NEHEMÍAS 10 - Dios Rimashcata Quillcashcami

¹ Paicunapac shuticunata quillcashpa firmaccunaca: Hacaliaspac churi mandac Nehemías, Sedequías,

² Seraías, Azarías, Jeremías,

³ Pasur, Amarías, Malquías,

⁴ Hatús, Sebanías, Maluc,

⁵ Harim, Meremot, Obadías,

⁶ Daniel, Ginetón, Baruc,

⁷ Mesulam, Abías, Mijamín,

⁸ Maazías, Bilgai, shinallatac Semaiasmi carca. Paicunaca curacunami carca.

⁹ Levitacunapuramantaca: Azaniaspac churi Jesúa, Henadadpac huahua huahuapuramanta Binúi, shinallatac Cadmielmi carca.

¹⁰ Paicunapac huauquicunapuramantaca: Sebanías, Hodías, Kelita, Pelaías, Hanán,

¹¹ Micaías, Rehob, Hasabías,

¹² Zacur, Serebías, Sebanías,

¹³ Hodías, Bani shinallatac Beninumi carca.

¹⁴ Mandacpuramantaca: Paros, Pahat-moab, Elam, Zatu, Bani,

¹⁵ Buni, Azgad, Bebai,

¹⁶ Adonías, Bigvai, Adín,

¹⁷ Ater, Ezequías, Azur,

¹⁸ Hodías, Hasum, Bezai,

¹⁹ Harif, Anatot, Nebai,

²⁰ Magpías, Mesulam, Hezir,

²¹ Mesezabeel, Sadoc, Jadúa,

²² Pelatías, Hanán, Anaías,

²³ Oseas, Ananías, Hasub,

²⁴ Halohes, Pilha, Sobec,

²⁵ Rehum, Hasabna, Maasías,

²⁶ Ahías, Hanán, Anán,

²⁷ Maluc, Harim, shinallatac Baanami carca.

²⁸ Maijan gentecuna, curacuna, levitacuna, Diospac huasi pungupi cuidaccuna, cantaccuna, Diospac huasipi serviccuna shinallatac Dios mandashcata pactachingapac shuc llactapi causac gentecunamanta chicanyarishcacunapish, paicunapac huarmicunandi, ña yuyaita charic churicunandi, ushicunandimi tandanacurca.

²⁹ Dios mandashcata pactachingapac ari nishpami paicunapac huauquicunahuan, mandaccunahuan tandanacurca. Ñucanchicta Mandac Dios paita servic Moisesman imata ruhuachun nishpa mandashcacunata pactachichun cushca shimicunata cazushpa pactachingapacmi tandanacurca.

³⁰ Shinallatac ñucanchic ushicunata cai llacta ladopi causaccunapac churicunahuan, ñucanchic churicunatapish paicunapac ushicunahuan mana cazarachingapac.

³¹ Chashnallatac samana punzhapi, Diospaclla chicanyachishca punzhapi shuc llacta gentecuna imacunata, granocunata, mana cashpaca ima shuctac micunacunata catungapac shamucpi, mana randingapac. Shinallatac canchis huata tucucpica, allpacunatapish samachingapac, debicunatapish perdonangapac.

³² Shinallatac ñucanchic Diospac huasita imata ruhuachunpish chuscu gramosta pezac cullquita huatanta cungapacmi ari nircanchic.

³³ Diosman cuna tandapac, punzhanta cuna ofrendapac, Diosman animalta cushpa punzhanta rupachingapac, samana punzhacunapi, llullu quilla punzhacunapi, fiesta punzhacunapi cungapac. Shinallatac Diosman chicanyachishpa cungapac animalta israelcunapac juchamanta cushpa huañuchingapac, ñucanchic Diospac huasipi imata ruhuachun cungapacmi ñucanchicllatac ari nircanchic.

³⁴ Diospac huasiman curacunapish, levitacunapish, tucui israelcunapish, mandashcapi nishca shina, ñucanchic taitacunapac huasi ucupura ima shina cashca shina ñucanchic Mandac Diospac altarpi rupachingapac huatanta yantata apamungapacmi suerteta ruhuarcanchic.

³⁵ Ñucanchic allpapi punta pucushcacunatapish, tucui yuracunapi punta pucushcacunatapish Mandac Diosman huatanta apamungapac.

³⁶ Shinallatac mandashcapi nishca shina ñucanchic punta churicunatapish, punta huacharishca huagracunatapish ñucanchic Diospac huasiman apamungapacmi ari nircanchic. Punta huacharishca vacacunatapish, ovejacunatapish ñucanchic Diospac huasipi servic curacunamanmi apamushun nircanchic.

³⁷ Punta masashca tandata, tucui yuracunapi punta pucushca granota, punta ruhuashca vinota, aceiteta curacunaman, ñucanchic Diospac huasiman apamungapac. Ñucanchic allpapi pucushcacunataca chungamanta shucta levitacunaman apamungapacmi ari nircanchic. Ñucanchic allpapi pucushca granocunataca levitacunamanmi chungamanta shucta cungapac tucui pueblocunapi tandac carcanchic.

³⁸ Chungamanta shucta levitacuna japinacucpica, Aaronpac huahua huahuapuramanta shuc curami paicunahuan canga. Levitacuna chungamanta shucta japishcamantaca cutinmi chungamanta shucta chicanyachishpa, ñucanchic Diospac huasipi tiyac huacaichina ucupi huacaichinga.

³⁹ Chai huacaichina ucumanmi israelcunapish, levitacunapish cushca grano ofrendata, vinota, aceiteta apangacuna. Chai huasillapitacmi Diosta servic curacunapish, punguta cuidaccunapish, cantaccunapish causancuna. Chashna ruhuashpami, ñucanchic Diospac huasitaca mana saquishun nircanchic.