NAHÚM 2 - Dios Rimashcata Quillcashcami

Nínive llacta llaquichinamanta

¹ ¡Nínive llactalla, tucuchicmi huichai shamun! ¡Torrecunapi chapacta churaiyari! ¡Ñantapish chapaiyari! ¡Sinchita chumbilliyari! ¡Sinchicuiyari!

² Mandac Diosmi alli nishca Jacobopac huahuacunatapish, alli nishca israelcunatapish cutin allichinga. Ima charishcacunata shuhuashca cacpipish, ramacuna illac uvas yura shina cacpipish, cutinmi allichinga.

³ Sinchi soldadocunapac escudocunaca pucanlla, soldadocunapac churanaca yana pucallami canga. Macanacungapac allichiricui punzhapi carretacunaca antorchata japichishca shinami canga. Cutin caballopi ric soldadocunaca chucchuchingami.

⁴ Carretacunaca plazacunamanmi yaicunga. Caiman chaiman callpashpami cuchuyanga. Shinallatac antorchata japichishca shina, relampa jaguin nic shinami, caiman chaiman callpacunga.

⁵ Sinchi soldadocunata cayacpica, sarurinacushpami shamunga. Pirca ladoman rishpami, espadahuan macanacungapac allichiringa.

⁶ Jatun yacu jarcashca pungucuna pascarishpami, mandashpa tiyana huasitapish urmachinga.

⁷ Jatun mandac huarmita prezu aparingami. Paita chashna prezu aparicpimi, paita servic huarmicunaca palomacuna shina huacashpa, yallita llaquirishpa, pechopi huataringa.

⁸ Nínive llactaca yacu cucha jundashca shinami carca. Cunanca tucuimi miticushpa callpan. Paicunataca: “¡Shuyaichic, shuyaichic!” nicpipish, pi mana tigra ricunchu.

⁹ ¡Cullquitapish, curitapish apaichiclla! ¡Chai tucui sumac charishcacunaca, mashnata apacucpipish, mana tucurinchu!

¹⁰ ¡Tucuita tucuchishca, shitashca pamba shinami saquirishca! Shungupipish huañunalla shinami tucushca. Changacunapish chucchunmi, lomotapish nanachinmi, ñahuipish quilluyashcami.

¹¹ ¿Maipitac leoncuna miticunaca? ¿Maipitac huahua leoncunapac machaica? ¿Maipitac cari leonpish, huarmi leonpish, huahua leonpish pi mana manchachishca causac carca?

¹² Cari leonca paipac huahuacunamanpish, huarmi leonmanpish carangapacmi huañuchishpa achca aichata apamurca. Jutcucunapica aichacunatami jundachirca.

¹³ Tucuita Mandac Diosca: «Ñucami canta llaquichigrini. Cambac carretacunata rupachishpami cushnichigrini. Cambac huahua leoncunataca, espadahuanmi tucui tucuchinga. Cai llactamantaca can shuhuashcatapish, tucuchishami. Cambac huillaccuna huillashcapish, jaicapi mana uyaringachu» ninmi.