NAHÚM 3 - Dios Rimashcata Quillcashcami

Nínive llactata tucuchinamanta

¹ ¡Cai llactapi causaccunalla, huañuchishpa yahuarta jichashpa, yallita llullashpa, shuhuashpa, macashpa quichushpallami causarcanguichic!

² Anguhuan huactashcatapish, carreta ruedacuna huacashcatapish, caballocuna sarushcatapish, carretacuna huajiashcatapish,

³ caballopi ric soldado shamucuctapish ricungami. Espadapish, lanzapish jagan nicuctami ricunga. Achca runacunami huañunga. Huañushcacunaca maita mana yupaipacmi canga. Chai huañushcacunapac jahuallapitacmi mitcaringa.

⁴ Nínive llactapi causaccunaca huainayac huarmi shina, sumac ricunallami carca. Brujianatapish yallita yachac cashcamanta, shuctac llacta gentecunatapish huainayachishpa, brujiashpa juchapi urmachic carca. Chaimantami chai llaquicunaca japinga.

⁵ Tucuita Mandac Diosca: «¡Ñucami canta llaquichigrini! Cambac churanacunata cambac ñahuicaman llatanashpami shuctac llactacunaman ricuchisha. Chashnami jatun mandaccunapac ñaupapi shayachishpa pingaichisha.

⁶ Cambac jahuapi mapacunata shitashpa pingaichishpami tucuipac asinata ruhuasha.

⁷ Can chashna cacta tucui gentecuna ricushpa, canmanta caruyashpaca: “¡Nínive llactaca llaquinayaitami tucurishca! ¿Pitac paitaca llaquingayari? ¿Maipitac cushichictaca taringayari?” nishpami mancharinga.

⁸ ¿Canca Tebas llactatapish yallichu carcangui? Chai llactaca jatun yacu Nilo ladopi tiyac, muyundita jatun yacucuna jarcashca, shinallatac baluartecunahuanmi carca.

⁹ Etiopía llacta, Egiptopi llacta ayudacpimi, pipish mana mishaipac carca. Fut llacta, Libia llactapi causaccunapish, paita ayudacmi carca.

¹⁰ Shina cacpipish, prezurcami. Paipac huahuacunataca calle esquinacunapimi pambaman shitashpa huañuchirca. Alli nishca runacunataca suerteta ruhuashpami aparca. Mandaccunataca cadenahuan huatashpami prezu aparca.

¹¹ Canpish machashca shinami saquiringui. Piñaccunamanta miticushpami ucupi cangui. Piñaccuna shamucpica, maipi miticunata mashcanguimi.

¹² Can miticuna torrecunaca alli cargashca higo yura shinami canga. Yurata cuyuchicpi, granocuna shimipimi urmac shinami canga.

¹³ Cambac soldadocunaca huarmicuna shinami manchanga. Llacta pungucunapish, canta piñaccuna yaicuchunmi, caiman chaiman pascaringa. Pungu aldabacunataca ninami tucuchinga.

¹⁴ Canta piñaccuna muyunacushpa shayacucpi, yacuta ubiangapac ashtangui. Cambac muyundi pircacunata allichingapac turuta batingui, hornotapish allichingui.

¹⁵ Chaipica ninami rupachinga. Cantaca espadahuan huañuchishpami, pulgón curucuna shina tucuchinga. Langosta, pichachau curucuna shina mirariyari.

¹⁶ Jahua pacha lucerocunata shinami, randishpa catushpa charinacunata mirachircangui. Shina cacpipish, langostacuna tucuchic shinami tucuchinga.

¹⁷ Cambac mandaccunaca langosta curucuna shinami canga. Chiri punzhacunapica langostacuna puyu shina shamushpami pirca jahuapi siricunga. Inti shamucpica ringallami. Shina ricpica, paicuna maipi cactaca pipish mana yachanchu.

¹⁸ ¡Asiria llactata jatun mandaclla, cambac michiccunaca sueñucunmi! ¡Cambac sinchi soldadocunapish samaricunmi! Cambac llactapi causaccunaca urcucunamanmicaita chaita rishca. Paicunata tandachicca pipish mana tiyanchu.

¹⁹ Cambac nanaita allichic jambica mana tiyanchu. Chugrica mana jambipacmi tucushca. Can ima tucushcataca uyashpaca tucuimi cushicunga. Canca tucuitami llaquichircangui» ninmi.