Taitacuna millaita ruhuashcamantaca huahuacunatami quimsaniqui, chuscuniqui miraicaman llaquichic cani” nishcanguimi.

¹⁹ Egipto llactamanta llucshishpa, caiman chayamuncaman perdonac shinallatac cunanpish paicuna mana allita ruhuashcataca cambac jatun cuyaimanta perdonaiyari— nirca.

Mandac Dios israelcunata llaquichishcamanta

²⁰ Shina nicpimi, Mandac Diosca: —Can mañashca shinami paicunataca perdonani.

²¹ Ñuca shutipimi nini. Ñuca causacushca shinallatacmi ñucapac sumaimana achicca cai pachapipish jundami can.

²² Ñuca poderhuan ricuchishcacunata ricuccunapish, Egipto llactapi, cai shitashca pambapi ruhuashcata ricuccunapish, ñuca nishcata mana cazushpa, chunga cutincaman pandachisha niccunapish

²³ ñaupa taitacunaman ñuca cushami nishca allpataca pi mana ricungacunachu. Ñucata yangapi churaccunaca mana ricungachu.

²⁴ Shina cacpipish, ñucata servic Calebca shuctac yuyaiyuc cashpami ñuca nishcata uyashpa, ñucata catishpa, risha nirca. Chaimantami paitaca ricumushca llactamanca yaicuchisha. Chashnallatac paipac huahua huahuacunami chai allpataca japinga.

²⁵ Cunanca amalecitacuna, cananeocunami cancunapac chimbapura pambapica causan. Cayaca cutishpa, shitashca pambata rishpa, Puca Cuchaman ringuichic— nirca.

²⁶ Mandac Dios Moisestapish, Aarontapish rimashpaca:

²⁷ —¿Maicamantac cai millai israelcuna rimashcata uyacushalla? Ñucata israelcuna rimashcataca ñami uyarcani.

²⁸ Chaimanta paicunataca: “Mandac Dios ñucaca: ‘Ñuca shutipimi nini: Israelcuna rimashcata ñuca ringri uyashca shinami paicunataca ruhuagrini.

²⁹ Cancunapuramanta ishcai chunga huatayucmanta huichaiman yupashpa quillcashca cai shitashca pambapimi ñucata piñachishcamantaca huañuchigrini. Cai pambapimi paicunapac cuerpoca shitashca saquiringa.

³⁰ Cancunaman ñuca maquita alzashpa cushami nishca allpapi causangapacca mana yaicunguichicchu. Shina cacpipish, Jefonepac churi Caleb, shinallatac Nunpac churi Josuellami yaicunga.

³¹ Ashtahuanpish cancunapac huahuacunami, cancuna mana nishca allpataca japinga. Cancunaca: Ñucanchic huahuacunataca ñucanchicta piñaccunami japishpa aparinga nircanguichicmi. Shina cacpipish, paicunami chai llactataca japinga.

³² Cancunapac cuerpoca cai shitashca pambapimi shitashca saquiringa.

³³ Cancunapac huahuacunaca chuscu chunga huatatami cai shitashca pambapica michishpa puringa. Paicunami cancuna millaita ruhuashcamantaca cai shitashca pambapi cancuna huañushpa tucuringacaman llaquita apanga.

³⁴ Chuscu chunga punzhapimi Canaán llactata ricushpa purinaca tucurirca. Chai shinallatacmi chuscu chunga punzhata llaquita apanguichic. Cancuna mana allita ruhuashcamantaca cada punzhamanta shuc huatatami llaquita apanguichic. Chaipimi ñucata mana cazuna ima shina cashcataca yachanguichic.

³⁵ Mandac Dios ñucami caitaca nini. Cai gentecuna ñucata mana cazushcamantaca chashnatacmi ruhuasha. Cai shitashca pambapimi huañushpa tucuringacuna’ ninmi” nigri— nirca.

³⁶ Moisés llactata ricumuchun cachashca runacuna cutishpa, chai llactata mana valichishpa, israelcunaman huillashpa, paita rimachishcamantami

³⁷ Mandac Diosca chai runacunataca huañuchic ungüihuan huañuchirca.

³⁸ Ashtahuanpish chai llactata ricungapac riccunapuramanta Nunpac churi Josué, shinallatac Jefonepac churi Calebca mana huañurcachu.

Hormapi israelcunata atishpa macashcamanta

³⁹ Tucui caicunata Moisés huillacpimi, israelcunaca yallita llaquirirca.

⁴⁰ Chai quipa tutamanta utca jatarishpa, urcu lomaman rishpaca: —Ñucanchicca juchallishcanchictacmi, cunanca Mandac Dios cusha nishca llactaman ringapacca caipimi canchic— nirca.

⁴¹ Shina nicpimi Moisesca: —¿Ima nishpatac Mandac Dios nishcataca mana cazunguichic? Mana chaiman chayai pudinguichicchu.

⁴² Mandac Diosca mana cancunahuanchu, ama richicchu. Chaiman rishpaca, piñaccunapac ñaupapi huañunguichicmi.

⁴³ Chaipica amalecitacuna, cananeocunami espadahuan huañuchingapac chapacun. Mandac Diosta catinata saquishcanguichicmi. Chaimantami Mandac Diosca cancunahuanca mana can— nirca.

⁴⁴ Shina nicpipish, mana cazushpami israelcunaca urcu jahuaman rirca. Chashna paicuna ricpipish, Mandac Dios-huan ari nishca quillcata huacaichina Arcatapish mana anchuchircachu. Moisespish carpa huasicuna chaupimantaca mana anchurircachu.

⁴⁵ Chashna ricpica, chai urcupi causac amalecitacunami cananeocunahuan shamushpa macashpa chugrichishpa, Hormacaman catirca.