NÚMEROS 1 - Dios Rimashcata Quillcashcami

Sinaipi israelcunata yupashcamanta

¹ Israelcuna Egipto llactamanta llucshishca ishcai huata, ishcai quilla, punta punzhapimi Sinaí shitashca pambapi, paihuan tupana huasipi Mandac Diosca Moisestaca:

² «Tucui israelcuna mashna tiyashcata yachangapacca ailluta, huasi ucupurata catishpa, tucui caricunata yupai.

³ Canca Aaronhuan ishcai tucushpa, ishcai chunga huatayucmanta huichaiman macanacuiman ripac caricunata yupai.

⁴ Cada aillumanta huasi ucupurata cancunataca ayudanga.

⁵ Chai ayudaccunaca: Rubenpac aillumantaca Sedeurpac churi Elisur,

⁶ Simeonpac aillumantaca Zurisadaipac churi Selumielmi canga.

⁷ Judapac aillumantaca Aminadabpac churi Naasón,

⁸ Isacarpac aillumantaca Zuarpac churi Natanaelmi canga.

⁹ Zabulonpac aillumantaca Helonpac churi Eliab.

¹⁰ Josepac ishcai churicunamantaca Efrainpac aillumanta Amihudpac churi Elisamami canga. Cutin Manasespac aillumantaca Pedasurpac churi Gamaliel.

¹¹ Benjaminpac aillumantaca Gedeonipac churi Abidanmi canga.

¹² Danpac aillumantaca Amisadaipac churi Ahiezer,

¹³ Aserpac aillumantaca Ocranpac churi Paguielmi canga.

¹⁴ Gadpac aillumantaca Reuelpac churi Eliasaf,

¹⁵ Neftalipac aillumantaca Enanpac churi Ahirami canga» nirca.

¹⁶ Chaicunami ñaupa taita Israelpac cada ailluta pushaccuna, huasi ucupurata, shinallatac soldadocunata pushachun nishcacunaca carca.

¹⁷ Chaicunatami Moisesca Aaronhuan shuticunapi cayashpa yupashpa,

¹⁸ ishcainiqui quilla punta punzhapi tucui israelcunata tandachirca. Chashnami ailluta, huasi ucupurata catishpa, ishcai chunga huatayucmanta huichaiman

¹⁹ Mandac Dios nishca shinallatac yuparca. Chashnami Sinaí shitashca pambapi Moisesca israelcunata tandachishpa yuparca.

²⁰ Taita Israelmanta mirarishca punta churi Rubenpac ailluta, huasi ucupurata catishpaca, ishcai chunga huatayucmanta callarishpa, macanacuiman ripac caricunatami yuparca.

²¹ Rubenpac aillumantaca chuscu chunga sucta huaranga pichca patsactami yuparca.

²² Simeonpac ailluta, huasi ucupurata catishpa, ishcai chunga huatayucmanta callarishpa, macanacuiman ripac caricunataca

²³ pichca chunga iscun huaranga quimsa patsactami yuparca.

²⁴ Gadpac ailluta, huasi ucupurata catishpa, ishcai chunga huatayucmanta callarishpa, macanacuiman ripac caricunataca

²⁵ chuscu chunga pichca huaranga sucta patsac pichca chungatami yuparca.

²⁶ Judapac ailluta, huasi ucupurata catishpa, ishcai chunga huatayucmanta callarishpa, macanacuiman ripac caricunataca

²⁷ canchis chunga chuscu huaranga suctatami yuparca.

²⁸ Isacarpac ailluta, huasi ucupurata catishpa, ishcai chunga huatayucmanta callarishpa, macanacuiman ripac caricunataca

²⁹ pichca chunga chuscu huaranga chuscu patsactami yuparca.

³⁰ Zabulonpac ailluta, huasi ucupurata catishpa, ishcai chunga huatayucmanta callarishpa, macanacuiman ripac caricunataca

³¹ pichca chunga canchis huaranga chuscu patsactami yuparca.

³² Josepac churicunapuramantaca Efrainpac churimantaca huasi ucupurata catishpa, ishcai chunga huatayucmanta callarishpa, macanacuiman ripac caricunataca

³³ chuscu chunga huaranga pichca patsactami yuparca.

³⁴ Manasespac ailluta, huasi ucupurata catishpa, ishcai chunga huatamanta callarishpa, macanacuiman ripac caricunataca

³⁵ quimsa chunga ishcai huaranga ishcai patsactami yuparca.

³⁶ Benjaminpac ailluta, huasi ucupurata catishpa, ishcai chunga huatamanta callarishpa macanacuiman ripac caricunataca

³⁷ quimsa chunga pichca huaranga chuscu patsactami yuparca.

³⁸ Danpac ailluta, huasi ucupurata catishpa, ishcai chunga huatamanta callarishpa, macanacuiman ripac caricunataca

³⁹ sucta chunga ishcai huaranga canchis patsactami yuparca.

⁴⁰ Aserpac ailluta, huasi ucupurata catishpa, ishcai chunga huatamanta callarishpa, macanacuiman ripac caricunataca

⁴¹ chuscu chunga shuc huaranga pichca patsactami yuparca.

⁴² Neftalipac ailluta, huasi ucupurata catishpa, ishcai chunga huatamanta callarishpa, macanacuiman ripac caricunataca

⁴³ pichca chunga quimsa huaranga chuscu patsactami yuparca.

⁴⁴ Cai runacunatami Moises-huan, Aaronhuan shinallatac israelcunata pushac chunga ishcai runacunahuan yuparca. Chai pushaccunaca ñaupa israelcunapac miraimanta shuc shucmi carca.

⁴⁵ Chashnami tucui israelcunataca huasi ucupurata catishpa, ishcai chunga huatayucmanta callarishpa, macanacuiman ripac caricunata yuparca.

⁴⁶ Tucui yupashcaca sucta patsac quimsa huaranga pichca patsac pichca chungami carca.

Levitacuna imata ruhuana cashcamanta

⁴⁷ Ñaupa taita Levipac aillucunataca mana israelcunahuan tandachishpa yuparcachu.

⁴⁸ Mandac Diosca Moisestaca:

⁴⁹ «Levipac aillumantaca ama yupanguichu. Israelpac aillucunata yupacushpaca, ama paicunahuan tandachishpa yupanguichu.

⁵⁰ Chaipac randica mandashcacunata huacaichishca ñucahuan tupana ucutapish, tucui chaipi tiyaccunatapish ricuchun churangui. Paicunami ñucahuan tupana huasitapish, chaipi imalla tiyaccunandi apanga. Chashnami carpa huasipi servishpa, chai muyundipi causanga.

⁵¹ Paicunami ñucahuan tupana huasita maiman apana cacpica pascanga. Maipi shayachina cacpica shayachinga. Chican gentecuna ñucahuan tupana huasiman chayashpaca huañungami.

⁵² Tucui israelcunami paicunapac soldadocunahuan quiquin bandera ladopi, quiquin carpa huasipi causanga.

⁵³ Shina cacpipish, levitacunaca mandashcacunata huacaichishca ñucahuan tupana huasi muyundipimi causanga. Ñucahuan tupana huasita levitacuna cuidacucpimi, israelcunahuanca ñucaca mana piñarisha» nirca.

⁵⁴ Israelcunaca Mandac Dios Moisesta nishca shinallatacmi tucuita ruhuarca.