NEHEMÍAS 3 - Dios Rimashcata Quillcashcami

Jatun pircata allichi callarishcamanta

¹ Shina cacpimi curacunata mandac Eliasib curapish, paipac huauqui curacunapish ovejacuna yaicuna punguta allichirca. Pircataca Hamea torremanta callarishpa, Hananeel torrecamanmi allichirca.

² Paicunapac ladopica Jericó pueblomanta runacunami allichirca. Chai catipica Imripac churi Zacurmi allichirca.

³ Challuahuan yaicuna pungutaca Senaapac huahua huahuacunami allichirca. Paicunami vigacunata, pungucunata churashpa aldabacunata churarcacuna.

⁴ Paicunapac ladopica Cospac nieto Uriaspac churi Meremotmi allichirca. Paicunapac ladopica Mesezabeelpac nieto Berequiaspac churi Mesulammi allichirca. Paicunapac ladopica Baanapac churi Sadocmi allichirca.

⁵ Paicunapac ladopica Tecoa pueblopi causaccunami allichirca. Ashtahuanpish paicunata mandaccunaca paicunapac jatun Diospacta ruhuanataca mana ayudarcachu.

⁶ Mauca pungutaca Paseahpac churi Joiadahuan, Besodiaspac churi Mesulamhuanmi allichirca. Paicunami vigacunata, jarcana caspicunata, aldabacunata churashpa chai pungutaca allichirca.

⁷ Paicunapac ladopica gabaonitapuramanta Melatias-huan, meronotitapuramanta Jadonhuan shinallatac Gabaón, Mizpa pueblopi causaccunahuanmi allichirca. Paicunaca jatun yacu chimba lado llactata mandac mandashcami causarcacuna.

⁸ Paicunapac ladopica cullquimanta imacunata ruhuanata yachacpuramanta Harhaiaspac churi Uzielhuan, mishquilla ashnac jambicunata ruhuanata yachacpac churi Hananias-huanmi allichirca. Shinami paicunaca Jerusalén muyundi pircacunataca ancho pircacaman allichirca.

⁹ Paicunapac ladopica Hurpac churi Refaiasmi allichirca. Paimi Jerusalén chaupi pueblotaca mandacurca.

¹⁰ Paicunapac ladopica Harumafpac churi Jedaiasmi paipac huasi ñaupapi cac pircata allichirca. Paipac ladopica Hasabniaspac churi Hatusmi allichirca.

¹¹ Catic pircataca Harimpac churi Malquías, Pahat-moabpac churi Hasubmi pircatapish, Hornospac torrecunatapish allichirca.

¹² Paicunapac ladopica Halohespac churi Salummi paipac ushicunahuan allichirca. Salumca chaupi Jerusalenta mandacmi carca.

¹³ Pugru pambaman llucshina pungutaca Hanunmi Zanoa pueblopi causaccunahuan allichirca. Paicunami jarcana caspicunata, aldabacunata churashpa saquiquirca. Pircatapish mapata shitanacamanmi allichirca. Paicuna allichishca pircaca chuscu patsac pichca chunga metromi carca.

¹⁴ Mapata shitana pungutaca Recabpac churi Malquiasmi allichirca. Malquiasca Bet-haquerem llactatami mandacurca. Jarcana caspicunata, aldabacunata churashpami saquirca.

¹⁵ Colhozepac churi Salumca Mizpa llactatami mandacurca. Paimi callpacuc yacuman llucshina punguta allichirca. Paica caspicunata churashpa, jarcana caspicunata, aldabacunata churashpami saquirca. Pircataca jatun mandacpac huerta ladopi tiyac Siloé yacu jundu ladomanta, Davidpac puebloman rina gradacamanmi allichirca.

¹⁶ Paipac ladopica Azbucpac churi Nehemiasmi allichirca. Paica Bet-sur chaupi llactatami mandacurca. Paimi Davidtapish, paipac familiacunatapish enterrashca jutcu tupanacuicaman, ruhuashcalla junducaman, sinchi runacunapac huasi ladocaman allichirca.

¹⁷ Paipac ladopica levitapuramanta Banipac churi Rehummi allichirca. Paipac ladollapica chaupi Keila llactata mandac Hasabiasmi paipac llactapac shutipi allichirca.

¹⁸ Paipac ladopica paicunapac huauquicuna Henadadpac churi, chaupi Keila llactata mandac Bavaimi allichirca.

¹⁹ Paipac ladopica Jesuapac churi Mizpa pueblota mandac Ezermi allichirca. Paimi macanacunata huacaichina huasiman rina tupanacuimanta jahua esquinacaman allichirca.

²⁰ Paipac ladopica Zabaipac churi Barucmi jahua lado esquinamanta, curacunata mandac Eliasib curapac huasi yaicunacaman tucui munaihuan allichirca.

²¹ Paipac ladopica Cospac nieto Uriaspac churi Meremotmi allichirca. Paica Eliasibpac huasimantaca huasi esquinacamanmi allichirca.

²² Paipac ladopica pugru pambapi causac curacunami allichirca.

²³ Paipac ladopica Benjamín, Hasub curacunami paicunapac huasi ñaupapi allichirca. Paicunapac ladopica Ananiaspac nieto Maasiaspac churi Azariasmi paipac huasi ladopi allichirca.

²⁴ Paipac ladopica Henadadpac churi Binuimi Azariaspac huasi ladomanta jatun pirca tucuri esquinacaman allichirca.

²⁵ Paipac ladopica Uzaipac churi Palalmi chai tucuri pircatapish, jatun mandacpac huasi ladopi tiyac jatun torretapish allichirca. Chai torreca prezushpa churana huasi ñaupapimi carca. Paipac ladopica Farospac churi Pedaiasmi allichirca.

²⁶ Ofel pueblopi causac Diospac huasipi serviccunami inti llucshina ladoman tiyac yacuman llucshingacaman allichirca. Shinallatac huichaiman llucshina jatun torretapish allichirca.

²⁷ Paipac ladopica Tecoa pueblopi causaccunami allichirca. Paicunaca torre ñaupamanta Ofel uchilla pueblopi causaccuna allichishcacamanmi allichirca.

²⁸ Caballocunahuan yaicunamanta callarishpaca, curacunami paicunapac cada huasi ñaupapi cac pircata allichirca.

²⁹ Paicunapac ladopica Imerpac churi Sadocmi paipac huasi ñaupapi cac pircata allichirca. Paipac ladopica inti llucshina ladota cuidac Secaniaspac churi Semaiasmi allichirca.

³⁰ Paipac ladopica Selemiaspac churi Ananiasmi Salafpac suctaniqui churi Hanunhuan allichirca. Paicunapac ladopica Berequiaspac churi Mesulammi paipac huasi ñaupapi cac pircata allichirca.

³¹ Paipac ladopica cullquimanta imacunata ruhuac runapac churi Malquiasmi allichirca. Paica Diospac huasipi servishpa causaccunapac huasicaman, shinallatac randishpa catushpa causaccunapac huasicaman shinallatac piñanacushtaca allichina huasi pungumanta huasi esquinacamanmi allichirca.

³² Cullquimanta imacunata ruhuanata yachaccuna, randishpa catushpa causaccunaca chai huasi esquinamanta callarishpa, ovejacuna yaicuna pungucamanmi allichirca.