NEHEMÍAS 6 - Dios Rimashcata Quillcashcami

Nehemiasta llaquichinata munashcamanta

¹ Jerusalén muyundi jatun pircataca shuc jutcullatapish mana saquishpa tucui allichishcatami Sanbalatpish, Tobiaspish, arabepuramanta Gesempish, shinallatac shuctac piñaccunapish yachac chayarca. (Shina cacpipish pungucunaca manarac churashcachu carca).

² Chashna allichishcata yachac chayashpami Sanbalatpish, Gesempish shuc huillacta cachashpaca: «Ono pambapi tiyac maijan uchilla llactapi tandanacungapac shamui» nirca. Ashtahuanpish paicunaca ñucata llaquichingapacmi yuyarinacushca carca.

³ Chaimantami ñucapish huillaccunata cachashpaca: «Ñucaca shuc jatun trabajotami ruhuacuni. Ñuca caita saquishpa cancunapacman ricpica, chai ruhuacushcaca chaipimi saquiringa. Chaimanta mana ri pudinichu» nichun cacharcani.

⁴ Chuscu cutincamanmi chaillatatac nichun cacharca. Ñucapish punta nishca shinallatacmi nircani.

⁵ Pichcaniquipica Sanbalatmi chashnallatac nichun quillcataca pascashpa paita servicman cachashca carca.

⁶ Chai quillcapica: «Gentecunapurapica, canpish, Judá llactapi causaccunapish jatun mandacta mana cazushpami chai jatun pircata allichicun, nictami uyanchic. Gesempish chashnallatacmi nicun. Chaicunata uyashpaca can jatun mandac tucusha nicushcatami yachanchic.

⁷ Shinallatac: “¡Judá llactapica jatun mandac tiyanmi!” nishpa, canmanta Jerusalenpi huillachunmi Dios ima nishcata huillaccunata churashcangui. Chashna nishcacunataca jatun mandac yachangami. Chaimanta pai manarac yachacpi, ñucanchic-huan parlangapac utca shamui» nishcami carca.

⁸ Chaimantami paitaca: «Can nishca shinaca imapish mana uyarinchu, ashtahuanpish cambac yuyaillamantami chashna ningui» nichun cacharcani.

⁹ Tucui paicunami ñucanchicta manchachingapacca: «Chai jatun pircata ruhuacushpapish paicunapac maqui shaicucpica, mana tucuchingacunachu» nircacuna. Chaimantami ñucaca: «¡Dioslla, ñuca maquita sinchiyachiyari!» nishpa mañarcani.

¹⁰ Chai quipami ñucaca Delaiapac churi, Mehetabelpac nieto Semaiaspac huasiman rircani. Semaiasca paipac huasipimi huichcarishpa tiyacurca. Chaipimi paica: —Canta huañuchingapac shamungacunami. Chaimanta Mandac Diospac huasipi tandarishpa, pungucunata huichcarishunchic, ¡Ari, cunan tutallatacmi canta huañuchingapac shamungacuna!— nirca.

¹¹ Shina nicpimi ñucaca: —¿Ñuca shina runacunaca miticungapac rinchu? ¿Ama huañuchichun nishpa, Diospac huasipi huichcaringapac rinchu? ¡Ñucaca mana miticungapac rishachu!— nircani.

¹² Shinallatac paica mana Dios cachashca, ashtahuanpish Sanbalatpish, Tobiaspish cullquita cushpa Dios huillashcata huillac shina tucushpa, ñucata llaquichichun cachashcatami yacharcani.

¹³ Ñucata manchachishpa juchata ruhuachingapacmi pacalla cullquita japishca carca. Ñuca mana allita ruhuacpi, juchanchishpa rimachun, shinallatac mana alli nichunmi chashna ruhuashca carca.

¹⁴ Chaimantami ñucaca: «¡Ñuca Dioslla, Sanbalatpish, Tobiaspish caicunata ruhuashca shinallatac paicunata yuyari! ¡Noadías huarmipish, caishuc huillaccunapish ñucata manchachishpa pandachisha nishcatapish ama cungaringuichu!» nircani.

Jerusalén muyundi pircata tucuchishcamanta

¹⁵ Jerusalén muyundi pircataca Elul quilla ishcai chunga pichca punzhapimi tucuchircanchic. Tucui ruhuanaca pichca chunga ishcai punzhapimi tucurirca.

¹⁶ Chaita yachashpami ñucanchicta piñaccunapish, muyundi llactacunapi causaccunapish yangalla cashcata yuyashpa llaquirirca. Shinallatac ñucanchic Dios ayudacpi, tucuchishcatami yacharcacuna.

¹⁷ Chai punzhacunapica Judá llacta mandaccunaca achca quillcacunatami Tobiasman cacharca. Shinallatac Tobiaspish paicunaman cacharcami.

¹⁸ Tobiasca Arapac churi, Secaniaspac ushihuanmi cazarashca carca. Paipac churi Johananpish, Bereqiaspac churi Mesulampac ushihuanmi cazarashca carca. Chaimantami Judá llactapi causac achca gentecunaca Tobiaspac parte carca.

¹⁹ Shinallatac ñuca ñaupapica Tobiasca alli ruhuacmi nishpami parlac carca. Ñuca ima nishcatapish Tobiasmanmi huillagric carca. Cutin Tobiasca ñucata manchachingapacmi quillcacunata cachac carca.