NEHEMÍAS 8 - Dios Rimashcata Quillcashcami

Dios mandashcata israelcuna uyachun Esdras rezashcamanta

¹ Shina cacpimi tucui gentecunaca yacuman llucshina pungu chimba lado plazapi shuc yuyailla tandanacurca. Chaipimi quillcac Esdrastaca Mandac Dios israelcunaman cuchun Moisesman cushca quillcashcata apamui nircacuna.

² Shina nicpimi, Esdrasca chai canchis quilla punta punzhapi tandanacushcapac ñaupaman chai mandashcata apamurca. Chaipica caricunapish, huarmicunapish shinallatac tucui entendipaclla gentecunami carca.

³ Chashna apamushpami, yacuman llucshina pungu chimba lado plazapi tandanacushcapac ñaupapi shayarishpa tutamantamanta chaupi punzhacaman, caricunapac, huarmicunapac, tucui entendipaclla gentecunapac ñaupapi rezarca. Chai rezashcataca tucui gentecunami casilla shayarishpa alli uyarca.

⁴ Quillcac Esdrasca shayaringapac caspihuan ruhuashca jahuapimi chai quillcataca rezacurca. Paipac alli ladopica Matatías, Sema, Anías, Urías, Hilcías, shinallatac Maasiasmi shayacurca. Lluqui ladopica Pedaías, Misael, Malquías, Hasum, Hasbadana, Zacarías, shinallatac Mesulammi shayacurca.

⁵ Esdrasca tucuimanta ashtahuan jahuapi shayarishpami, chai quillcataca tucui mashna ricucucpi pascarca. Chai quillcashcata pascacpica, tucui gentecunami shayarirca.

⁶ Esdrasca Mandac jatun Diostami alli nirca. Shina alli nicpica, tucui gentecunami maquita huichai churashpa: «¡Chashna cachun! ¡Chashna cachun!» nircacuna. Shinallatac allpapi cungurishpami Mandac Diosta allimari cangui nircacuna.

⁷ Levitapuramantaca Jesúa, Bani, Serebías, Jamín, Acub, Sabetai, Hodías, Maasías, Kelita, Azarías, Jozabed, Hanán, Pelaiasca chai mandashcatami tucui israelcunaman alli entendichicurca. Shina entendichicpimi, shuc pushtullapi shayarishpa alli uyarcacuna.

⁸ Dios mandashpa quillcashcata alli entendinallata rezashpami, alli entendichirca.

⁹ Chaita uyashpami tucui gentecuna huacarca. Shina huacacpimi mandac Nehemiaspish, quillcac Esdraspish, rezashcata entendichic levitacunapish rimashpaca: «¡Cunanca, ñucanchicta Mandac Diosman chicanyachishca punzhami! Ama llaquirichicchu, ama huacaichicchu» nirca.

¹⁰ Chai quipa paicunataca: «Cai punzhaca ñucanchic jatun Diospac chicanyachishca punzhami. Chaimanta alli micunacunata micuichic, mishqui vinotapish ubiaichic. Ima micunata mana chariccunaman micunata cachaichic. Mana llaquirinachu canguichic. Ashtahuanpish Mandac Diosmi cushichishpa sinchiyachin» nirca.

¹¹ Levitacunapish tucui gentecunatami: «Cunanca, Mandac Dios chicanyachishca punzhami. Ama llaquirichicchu, upalla caichic» nircacuna.

¹² Paicunaman yachachishca shimicunata entendishpami, tucui gentecuna micushpa, ubiashpa, shuccunamanpish carashpa, yallita cushicungapac rircacuna.

¹³ Chai cayandi punzhami tucui gentecunapac familiacunata mandaccunapish, curacunapish, levitacunapish chai mandashca shimicunata yachacungapac quillcac Esdras-huan tandanacurca.

¹⁴ Paicunaca Mandac Dios Moisesta mandashpa quillcachishcapica israelcuna canchis quillapi jatun fiestata ruhuashpa, chucllacunapi causana cashcatami tarirca.

¹⁵ Chaimantami tucui pueblocunapi, Jerusalenpi causaccunaman huillachun cacharca. Chashna cachashpaca: «¡Chucllacunata ruhuangapac urcuman llucshishpa, olivos ramacunata, sacha olivos ramacunata, arrayán ramacunata, palmera ramacunata, panga jundashca yuracunamanta ramacunata apamuichic!» nishpami mandashcapi nishca shina cacharca.

¹⁶ Chaimantami gentecuna urcucunaman llucshishpa ramacunata apashpa, quiquin chucllacunata ruhuarcacuna. Maijancunaca paicunapac huasi jahuacunapi, pungu pambacunapi, Diospac huasi pungu pambacunapi, yacuman llucshina pungu lado plazapi, Efraín pungu lado plazapi, chucllata ruhuarcacuna.

¹⁷ Tucui prezumanta cutimushcacunami chucllacunata ruhuashpa, chai chucllapi causarcacuna. Israelcunaca Nunpac churi Josué causacui punzhamanta pachami cashna chucllacunata mana ruhuashca carca. Caita ruhuashcamantaca yallitami cushicurcacuna.

¹⁸ Esdrasca Dios mandashcataca callari punzhamanta canchis punzhacamanmi punzhanta rezacurca. Chai jatun fiestata canchis punzhacaman ruhuashpaca pusac punzhapica ima shina ruhuachun mandashca shinallatacmi jatun tandanacuita ruhuarcacuna.