NÚMEROS 13 - Dios Rimashcata Quillcashcami

Canaán llactata ricuchun cachashcamanta

¹ Mandac Dios Moisesta rimashpaca:

² «Israelcunaman cugricushca Canaán llactata ricuchun cambac runacunata cachai. Ñaupa taita Israelpac cada aillumanta shuc pushacta cachai» nirca.

³ Moisesca Mandac Dios mandashca shinami Parán shitashca pambamanta cada Israelpac aillucunamanta shuc pushacta cacharca.

⁴ Ricungapac riccunaca: Rubenpac aillumantaca Zacurpac churi Samuami rirca.

⁵ Simeonpac aillumantaca Horipac churi Safatmi rirca.

⁶ Judapac aillumantaca Jefonepac churi Calebmi rirca.

⁷ Isacarpac aillumantaca Josepac churi Igalmi rirca.

⁸ Efrainpac aillumantaca Nunpac churi Oseasmi rirca.

⁹ Benjaminpac aillumantaca Rafupac churi Paltimi rirca

¹⁰ Zabulonpac aillumantaca Sodipac churi Gadielmi rirca.

¹¹ Josepac churi Manasespac aillumantaca Susipac churi Gadimi rirca.

¹² Danpac aillumantaca Gemalipac churi Amielmi rirca.

¹³ Aserpac aillumantaca Micaelpac churi Seturmi rirca.

¹⁴ Neftalipac aillumantaca Vapsipac churi Nahbimi rirca.

¹⁵ Gadpac aillumantaca Maquipac churi Geuelmi rirca.

¹⁶ Chaicunami Moisés llactata ricuchun cachashca runacunapac shuticunaca carca. Moisesca Nunpac churi Oseastaca Josuetami shutichirca.

¹⁷ Moisés Canaán llactata ricuchun cachacushpaca: «Caimantaca Neguevman huichai rishpa, urcuman ringuichic.

¹⁸ Chaiman chayashpaca, imalaya llacta, imalaya gentecuna cashcata, sinchi cashcata, mana sinchi cashcata, achca cashcata, ashalla cashcata,

¹⁹ paicuna causacushca llactaca alli cashcata, mana alli cashcata, paicuna causacushca llactaca carpa huasicuna cashcata, mana cashpaca muyundita pircashca cashcata,

²⁰ chai allpaca grano pucuc cashcata, mana cashpaca mana pucuc cashcata, yuracuna tiyashcata, mana tiyac cashcata ricunguichic. Chai llactapi pucushcata mana manchashpa apamunguichiclla» nirca. Chai punzhacunaca punta pucushca uvasta pallana punzhacunami carca.

²¹ Paicuna huichai rishpaca, Zin shitashca pambamanta Rehob llactacaman chayashpami Hamat llacta yaicunacaman chayarca.

²² Neguevta huichai rishpaca, Anacpac huahua huahua Ahimán, Sesai, Talmai causana Hebronmanmi chayarca. Hebronca Egiptopi cac Zoán llacta manarac tiyacpi, canchis huata ñaupaman ñami tiyashca.

²³ Chaimantaca Escol yacu huaicu pambacamanmi chayarca. Chaimantami ramandi uvasta pitishpa, shuc caspipi huandushpa apamurca. Shinallatac granadacunatapish, higocunatapish apamurcami.

²⁴ Chai yacu pambataca israelcuna uvasta pitimushcamantami Escol nishpa shutichirca.

²⁵ Chuscu chunga punzhapimi Canaán llactata ricungapac riccunaca cutimurca.

²⁶ Shina cutimushpaca, Paranpi cac Cades shitashca pambapi Moisespish, Aaronpish, tucui israelcunapish cacpimi chayamurca. Chaipimi paicunamanpish, tucui israelcunamanpish ima shina cashcata tucui huillarca. Shinallatac chai llactapi pucushcacunatapish ricuchishpami,

²⁷ paicunaca: «Can ricumuchun cachashca llactataca ricumunchicmi. Chai llactapica lechepish, mishquipish yacu shina callpacucmi cashca. Riqui, cai granocunatami chaimanta apamunchic.

²⁸ Shina cacpipish, chai llactapi causaccunaca sinchi runacunami. Chai llacta huasicunapish jatun huasicunami, muyundita pircashcami can. Anacpac huahua huahuacunami chaipica causac cashca.

²⁹ Neguevpica amalecitacunami causan. Cutin urcucunapica heteocuna, jebuseocuna, amorreocunami causan. Mama cucha pambacunapi, Jordán yacu muyundi pambacunapica cananeocunami causan» nirca.

³⁰ Shina nicpimi, Calebca Moisespac ñaupapi tucui israelcunata upallachishpa: —¡Cunanca, chai llactata quichungapac jacuchic! ¡Ñucanchicmi chai llactapi causaccunata atishpa sinchicuna canchic!— nirca.

³¹ Shina nicpipish, paihuan riccunaca: —¡Ñucanchicca chai gentecunataca mana ati pudishunchu! ¡Paicunaca ñucanchicta yalli sinchicunami!— nirca.

³² Chai runacunaca chai llactata mana alli nishpami israelcunataca: —Ñucanchic ricungapac rishca llactaca yarcaihuan huañuna allpami cashca. Chaipi causaccunapish yalli jatun gentecunami.

³³ Chashnallatac Anacpac manchana jatun churicunatapish ricurcanchicmi. Paicunaca yalli jatuncunami. Paicunahuan chimbapuracpica, ñucanchicca shuc curu shinallami carcanchic. Paicunapish ñucanchictaca chashnallatacmi ricurca— nirca.