NEHEMÍAS 2 - Dios Rimashcata Quillcashcami

Jatun mandac Artajerjes Nehemiasta Jerusalenman cachashcamanta

¹ Jatun mandac Artajerjes ishcai chunga huatata mandacucpimi, Nisán nishca quillapi jatun mandacpac ñaupapi vinota japishpa paiman curcani. Utcapica jaicapi paipac ñaupapica mana llaquilla cashcanichu.

² Chaimantami jatun mandacca: —¿Ima nishpatac canca llaquilla cangui? Canca mana ungushcachu cangui, ashtahuanpish cambac shungupimi llaquita charingui— nirca. Shina nicpimi, yallita manchaihuan

³ jatun mandactaca: —Jatun mandaclla, huiñaita causangui. Ñaupa ñuca taitacunata enterrashca puebloca shitashca pamba shinami, saquirishca pueblo pungucunatapish rupachishcami. Chaimantaca ¿Ima shinatac mana llaquilla cashayari?— nircani.

⁴ Shina nicpimi, jatun mandacca: —¿Imatatac ruhuachun ningui?— nirca. Shina nicpimi, jahua pachapi causac Diosta mañashpa,

⁵ jatun mandactaca: —Can jatun mandacman alli cacpi, canta servic ñucapish cambac ñaupapi alli ricurishca cacpica, ñuca taitacunata enterrashca pueblota cutin allichigringapac Judá llactaman cachai— nircani.

⁶ Shina nicpimi, paipac huarmi ladopi tiyacucpi jatun mandacca: —¿Rinaca mashna punzhashi canga? ¿Ima horasta cutimungui?— nirca. Shina nicpi, ñuca caiman ima horas cutimunata huillacpimi, jatun mandacca allimi rilla nirca.

⁷ Shina nicpipish jatun mandactaca: —Canman alli cacpica, Judá llactaman ñuca ricucpi, ama jarcachun jatun yacu chimba lado llactacunata mandaccunaman shuc quillcata cachai.

⁸ Shinallatac Diospac huasi ladopi tiyac huasi pungucunata pueblo pircacunata, ñuca causana huasitapish ruhuangapac caspicunata cuchun, can jatun mandacpac sachacunata cuidac Asafman shuc quillcata cachai— nircani. Mandac Dios ñucahuan cacpimi, jatun mandacca ari nircalla.

⁹ Chai quipami ñucaca jatun yacu chimba ladota mandaccunapacman rishpa, jatun mandac cachashca quillcata curcani. Jatun mandacca soldadocunata mandaccunatapish, caballopi ric soldadocunatapish cacharcami.

¹⁰ Israelcunata ñuca ayudangapac shamushcata yachashpami, horonitapuramanta Sanbalatpish, amonitapuramanta Tobiaspish yallita piñarirca.

Nehemías Jerusalén muyundi pircata ricushpa purishcamanta

¹¹ Jerusalenman chayashpa, chaipi quimsa punzhata cashpami,

¹² ñucaca tuta jatarishpa maijan runacunahuan rircani. Paicunamanca Jerusalenpi ñucata imata ruhuachun Dios yuyaita cushcataca mana huillarcanichu. Ñucallami caballopi montashca carcani. Shuctac caballocunaca mana tiyarcachu.

¹³ Chai tutaca pugru pambaman llucshina punguta llucshishpami, Dragón jundu ladoman chayashpa, mapata shitana pungu ladocaman purishpa Jerusalén pircacunata urmachishcatapish, pungucunata rupachishcatapish ricurcani.

¹⁴ Chai quipaca junduman llucshina punguta rishpami, jatun mandacpac jatun paila yacu ladoman cuchuyarcani. Ashtahuanpish ñuca montashpa ricuc caballohuanca mana pasaipacchu cashcarca.

¹⁵ Jatun yacu ladota tuta huichai rishpami, muyundi jatun pircataca alli ricurcani. Chashna rishpami, pugru pambaman llucshina pungullatatac cutishpa yaicurcani.

¹⁶ Shina cacpipish, quipa mandaccunaca ñuca maiman rishcatapish, imata ruhuashcatapish mana yacharcachu. Ñucaca Judá llacta runacunamanpish, curacunamanpish, alli nishcacunamanpish, quipa mandaccunamanpish, chaipi ima ruhuaccunamanpish manarac huillarcanichu.

¹⁷ Chai quipami ñucaca: —Jerusalén shitashca pamba shina tucushcamanta, pungucunata rupachishcamanta ñucanchic yalli llaquilla cashcataca cancunallatac yachanguichicmi. ¡Chaimanta pipish ñucanchicta ama burlachunca, Jerusalén pircacunata allichingapac shamuichic!— nircani.

¹⁸ Dios paipac maquihuan ñucata ayudacushcatapish, jatun mandac ñucata imata nishcatapish ñuca huillacpimi paicunaca: —¡Shinaca, allichi callaringapac jatarishunchic!— nircacuna. Shinami caishuc chaishuc ashtahuan sinchiyashpa allichi callarircacuna.

¹⁹ Ashtahuanpish Horón pueblomanta Sanbalatpish, jatun mandacta servic amonitapuramanta Tobiaspish, arabepuramanta Gesempish chaita uyashpami ñucanchicta asishpa burlashpaca: —¿Cancunaca imatatac ruhuacunguichic? ¿Jatun mandacpac contrachu tucugringuichic?— nircacuna.

²⁰ Shina nicpimi paicunataca: —Ñucanchictaca jahua pachapi causac Diosmi ayudanga. Shina ayudacpimi, paita servic ñucanchicca tucui jatarishpa cutin allichishun. Ashtahuanpish cancunaca Jerusalenpica imata ruhuanatapish, imata japinatapish, imata yuyarinatapish mana charinguichicchu— nircani.