NÚMEROS 11 - Dios Rimashcata Quillcashcami

Mandac Dios israelcunaman aichata carashcamanta

¹ Shuc punzhami israelcunaca yarcaihuan cashpa, Mandac Diosta rimarirca. Chaita uyashpami Mandac Diosca nina japiric shina piñarishpa, israelcuna causana carpa huasi muyundita rupachirca.

² Chaimantami israelcunaca Moisesta caparishpa mañarca. Shina mañacpi, Moisés paicunamanta Mandac Diosta mañacpica, ninaca huañurcami.

³ Carpa huasicunata Mandac Dios rupachishcamantami chai pambataca Taberata shutichirca.

⁴ Israelcunahuanca micunallata munac tucuilaya gentecunami chapurishca carca. Chai gentecunapac yuyaita japishpami israelcunaca: «¿Pitac aichata cungayari?

⁵ Egiptopica challuatapish yangami micuc carcanchic. Pepinocunatapish, meloncunatapish, puerros nishcacunatapish, cebollatapish, ajostapish ñucanchic munashcatami micuc carcanchic.

⁶ ¡Cunanca yarcaihuan huañucunchicmi! ¡Caipica maná shuti micunallami tiyan! ¡Shuctac micunaca mana ricurinchu!» nishpa huacarca.

⁷ Maná shuti granoca culantro muyu shinami carca. Chaica bedelio shina quillumi carca.

⁸ Israelcunaca chai manatac japingapac llucshishpaca cutashpa, mana cashpaca tacashpami yanuccuna, mana cashpaca tandata ruhuashpa cusashpa micuccuna carca. Chai micunaca mushuc aceite shina mishquimi carca.

⁹ Tuta garuashpa pacaricpica, maná shuti tandaca israelcunapac carpa huasi jahuapimi urmashpa pacaric carca.

¹⁰ Moisesca israelcuna familiandi quiquin carpa huasi pungu pambacunapi huacacuctami uyarca. Mandac Dios chaita uyashpaca, nina japiric shinami piñarirca. Shinallatac Moisespish llaquirishpami,

¹¹ Mandac Diostaca: —Canta servic ñucataca, ¿ima nishpatac cashna llaquichinguiyari? Cai israelcunahuanca llaquita apangapacca, ¿ima mana allitatac cambac ñaupapi ruhuashcaniyari?

¹² Ñaupa taitacunaman cusha nishca llactaman chayangacamanmi chuchucuc huahuacunata shina apachun ningui. Ñucaca paicunapacca, ¿taita mamachu cani?

¹³ Paicunaca: “Ñucanchicman aichata caraiyari” nishpami huacashpa, mañangapac shamuncuna. Cai tucui israelcunaman carangapacca, ¿maipitac achca aichataca tarishayari?

¹⁴ Cai tucui gentecunata ñucalla pushanaca achca sinchimi. Ñucalla pushanataca mana pudinichu.

¹⁵ Ñuca cashna llaquita apana cacpica, ñuca causaita quichuchunmi mañani. Cambac ñaupapi ñuca alli ricurishca cacpica, chaita ruhuailla. Cashna llaquitaca mana ashtahuan apasha ninichu— nirca.

¹⁶ Shina nicpimi, Mandac Diosca Moisestaca: —Israelcunata pushac yuyacpuramanta canchis chunga runacunata acllai. Paicunaca israelcunata pushac yuyaccunami cana can. Paicunata ñucahuan tupana huasi yaicunaman pushashpa, chaipi shuyangui.

¹⁷ Chaipimi ñuca jahuamanta shamushpa, canhuan parlasha. Canpi tiyac Espiritutami paicunaman cusha. Chashna ruhuacpimi, paicunapish canta ayudashpa, cai israelcunataca pushanga. Chaipica ña mana canllachu pushac cangui.

¹⁸ Israelcunataca: “Cayapac Diospaclla tucuichic. Cayaca aichatami micunguichic. Cancunaca: ‘Egiptopica allimi causarcanchic. Caipica, ¿pitac aichata carangayari?’ nishpami, Mandac Dios uyacta huacacurcanguichic. Chaimantami Mandac Diosca cancunaman aichata caragrin.

