NEHEMÍAS 12 - Dios Rimashcata Quillcashcami

Curacunamantapish levitacunamantapish

¹ Salatielpac churi Zorobabelhuan, Jesúa curahuan, cutimuc Levitacuna curacunaca: Seraías, Jeremías, Esdras,

² Amarías, Maluc, Hatús,

³ Secanías, Rehum, Meremot,

⁴ Iddo, Ginetón, Abías,

⁵ Mijamín, Maadías, Bilga,

⁶ Semaías, Joiarib, Jedaías,

⁷ Salú, Amoc, Hilcías, shinallatac Jedaiasmi carca. Jesúa causacui punzhacunapica paicunami curacunata, paicunapac huauquicunata mandaccuna carca.

⁸ Levitapuramantaca: Jesúa, Binúi, Cadmiel, Serebías, Judá, shinallatac Mataniasmi paipac huauquicunahuan Diosta alli nishpa cantanata pushacurca.

⁹ Bacbuquiaspish, Unipish paicunapac tucui huauquicunahuanmi Diospacta ruhuarcacuna.

¹⁰ Jesuaca Joiacim churitami charirca. Joiacimca Eliasib churitami charirca. Eliasibca Joiada churitami charirca.

¹¹ Joiadaca Jonatán churitami charirca. Jonatanca Jadúa churitami charirca.

¹² Joiacim causacui punzhacunapi curacunapac huasi ucupurataca caicunami mandacurca: Seraiaspac huasi ucupurataca Meraías, Jeremiaspac huasi ucupurataca Ananías,

¹³ Esdraspac huasi ucupurataca Mesulam, Amariaspac huasi ucupurataca Johanán,

¹⁴ Melicupac huasi ucupurataca Jonatán, Sebaniaspac huasi ucupurataca José,

¹⁵ Harimpac huasi ucupurataca Adna, Meraiotpac huasi ucupurataca Helcai,

¹⁶ Iddopac huasi ucupurataca Zacarías, Ginetonpac huasi ucupurataca Mesulam,

¹⁷ Abiaspac huasi ucupurataca Zicri, Miniaminpac, Moadiaspac huasi ucupurataca Piltai,

¹⁸ Bilgapac huasi ucupurataca Samúa, Semaiaspac huasi ucupurataca Jonatán,

¹⁹ Joiaribpac huasi ucupurataca Matenai, Jedaiaspac huasi ucupurataca Uzi,

²⁰ Salaipac huasi ucupurataca Calai, Amocpac huasi ucupurataca Eber,

²¹ Hilciaspac huasi ucupurataca Hasabías, shinallatac Jedaiaspac huasi ucupurataca Natanaelmi mandacurca.

²² Eliasib, Joiada, Johanán, Jadúa runacuna causacui punzhacunamanta Persia llactata jatun mandac Darío mandai punzhacunacamanmi levitacunapac, curacunapac huasi ucupurata mandaccunapac shuticunataca quillcashca carca.

²³ Shinallatac Eliasibpac nieto Johanán causacui punzhacunacamanmi Levipac huahua huahuacunata mandaccunapac shuticunata Judá llactata jatun mandaccuna imata ruhuashcacunata quillcanapi quillcashca carca.

²⁴ Levitacunata mandaccunaca: Hasabías, Serebías, Cadmielpac churi Jesuami carca. Paicunapac huauquicunaca Diosta servic David mandashpa quillcachishca shinallatacmi Diosta pagui nishpa cantaccunapac ñaupapi yaicuna horas chayacpi shayariccuna carca.

²⁵ Matanías, Bacbuquías, Obadías, Mesulam, Talmón, shinallatac Acubca yaicuna pungucunata cuidaccunami carca.

²⁶ Paicunaca Jesuapac churi Joiacim, mandac Nehemías, quillcac Esdras causacui punzhacunapimi cuidaccuna carca. Joiacimca Josadacpac nietomi carca.

Jerusalén muyundi pircata Diosman mingashcamanta

²⁷ Jerusalén muyundi pircata Diosman mingangapacca tucui levitacunatami maimantapish Jerusalenman pushamurca. Paicunataca platillopi, salteriopi, citarrapi Diosta alli nishpa cantashpa Diosman mingangapacmi pushamurca.

²⁸ Shinallatac cantaccunapac churicunaca Jerusalén muyundi llactacunamanta, Netofa pueblo muyundi uchilla llactacunamanta,

²⁹ Gilgal pueblomanta, Geba, Azmavet pambacunamantami tandanacumurca. Chai cantaccunaca Jerusalén pueblo muyundipimi asha huasicunata ruhuashca carca.

