NÚMEROS 12 - Dios Rimashcata Quillcashcami

Mariapish, Aaronpish Moisesta rimarishcamanta

¹ Moisés Cus llactata huarmihuan cazarashcamantami Mariapish, Aaronpish juchanchishpa rimarirca.

² Paicunaca: «¿Mandac Diosca Moisesllahuanchu rimarca? ¿Manachu ñucanchic-huanpish rimarca?» nirca. Chaitaca Mandac Diosca uyarcami.

³ Moisesca tucui cai pachapi causac runacunamanta yalli humildemi carca.

⁴ Mandac Diosca Moisestapish, Aarontapish, Mariatapish rimashpaca: «Ñucahuan tupana huasiman quimsata shamuichic» nirca. Shina nicpica, paicunaca rircami.

⁵ Paicuna chaipi cacpimi, Mandac Diosca suniclla puyupi shamushpa, paihuan tupana huasi yaicunapi shayarishpa, Aarontapish, Mariatapish cayarca. Chaipi ishcaita cuchuyacpimi,

⁶ Mandac Diosca: «Cunanca, ñuca rimashcata uyaichic. Cancunapuramanta maijan shuc ñucamanta huillac tiyacpica, muscuipi shina ricurishpami parlasha.

⁷ Shina cacpipish, ñucata servic Moises-huanca mana chashnachu parlani. Paica ñuca huasipi allita servicmi.

⁸ Chaimantami paihuanca ñahui ñahui entendinallata rimani. Mana muscuipi shina ricurishpachu rimani. Paica ñucataca ñahui ñahuimi ricsin. Ñucata servic Moisesta juchanchishpa rimanataca, ¿ima nishpatac mana manchanguichic?» nirca.

⁹ Chashna nishpami Mandac Diosca paicunahuan nina japiric shina piñarishpa, chaimanta rirca.

¹⁰ Mandac Dios-huan tupana huasi jahuamanta puyu anchuricpica, Mariaca tucui cuerpomi leprahuan rasu shina yuracyashca saquirirca. Aarón tigrarishpa ricucpica, Mariaca leprahuanmi cashca carca.

¹¹ Chaita ricushpami, Aaronca Moisestaca: «¡Ñucata mandaclla! Ñucanchicca imata mana yachac shinami cantaca juchanchishpa rimashpa juchallishcanchic. Cai juchamantaca ñucanchictaca ama llaquichichu.

¹² Mariataca ama huañushca huacharishca shina, chaupi cuerpo ismushcata ruhuaichu» nirca.

¹³ Shina nicpimi Moisesca: «¡Mandac Dioslla, Mariataca cunanllatac allichiyari!» nishpa caparishpa mañarca.

¹⁴ Shina mañacpimi, Mandac Diosca Moisestaca: «Paipac taita ñahuipi tocacpica, ¿manachu canchis punzhacaman pingaihuan canga? Chaimanta canchis punzhacaman carpa huasicunamanta llucshishpa cachai. Chai quipami israelcunahuan cutin tandanacunga» nirca.

¹⁵ Shina nicpimi, Mariataca canchis punzhacaman carpa huasicunamanta llucchishpa cacharca. María paicunahuan tandanacungacamanmi israelcunaca maiman mana rirca.

¹⁶ María cutimucpimi, israelcunaca Hazerot llactamanta rishpa, Parán shitashca pambapi carpacunata shayachishpa tiyarirca.