¹⁹ Aichataca mana shuc punzhallata, mana ishcai punzhallata, mana pichca punzhallata, chunga punzhallata ishcai chunga punzhallatachu micugringuichic.

²⁰ Ashtahuanpish quilla jundatami amirishpa millanayachingacaman micugringuichic. Cancunapac chaupipi causac Mandac Diosta mana valichishpami cancunaca: ‘¿Imamantatac Egiptomanta llucshimurcanchic?’ nishpa Mandac Diospac ñaupapi huacarcanguichic. Chaimantami cashna micugringuichic” ningui— nirca.

²¹ Shina nicpimi Moisesca: —Ñucahuan chaquillahuan shamuc israelcunaca sucta patsac huarangami. ¿Chai tucui cashca jahuachu canca quillacamanmi aichata caragringui?

²² Paicunaman carangapacca, ¿maipitac huañuchishca achca ovejacuna, vacacuna tiyanyari? Mama cuchapi tiyac tucui challuacunata apamushpa caracpipish, ¿maitatac pactangayari?— nirca.

²³ Shina nicpimi, Mandac Diosca Moisestaca: —Ñuca imatapish ruhuaipaclla cashcata, ¿manachu yachangui? Ñuca rimashca pactana cashcata, mana pactana cashcataca cunanmi ricungui— nirca.

²⁴ Moisés ña llucshishpaca, Mandac Dios imata nishcatami israelcunamanca huillarca. Chai quipaca israelcunata pushac yuyaccunamanta canchis chunga runacunatami Dios-huan tupana huasi muyundipi churarca.

²⁵ Chaipimi Mandac Diosca puyupi urai shamushpa, Moises-huan parlanacushpa, paipi tiyac Espirituta canchis chunga pushac yuyaccunapi churarca. Shina churacpica, Diosmanta huillarcami. Shina cashpapish mana ashtahuan huillashpa catircachu.

²⁶ Canchis chunga acllashca pushac yuyacmantaca Eldad, Medadmi paicuna carpa huasicunallapitac saquirishca carca. Paicunapacmanpish Diospac Espíritu shamurcami. Paicunaca quillcashcapurapi cashpapish Dios-huan tupana huasimanca mana rircachu. Carpa huasillapimi Diosmanta huillai callarirca.

²⁷ Chashna huillacucta shuc moso uyashpami, Moisespacman callpa rishpaca: —Eldadpish, Medadpish Diosmanta huillaccuna shinami, carpa huasicunapi huillacun— nirca.

²⁸ Shina nicpimi, huambramanta pacha Moisesta ayudac Nunpac churi Josueca: —Ñuca amo Moiseslla, chashna huillaccunata jarcaiyari— nirca.

²⁹ Shina nicpimi Moisesca: —Ama ñucata llaquichichu. Tucui gentecuna Diosmanta huillaccuna cashpaca allimi canman. Paicunapi Mandac Dios paipac Espirituta churashca cacpica, allimi canga— nirca.

³⁰ Chai quipaca Moisespish, israelcunata pushac yuyaccunapish paicuna causana carpa huasiman cutircami.

³¹ Shina cacpica, Mandac Dios cachashca huaira shamushpami mama cuchamanta codornizcunata israelcuna causana carpa huasicuna tiyac ñaupaman apamurca. Codornizcunaca tucui carpa huasicuna muyunditami shuc punzha purina shina carucaman, altomanca shuc metro shina altocaman jundarirca.

³² Israelcunaca chai tucui punzha, tucui tuta, cayandi punzhapish codornizcunata tandarca. Ashallata japin nishcami chunga montón codornizta tandarca. Chashna japishpaca, carpa huasicuna muyunditami codorniz aichataca tendirca.

³³ Paicuna aichata manarac cashtucpimi, Mandac Diosca tucui gentecunahuan nina japiric shina piñarishpa, tucuita huañuchi callarirca.

³⁴ Micuna yuyaillahuan causac gentecuna huañucpi, chai pambapi enterrashcamantami chai pambataca Kibrot-hataavahta shutichirca.

³⁵ Israelcunaca Kibrot-hataavah pushtumanta rishpaca, Hazerotman chayashpami, chaipi saquirirca.