³⁰ Chaipica curacunapish, levitacunapish paicunarac Diospaclla tucushpami, gentecunatapish, pungucunatapish, jatun pircatapish Diospacllata ruhuarcacuna.

³¹ Chai quipaca Judá llactata mandaccunatami jatun pirca jahuaman huichicuchun mandarcani. Ishcai coro cantaccunatami ñaupata richun mandarcani. Shuc chaupi cantaccunataca mapata shitana pungu ladoman cac alli lado pirca jahuata richunmi mandarcani.

³² Chai quipaca Osaiastami Judá llactata chaupi mandaccunahuan richun mandarcani. Paicunaca:

³³ Azarías, Esdras, Mesulam,

³⁴ Judá, Benjamín, Semaías, shinallatac Jeremiasmi carcacuna.

³⁵ Curacunapac churicunaca trompetapi tocashpami rircacuna. Paicunaca: Zacariasca Jonatanpac churi, Jonatanca Semaiaspac churi, Semaiasca Mataniaspac churi, Mataniasca Micaiaspac churi, Micaiasca Zacurpac churi, Zacurca Asafpac churimi carca.

³⁶ Paicunapac huauquicuna Semaías, Azarael, Milalai, Gilalai, Maai, Natanael, Judá, shinallatac Hananica Diosta servic Davidpac tocanacunapimi tocashpa ricurca. Paicunapac ñaupataca quillcac Esdrasmi rirca.

³⁷ Yacu junduman llucchina punguta derechashpami Davidpac puebloman huichai rina gradata rircacuna. Davidpac huasimantaca inti llucshina yacuman rina pungucamanmi huichai rircacuna.

³⁸ Chaishuc coro cantaccunaca lluqui ladotami rircacuna. Paicunapac huashataca ñucami pirca jahuata caishuc chaupi gentecunahuan Hornos torreta pasashpa, ancho pircacaman rircani.

³⁹ Efraín pungumantaca mauca jatun pungutapish, Challua pungutapish, Hananeel torretapish, Hamea torretapish, Ovejacuna yaicuna pungutapish pasashpami prezu huasi pungupi saquirircanchic.

⁴⁰ Chai quipaca ishcai coro cantaccunaca Diospac huasimanmi chayarca. Ñucapish, ñucahuan puric mandaccunahuanmi chayarcani.

⁴¹ Trompetapi tocac curacunaca: Eliacim, Maaseías, Miniamín, Micaías, Elioenai, Zacarías, Hananías,

⁴² Maaseías, Semaías, Eleazar, Uzi, Johanán, Malquías, Elam, shinallatac Ezermi carca. Cantaccunaca Izrahías pushashcami sinchitami cantarcacuna.

⁴³ Chai punzhaca Diosllata cushichicpimi, achca animalcunata Diosman cushpa huañuchishpa, yallita cushicurcacuna. Chaipica huarmicunapish, huahuacunapish yallitami cushicurca. Jerusalenpi chashna yallita cushicushcaca carucamanmi uyaricurca.

Curacunamanpish, levitacunamanpish micunata cushcamanta

⁴⁴ Chai punzhapica imapish yalli valishcacunata, Diosman cushcacunata, punta pucushcacunata, chungamanta shucta cushcacunata, huacaichina ucuta cuidachunmi churarca. Paicunataca pueblo muyundi pambacunapi pucushcacunata, shinallatac mandashcapi nishca shina curacunaman, levitacunaman cungapac apamushcacunata tandachichunmi churarca. Judá llactapi causaccunaca curacunapish, levitacunapish Diosta servicucpica yallitami cushicurca.

⁴⁵ Chashnami curacunapish, levitacunapish paicunapac Dios mandashcata pactachishpa, juchamanta cushpa chuyayarcacuna. Cantaccunapish, pungupi cuidaccunapish David shinallatac paipac churi Salomón quillcashpa mandashcatami pactachircacuna.

⁴⁶ Jatun mandac David, Asaf causacui punzhamanta pachami Diosta pagui nishpa cantaccunata punzhacunaca tiyarca.

⁴⁷ Zorobabel, shinallatac Nehemías causacui punzhacunapica tucui israelcunami punzhanta cantaccunamanpish, pungupi cuidaccunamanpish cararcacuna. Shinallatac levitacunaman cungapacmi imallata chicanyachic carcacuna. Levitacunapish chai cushcacunamantaca Aaronpac huahua huahuacunamanmi cuna cashcata curca.